சினிமாவின் ‘இளிச்சவாயன்’ மாப்பிள்ளைகள்

எப்போதெல்லாம் இப்படிப்பட்ட ஒரு கிளைமேக்ஸ் காட்சியைப் பார்க்கிறேனோ அப்போதெல்லாம் எனக்கு எரிச்சலும், சிரிப்பும் ஒருசேரக் கிளம்பும். அந்தக் காலத்திலிருந்து இந்தக் காலம் வரை அந்த கிளைமேக்ஸ் காட்சி மாறவேயில்லை.

அப்படியென்ன கிளைமேக்ஸ் காமெடிங்கறீங்களா ? அதான் கல்யாண மேடையிலே மாப்பிள்ளை பக்கத்துல நம்ம ஹீரோயின் நகத்தைக் கடிச்சிட்டு மாலையைப் பிடிச்சிட்டு பதட்டமா உக்காந்திருப்பாங்க. தாலி கட்டற நேரத்துல ஹீரோ வருவாரு பொண்ணு ஓடிப்போய் ஹீரோவைக் கட்டிப் பிடிக்க சுபம் !

உண்மையிலே இது சுபம் தானா ? பாவம் மேடையில ஒரு மாப்பிள்ளை இளிச்சவாயனைப் போல இருக்கிறானே ? அவன் கதி ? அவனோடு குடும்பத்தினரின் நிலமை ? அவர்கள் இந்தத் திருமணத்துக்காக எவ்வளவு கனவுகளைக் கண்டிருப்பார்கள், செலவுகளையும் செய்திருப்பார்கள் ?.

ஹீரோ, ஹீரோயின் இரண்டு பேரும் சேர்ந்து சிரிக்க ‘எ பிலிம் பை பஞ்சாங்கம்’ என்று டைட்டில் நிற்கும் பின்ணணியில் அந்த அப்பாவி மாப்பிள்ளை வேட்டி நுனியைக் கையில் பிடித்துக் கொண்டு ‘குடுத்த காசுக்கு நடிச்சாச்சு’ என்னும் திருப்தியோடு வாழை மரத்தடியில் நிற்பார்.

சரி.. உண்மையிலேயே இயக்குனர்கள் முட்டாள்களா ? இல்லை நாம தான் இந்த மாதிரி படத்தையெல்லாம் பார்த்துட்டு ‘செம ஜாலி மச்சி’ என்று கலக்ஷனை ஏத்தறோமா ? இந்தத் ‘திருவிளையாடல்’கள் இப்போ முடியும்ன்னு தோணலை !

என்னத்தைச் சொல்ல, ஹீரோவா மாறலேண்ணா மாப்பிள்ளைக்கும் கல்யாணத்துல மரியாதை இல்லை.