இப்படியும் ஒரு சாகசப் பிரியன்

சாகசப் பயணம் என்றால் தவிர்க்க முடியாத சம காலக் கில்லாடி பெனடிக்ட் ஆலன். எங்கே போறோமோ அந்த சூழலுக்குத் தன்னை முழுமையாய் அர்ப்பணிக்க வேண்டும் என்பது அவருடைய ஒருவரிக் கொள்கை. எவ்வளவு கஷ்டமான சூழலுக்குள்ளும் தன்னை நுழைத்துச் செல்வதில் அசகாய சூரன். காட்டுவாசிகள் வசிக்கும் இடங்களுக்குப் போவார். அவர்களுடன் தங்குவார். அவர்கள் அடித்தால் வாங்கிக் கொள்வார். அவர்கள் எதைக் கொடுக்கிறார்களோ அதைச் சாப்பிடுவார். ஓடிக் கொண்டிருக்கும் ஓணானைப் பிடித்து அவர்கள் தின்றால் அவரும் தின்பார். அவ்வளவு ஸ்ட்ராங் பார்ட்டி அவர்.

புரூனேயிலுள்ள அடர் காடு, அமேசான், பல நாட்டு மலைப்பகுதிகள் என இவரது பயணம் பரந்துபட்டது. சைபீரியா, மங்கோலியா, கோபி பாலை நிலங்கள் வழியாக 5 ½ மாதங்கள் தொடர்ந்து பயணம் செய்திருக்கிறார். பயணித்த தூரம் 4600 கிலோமீட்டர்கள்.  பிரிட்டனைச் சேர்ந்த இவர் தன்னுடைய திகில்ப் பயண அனுபவங்களை 9 நூல்களாக எழுதித் தள்ளியிருக்கிறார். 7 தொலைக்காட்சித் தொடர்களும் இவருடைய பயணத்தை அலசியிருக்கின்றன. எல்லாமே சூப்பர் டூப்பர் ஹிட் !

காட்டுக்குள்ளே எல்லாம் போயிருக்கேன் ஒரு மிருகம் கூட என்னைத் தொட்டதில்லை, இந்த மனுஷங்கதான் பின்னி எடுக்கிறாங்க என கவலைப்படுகிறார். இவருடைய முதல் பயணத்தில் அடர் காட்டில் ஒரு முரட்டுக் கும்பலிடம் மாட்டியிருக்கிறார். அவர்கள் இவர் மாபெரும் எதிரி என புரட்டி எடுத்திருக்கிறார்கள். ஒரு இடத்தில் அடைத்துப் போட்டு விட உணவு ஏதுமின்றி பசியில் சாகும் நிலைக்குப் போயிருக்கிறார்.  அப்புறம் வேறு வழியில்லாமல் தன்னுடைய நாயையே கடித்துத் தின்று உயிர் பிழைத்திருக்கிறார் மனுஷன்.

அமேசான் காட்டுப் பகுதியில் எட்டு மாதங்கள் தன்னந் தனியாக 5760 கிலோ மீட்டர் தூரம் பயணம் செய்திருக்கிறார் ! இதில் ஹைலைட் என்னவென்றால், அதிக திரில்லை சுவைக்க வேண்டும் என்பதற்காகவே, மேப் காம்பஸ் என எதையும் கொண்டு செல்லவில்லையாம் ! ஆர்டிக் பகுதியில் போனபோது அவரை இழுத்துச் செல்ல வேண்டிய நாய்கள் திடீரென காணாமல் போய்விட்டன. ஒரே நாளில் கண்டுபிடிக்கவில்லையேல் குளிரில் விறைத்து சாக வேண்டியது தான். அந்த திகில் இரவை ஒரு பனிக் குகையில் சுருண்டு படுத்து அனுபவித்திருக்கிறார். நல்ல வேளை சமர்த்தாக மறு நாள் நாய்கள் வந்து சேர்ந்திருக்கின்றன.

இப்படி மரணத்தின் விளிம்பு வரை சென்று பெப்பே காட்டி திரும்பி வரும் இவர் இன்னும் ஓய்ந்த பாடில்லை. எங்கே கிடைக்கும் இதை விடப் பெரிய திகில் என அலைந்து கொண்டிருக்கிறார் இந்த நாற்பது வயது சாகசப் பிரியர்.

சென்னைல பைக் ஓட்ட சொல்லலாமா ?

Thanks : Ananda Vikatan

Advertisements

ரிஸ்க் எடுக்கிறது உங்களுக்கு ரஸ்க் சாப்பிடற மாதிரியா ?

ஸ்கை டைவிங்.  

