ஆளை விடுங்க சாமி.

email.jpg

வாங்கப்பா வாங்க. கடந்த சில வருஷங்களா எனக்கு செயின் மெயில் அனுப்பி கலங்கடிச்ச உங்க எல்லாருக்கும் பொத்தாம் பொதுவா ஒரு வணக்கம் சொல்லிக்கறேன்.

சும்மா சொல்லப்படாது சாமி, உங்களால நான் பட்ட நன்மைகள் கொஞ்ச நஞ்சமல்ல.

உங்களால நான் சினிமா போறதையே நிப்பாட்டினேன். ஏன்னா யாருடா எப்போ எயிட்ஸ் ஊசி போட்டுருவாங்களோங்கற பயம் தான்.

இப்ப எல்லாம் நான் டியோடரண்ட் யூஸ் பண்றதில்லேப்பா. ஏன்னா அது பயன்படுத்தினா கேன்சர் வரும்னு சொன்னது நீங்க தானேப்பா.

இப்பல்லாம் பயப்படாம இராத்திரி பக்கத்து பில்டிங் கூட போக முடியறதில்லை. எங்கேடா பெர்ஃப்யூம் சாம்பிள் வெச்சு யாராச்சும் நம்ம கையில இருக்கிறதை சுருட்டிடுவாங்களோன்னு தான்.

போன் பண்ணும்போ கூட பயமா இருக்கு. யாராவது ஏதாவது நம்பரை டயல் பண்ண சொல்லி பில் எக்கச்சக்கமா ஏறிடுமோன்னு தான். ஏன்னா நீங்க தானே அதுவும் இதுவும் அடிக்கடி சொல்லி பயப்படுத்தறீங்க.

ஆறு வருஷமா ஐந்து வயசில இருக்கிற பொண்ணு ஒண்ணுக்கு இதய அறுவை சிகிச்சைக்கு பணம் அனுப்பி அனுப்பி என்னோட சேமிப்பெல்லாம் கரைஞ்சு போயிடுச்சுப்பா.

பத்து பேருக்கு, இருபது பேருக்குன்னு இமெயில் அனுப்பி அனுப்பி இன்னும் இலவச லேப்டாப்பை எதிர்பார்த்துட்டே இருக்கேன்.

பத்து நிமிடங்களுக்குள் இருபது பேருக்கு மெயில் அனுப்பிட்டு நினைத்தது நடக்கும்ன்னு வேண்டிகிட்டு தான் இருக்கேன். அந்த பொண்ணுக்கு கல்யாணம் ஆகி இரண்டு வருடம் ஆன பின்பும்.

ஏதோ கதிர் பூமிக்கு பாயுதுன்னு சொல்லி பாதி நாள் என்னோட மொபைல் போன் ஆஃப் ல தான் கிடக்குது.

இன்னும் என்னென்ன மெயில்ஸ் இந்த வருஷம் வரப் போகுதோ ? நல்லா யோசிச்சு ஏதாச்சும் அனுப்பிட்டே இருங்க. ஏடிஎம் ல அடிப்பாங்க, சந்துல ஒதப்பாங்க, பஸ்சுல மிதிப்பாங்கன்னு. இப்போதைக்கு ஆளை விடுங்க.

( ஒரு மின்னஞ்சல் கருவிலிருந்து )

கணினியும் கண்ணும்

eye.jpg

அதிக நேரம் கணிப்பொறிக்கு முன்னால் கண் விழித்திருப்பவர்களை பல விதமான நோய்கள் பிடிக்கின்றன. அதில் முக்கியமான ஒன்று கண் உலர்தல். இமைக்கக் கூடச் செய்யாமல் கணினியே கதியெனக் கிடைக்கும் மக்களை, இந்த நோயை விரும்பி அழைப்பவர்கள் பட்டியலில், சேர்த்துக் கொள்ளலாம்.

கணிப்பொறிக்கு முன்னால் அமர்ந்து நீண்ட நேரம் வேலை செய்பவர்களின் கண்கள் அதிக அழுத்தத்தைச் சந்திக்கின்றன. இத்தகைய சூழலில் வேலை செய்யும் கண்களுக்கு டிரை ஐ சிண்ட்ரோம் எனப்படும் கண் உலர்தல் நோய் விரைவிலேயே வந்து விடுகிறது. அதன் விளைவுகளாக கண் எரிச்சல், கண் அரிப்பு, வலி போன்ற இணைப்புகள் கூடவே வந்து விடும். என்கின்றனர் மருத்துவர்கள்.

கண்ணில் இருக்கும் ஈரப்பதம் குறைந்து போவது தான் டிரை ஐ சிண்ட்ரோம் அல்லது கண் உலர்தல் நோயின் ஒரு வரி விளக்கம். இது எளிதான நோய் எனக் கருதி விட்டு விட்டால் இரும்பை துரும்பு அரித்து தீர்ப்பது போல இந்த நோய் நிரந்தரமாகவே கண் பார்வையைப் பறித்துக் கொள்ளும் அபாயம் உண்டு.

கண் எரிச்சல், கண் அரிப்பு, கண் வலி, கண் சிவத்தல் போன்ற அறிகுறிகள் இருந்தால் உங்களுக்கு இந்த நோய் இருக்கும் வாய்ப்புகள் இருக்கின்றன என்பதை உணர்ந்து கொள்ளுங்கள். எச்சரிக்கையாய் இருத்தல் பெரும் இன்னலைத் தீர்க்கும்.

பெருநகரங்களில் வாழும் மக்கள் தான் இந்த கண் உலர்தல் நோயினால் அதிகம் பாதிப்படைவதாக மருத்துவர்கள் தெரிவிக்கின்றனர். காரணம் அவர்கள் தான் அடிக்கடி கணினியே கதியெனக் கிடைக்கிறார்கள்.

கணினியில் குளிரூட்டப்பட்ட அறையில் இருக்கும் போது குளிர்க்காற்று படும் இடத்தில் நேரம் இருப்பது கூட கண் உலர்தலுக்குக் காரணமாகி விடுமாம். கண் உலர்தலிலிருந்து தப்பிக்கும் சுலப வழிகள் கண்ணை அடிக்கடி இமைத்துக் கொண்டே இருப்பதும், தொடர்ந்து கணினியைப் பார்க்காமல் இருப்பதும் தான்.

கணினி பயன்படுத்தும் போது அடிக்கடி கண்ணை இமைத்துக் கொண்டே இருப்பது கண்ணின் ஈரப்பதத்தைப் பாதுகாக்கும். குளிர் கண்ணாடிகளை அணிந்து பயணம் செய்வதும் கண்ணைப் பாதுகாக்கும்.

பீலி பெய் சாகாடும்.
அதிக நேரம் கணினி பார்த்தால் கண் கெடும்.