அமெரிக்காவை மிரள வைத்த சீனா…


விண்ணில் செயல்பட்டுக் கொண்டிருந்த தன்னுடைய செயற்கைக் கோள் ஒன்றை பூமியிலிருந்தே சுட்டு வீழ்த்தி சோதனை செய்திருக்கிறது சீனா. இது உலக நாடுகளை கடும் அதிர்ச்சிக்கு உள்ளாக்கியிருக்கிறது. இந்த சோதனை பற்றிய ரகசியங்கள் எதையும் வெளியிடாமல் சில வாரங்கள் மெளனம் சாதித்த சீனா அமெரிக்காவின் மிரட்டல் கலந்த வற்புறுத்தலுக்குப் பின் இப்போது உண்மையை ஒத்துக் கொண்டிருக்கிறது.

அமெரிக்காவும், ரஷ்யாவும் ஒரு உடன்படிக்கைக்கு வந்தபின் கடந்த இருபத்தைந்து ஆண்டுகளுக்கும் மேலாக செயற்கைக் கோள்களை யாரும் சேதப்படுத்தும் சோதனைகள் செய்ததில்லை. கடந்த சனவரி 11ம் நாள் சீனாவில் நடந்த இந்த சோதனையில் 865 கிலோ மீட்டர்கள் தொலைவில் இருந்த வானிலை செயற்கைக் கோள் ஒன்று சுட்டு வீழ்த்தப்பட்டிருக்கிறது. அமெரிக்கா, ரஷ்யாவுடன் விண்வெளி செயற்கைக் கோளை சுட்டு வீழ்த்திய மூன்றாவது நாடு எனும் பட்டியலில் சீனாவும் இதனால் இணைந்துள்ளது.

ஜப்பான், ஆஸ்திரேலியா, அமெரிக்கா உட்பட அனைத்து நாடுகளும் இந்த சோதனை குறித்து அதிர்ச்சியும் கவலையும் தெரிவித்துள்ளன. சுமார் எண்ணூறுக்கும் மேற்பட்ட பாதுகாப்பு சம்பந்தப்பட்ட செயற்கைக் கோள்கள் விண்ணில் உலவுவதாக புள்ளி விவரங்கள் தெரிவிக்கின்றன. செயற்கைக் கோள்களைச் செயலிழக்கச் செய்வது என்பது மிகப் பெரிய போருக்குச் சமமானதாகக் கருதப்படுகிறது.

ஒரு நாட்டில் தகவல் தொடர்புகளையோ, பாதுகாப்பு ஏற்பாடுகளையோ முற்றிலும் சிதைக்கும் வாய்ப்பு இந்த வான யுத்தத்தில் உண்டு. இந்த சோதனை வானியல் ஆய்வுக்கான ஒன்றே தவிர விண்வெளிப் போருக்கான ஒத்திகை அல்ல என்று சீனா அறுதியிட்டுக் கூறினாலும் மற்ற நாடுகள் அதை ஏற்க மறுக்கின்றன. தைவான் அமைச்சர் ஜோசப் வூ என்பவர் ‘இது உலகிற்குச் சீனா அடித்திருக்கும் எச்சரிக்கை மணி’ என்று வர்ணிக்கிறார்.

சீனாவின் ஆயுத வளர்ச்சி சர்வதேச நாடுகளின் கவலையை சம்பாதித்திருக்கும் இந்த வேளையில் சீனா செய்திருக்கும் இந்த சோதனை சீனாவைச் சுற்றியிருக்கும் நாடுகளையும், அமெரிக்காவையும் அதிர்ச்சியடைய வைத்திருக்கிறது. இதன் விளைவாக அமெரிக்கா தன்னுடைய உளவு வேலைகளை சீன எல்லைகளில் அதிகப்படுத்தியிருக்கிறது.

கடந்த இரண்டாயிரத்து இரண்டாம் ஆண்டு சீனாவும், ரஷ்யாவும் விண்வெளி ஆயுதப் போரை தடைசெய்யும் ஒரு ஒப்பந்தம் போடவேண்டுமென அமெரிக்காவை விண்ணப்பித்தன. ஆனால் விண்வெளியின் ஏகோபித்த கட்டுப்பாடு தன்னிடம் இருப்பதாகவும், அதற்கு வேறு நாடுகளுடன் ஒப்பந்தம் செய்து கொள்ள வேண்டியதில்லை என்றும் அமெரிக்கா கர்ஜித்திருந்தது. தற்போது சீனாவில் நடந்திருக்கும் சோதனை அமெரிக்காவுக்கு வானம் சொந்தமல்ல என்று உரக்கச் சொல்வதற்காக நடத்தப்பட்ட ஒன்றாக ஆய்வாளர்கள் கருதுகிறார்கள்.

வானிலை, பாதுகாப்பு, பூமியின் மாறுதல்கள் கணித்தல், வழிகாட்டுதல், குறிவைத்தல், உளவு வேலை உட்பட அமெரிக்காவின் அனைத்து செயல்களும் செயற்கைக் கோள் கட்டுப்பாட்டில் தான் இயங்குகின்றன. எனவே செயற்கைக் கோள் செயலிழப்பு என்பது அமெரிக்காவின் ஒட்டுமொத்த பாதுகாப்புக்கும் விடப்பட்டிருக்கும் செயலாகவே கருதுகிறது அமெரிக்கா. அதை விடவும் தன்னுடைய ஏகாதிபத்யம் தளர்ந்து விடுமோ என்றும் அஞ்சுகிறது.

1967ம் ஆண்டு ஏற்பட்ட உடன்படிக்கை ஒன்றில் செயற்கைக் கோள்கள் எதுவும் அணு ஆயுதங்களையோ, பேரழிவுப் பொருட்களையோ விண்ணில் உலவ விடக்கூடாது என்று குறிப்பிடப்பட்டுள்ளது. அமெரிக்கா நாட்டில் விமானப் படை விண்ணில் ஆயுதத் தளங்களை நிறுவி நாட்டின் பாதுகாப்பை பலப்படுத்தப் போவதாக சில ஆண்டுகளுக்கு முன் அறிவித்திருந்ததும் இங்கே குறிப்பிடத் தக்கது.

தற்போது சீனா சுட்டு வீழ்த்தியிருக்கும் செயற்கைக் கோள் கீழ் வட்டத்தில் சுற்றிக் கொண்டிருக்கும் ஒன்று. பெரும்பாலான அமெரிக்க செயற்கைக் கோள்கள் பூமியிலிருந்து தாக்க முடியாத மேல்மட்ட சுற்றுப்பாதையில் தான் இயங்கி வருவதாகவும், அதனால் இந்த சோதனை அமெரிக்காவை எந்த விதத்திலும் அச்சுறுத்துவதாகாது என்றும் அமெரிக்க பாதுகாப்புப் பிரிவினர் அறிவித்தாலும் வெள்ளை மாளிகையில் இந்த சோதனை ஒரு மானப் பிரச்சனையாய் வெடித்திருப்பது மட்டும் மறுக்க முடியாத உண்மை

Advertisements

2 comments on “அமெரிக்காவை மிரள வைத்த சீனா…

  1. america bayapadavillai endru sappai kattu kattugiradhu. 10% seyarkai kolgal veezthak koodiyae dhoorathilaye ulladhu. yen amerikavin aayudhae valarchi ethanai naadugalin uyirgalin mel! sandiyarukku sarukkum, amerikavin aazhivu avargalidathiale ulladhu.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s