“ரிஸ்க் எடுக்கிறது எனக்கு ரஸ்க் சாப்பிடற மாதிரி” என்று மிதப்பவர்களின் சாகச விளையாட்டு ஸ்கை டைவிங். ஸ்கைல போயிட்டு டைவ் பண்றது தான் ஸ்கை டைவிங். மொட்டை மாடியிலிருந்து எட்டிப் பார்த்தாலே தலை சுற்றும் ஆசாமிகள் இதைப் படிக்காமல் இருப்பது நல்லது.

விளையாட்டு இது தான். இதற்காகவே உள்ள ஸ்பெஷல் விமானத்தில் ஏறி குறிப்பிட்ட உயரம் செல்ல வேண்டும். அங்கிருந்து பொத் தென கீழே குதிக்க வேண்டும்.  அதிக திரில் டைவிங் வானத்தில் சுமார் 13 ஆயிரம் அடி உயரத்தில் நடக்கும். அங்கிருந்து பார்த்தால் தரையே தெரியாது. உயிரைக் கையில் பிடித்துக் கொண்டு குதிக்க வேண்டும். குதித்த உடனே பாராசூட் விரியாது. கொஞ்ச நேரம் எந்த பிடிமானமும் இல்லாமல் சர்ர்ர் என பூமியை நோக்கி பாய வேண்டும். அதுவும் 200 கிலோ மீட்டர் வேகத்தில். அந்த பாய்ச்சல் தான் திரிலில் உச்சகட்டம். அப்புறம் சுமார் 2500 அடி உயரத்தில் வரும் போது பாராசூட்டை இயக்க வேண்டும். அதுவும் விழுந்து கொண்டிருக்கும் நபர் தான் இயக்க வேண்டும். அப்படி இயக்கும் போது பாராசூட் விரியாமல் போனால் கீழே வரும் வேகத்தில் அப்படியே மேலே போக வேண்டியது தான். அமெரிக்காவில் மட்டுமே ஆண்டுக்கு சுமார் 30 பேராவது இப்படி ஸ்ட்ரெயிட்டாக ஹெவன் அல்லது ஹெல் போய்ச் சேர்கிறார்கள்.

இப்படி விமானத்திலிருந்து விழும்போது கொஞ்சம் வேகம் கம்மியாய் பறவை போல அதிக நேரம் பறந்தால் நன்றாக இருக்குமே என நினைத்தார்கள்.  அந்த நினைப்பு தான் “விங் சூட்” (சிறகு உடை) கண்டு பிடிக்கக் காரணமாயிற்று.  இது ஒரு ஸ்பெஷல் டிரெஸ். இந்த டிரஸ்ஸைப் போட்டுக் கொண்டு எந்த உயரத்திலிருந்தும் குதிக்கலாம். கையையும் காலையும் விரித்தால் குதிப்பவர் ஒரு பறவை போல தோன்றுவார். கோழிக்குஞ்சை குறிவைக்கும் ஒரு பருந்து போல ! இதனால் விழும் வேகம் 200 கிலோமீட்டரிலிருந்து சட்டென 25 கிலோமீட்டர் எனுமளவில் குறையும். இந்த வேகத்தில் ரொம்ப நேரம் வானத்தில் மிதக்கலாம். கூடவே கொஞ்சம் ரிலாக்ஸாக பாராசூட்டை இயக்கவும் செய்யலாம்.

இந்த இறகு ஆடையைத் தயாரிக்க பலர் முயன்றார்கள். 1930, 1961, 1972 மற்றும் 1975 களில் இந்த முயற்சி செய்து குதித்தவர்களெல்லாம் குதித்த இடத்திலேயே சமாதியாகிவிட்டார்கள். அதனால் இந்த விங் சூட் முயற்சியே ஒரு திகில் முயற்சியாக ஒதுக்கப்பட்டது.  கடைசியில் 1990 களில் பிரெஞ்ச் நாட்டைச் சேர்ந்த ஸ்கைடைவர் பாட்ரிக் டி கேயார்டன் வெற்றிகரமாக ஒரு சூட் உருவாக்கி பறந்தும் காட்டினார். அத்துடன் விட்டிருந்தால் பரவாயில்லை. அதில் மாற்றம் செய்கிறேன் பேர்வழி என 1998ல் புதிய அட்வான்ஸ்ட் ஆடை தயாரித்தார். அந்த ஆடையுடன் ஹவாயில் பறந்தபோது பாராசூட் விரியாமல் பரலோகம் போனார். ஆனாலும் அவர் தயாராக்கிய விங் சூட் ரொம்ப பாப்புலராகி விட்டது. இப்போது பல விதங்களில், பல வடிவங்களில் இந்த ஸ்கை டைவிங் ஆடைகள் கிடைக்கின்றன. விங் சூட் போட்டுக்கொண்டு ஸ்கை டைவிங் செய்வது அதி அற்புத அனுபவம் என குதித்தவர்கள் பரவசத்தில் குதிக்கிறார்கள்.

என்ன ஒருதடவை குதிக்கறீங்களா ?

Thanks : Ananda Vikatan

ஆகதன் : சத்தியராஜின் முதல் மலையாளப் படம் !

மலையாளக் கடலில் குதித்திருக்கிறார் சத்யராஜ். படத்தின் பெயர் ஆகதன். ஹீரோ திலீப். மலையாளத்தின் வசூல் ஹீரோவான திலீப்பிற்கு இந்த ஆண்டு வெளியாகப் போகும் முதல் படம் இது என்பதால் கேரளாவில் இந்த படத்துக்கு தனி அடையாளமே கிடைத்திருக்கிறது. சத்தியராஜுக்கு இதில் வெயிட்டான வேடமாம். ஹரேந்திர நாத வர்மா எனும் ரிட்டயர்ட் மிலிட்டரி ஆபீசர் அவர்.  சாப்ட்வேர் காரரான கவுதம் மேனன் (திலீப்) குடும்பம் தீவிரவாதிகளின் தாக்குதலில் இறந்து விடுகிறது. அப்போது டியூட்டியில் இருந்தவர் நம்ம சத்யராஜ். அப்புறம் என்ன கதையை அப்படியே பில்டப் பண்ணிக்கோங்க. பிப்ரவரி முதல் வாரத்தில் வெளிவரப்போகும் இந்தப் படத்திற்குப் பின் சத்யராஜின் நக்கலை மலையாளத்திலும் அடிக்கடிக் கேட்கலாம் போலிருக்கிறது.

இந்தப் படத்தின் இன்னொரு ஸ்பெஷல், சார்மியின் மறு பிரவேசம். வினயனின் காட்டுசெம்பாக்கம் படத்தில் நடித்து துண்டைக் காணோம் துணியைக் காணோம் ( அதுதான் எப்பவுமே காணோமே ) என்று ஓடியவர் இப்போது மீண்டு(ம்) வந்திருக்கிறார்.

சமீபத்தில் ஒரு மலையாள சேனலில் மலபார் போலீஸ் தமிழில் பேட்டிக் கொண்டிருந்தார் சத்தியராஜ். “ஏன் ரஜினி கூட சிவாஜி படத்தில் நடிக்கவில்லை” எனும் கேள்விக்கு (இன்னுமாடா இந்தக் கேள்வியை விடவில்லை  ? ), “அது என்ன வில்லன் ? ரொம்ப சாதாரண வில்லன். எனக்கு வெயிட் இல்லாத கேரக்டர் ஆனதால் தான் சிவாஜியில் நடிக்கவில்லை.” என்று மலையாளத்தில் சொல்வதாக நினைத்து தமிழில் பேசிக்கொண்டிருந்தார் ஐயா. ஏற்கனவே எக்கச் சக்க மலையாளப் படங்களை டப் செய்து வெற்றியும் தோல்வியும் கொடுத்தவர் தான் சத்தியராஜ். அதிலும் சித்ரம் படத்தை எங்கிருந்தோ வந்தான் என ந(க)டித்ததை சித்ரம் ரசிகர்கள் வாழ்நாளில் மற்ற்ற்ற்றக்கவே மாட்டார்கள்.

என்னுடைய நடிப்பின் அதிகபட்ச சாதனை பெரியார் வேடத்தில் நடித்தது தான் என்றவர், கூடவே, இலக்கணம் மாறாமல் திலீப் ஒரு சூப்பர் ஹீரோ. அவருடைய பேச்சுக்கும் செயலுக்கும் வேறுபாடு ஏதும் இருக்காது. அவரு சினிமாலே எப்படி நடிக்குதோ அப்படியே இருந்தாச்சி. ரொம்ப ஜாலியா இருந்தாச்சி. 25 வருஷம் பழகின பிரண்ட் மாதிரி பேசியாச்சி. என்றெல்லாம் ஆச்சிக் கொண்டிருந்தார்.

பொதுவாகவே மலையாளப் படம் என்றால் அதில் ஒரு தமிழன் கேரக்டர் வரும். ஹீரோவின் கையால் அடிபட்டு “பாண்டி” என அழைக்கப்பட்டு, “இது ஸ்தலம் வேறயா…’ என அவமானப்படுத்தப்பட்டு மல்லூக்களின் கரகோஷத்தைப் பெறும். இப்படியாவது தமிழனை அவமானப்படுத்தி விடுவோமே எனும் மலையாளியின் ஆழ்மன காழ்ப்புணர்ச்சி என அதை உளவியல் பூர்வமாகச் சொல்லலாம். அப்படி ஏதும் இந்தப் படத்தில் நிகழாது என சத்திய(ராஜ்)மாய் நம்புவோம் !

ஆகதம் படத்தின் கிளைமேக்ஸ் போல இதுவரை நான் ஒரு கிளைமேக்ஸைப் பார்த்ததே இல்லை என்று ஏகத்துக்கு பில்டப் கொடுத்துக் கொண்டிருக்கிறார் சத்யராஜ். இந்தப் படத்தை இயக்குவது மலையாள இயக்குனர் கமல் என்பதால் சத்யராஜின் பேச்சை கொஞ்சமாச்சும் நம்பலாம் என நினைக்கிறேன். கமலைப் பற்றிச் சொல்லவும் வேண்டுமா ? உள்ளடக்கம் போன்ற பல கலக்கல் படங்களைத் தந்தவர் தானே.

ஆகதன் வரட்டும், புரட்சித் தமிழன்,  “புரட்சி மலையாளி” ஆவாரா பாக்கலாம்.

வாக்களிக்கலாமே….

ஜூ.வி : ஆயுள் நீட்டிக்கும் அதிசய மருந்து !

ஈஸ்டர் ஐலண்ட். தென் பசிபிக் கடலிலுள்ள ஒரு மர்மத் தீவு . சிலி நாட்டின் கடற்கரையிலிருந்து சுமார் 3200 கிலோ மீட்டர் தொலைவில் இருக்கிறது. இதன் மேற்குப் பக்கமாக சுமார் 1900 கிலோமீட்டர் பயணத்தில் வரும்  பிட்கெயின் தீவு தான் இதன் நெருங்கிய சொந்தக்காரன். மற்றபடி வெளி உலகோடு தொடர்புகள் ஏதுமற்ற ஓர் மௌனபூமி.

இந்தத் தீவில் சில வித்தியாசமான சிலைகள்  நிரம்பியிருக்கின்றன . இந்தச் சிலைகள் சுமார் 13 அடி உயரமும், 14 டன் எடையும் கொண்டவை. இவை கி.பி 1200க்கும் – 1500 க்கும் இடைப்பட்ட காலத்தில் பாலினேசியர்களால் உருவாக்கப்பட்டவை. 1860 ல் பெரு நாட்டிலிருந்து வந்தவர்களால் இங்கு வாழ்ந்த மக்கள் படுகொலை செய்யப்பட்டனர். போரில் சாகாதவர்கள் பிற்காலங்களில் கொள்ளை நோய்களினால் மாண்டுபோனார்கள். பல இலட்சம் பேர் வாழ்ந்த இந்த தீவில் இப்போது இருப்பது சில ஆயிரம் பேர் மட்டுமே. இது தான்  இந்த தீவின்  நான்கு வரி வரலாறு.

ஆனால் இந்த தீவு மனித இனத்தின் எதிர்கால வரலாற்றையே மாற்றியமைக்க கூடிய மர்மசக்தியை அடக்கி வைத்திருக்கிறது. இந்தத் தீவிலுள்ள நுண்ணுயிரிக்கு மனிதனின் ஆயுளை நீட்டிக்கும் ஆற்றல் உண்டு என விஞ்ஞானிகள் கண்டுபிடித்து உலகையே பரபரக்க வைத்திருக்கின்றனர்.

“ரபாமைசின்” என்பது அறுவை சிகிச்சைகளில் பயன்படும் ஒரு மருந்து. நோயாளிகளுக்கு உறுப்பு மாற்று அறுவை சிகிச்சை நடந்தால் இந்த மருந்தைக் கொடுப்பார்கள். இந்த மருந்து உடலிலுள்ள நோய் எதிர்ப்புச் சக்தியை வெகுவாகக் குறைக்கும். அப்போது தான் புதிய உறுப்பை உடல் ஏற்றுக் கொள்ளும். கான்சர் நோயாளிகளுக்கும் இந்த மருந்து பயன்படுத்தப்படுகிறது. இந்த மருந்து தான் இனிமேல் மனிதனுடைய ஆயுளை நீட்டிக்கும் சூப்பர் மருந்தாகவும் மாறப் போகிறது என்பது தான் ஹாட் நியூஸ். இந்த மருந்து கிடைப்பது ஈஸ்டர் தீவிலுள்ள நுண்ணியிரியில் இருந்துதான் !

இந்த நுண்ணுயிரி அந்த மர்மத் தீவிலிருந்து மருத்துவ அறைக்குள் வந்தது ஒரு சுவாரஸ்யமான கதை. 1964ல் கனடாவிலிருந்து ஈஸ்டர் தீவுக்குச் சென்ற ஆராய்ச்சியாளர்கள் அங்குள்ள சிலைகளைப் பார்த்து வியந்து போனார்கள். வேடிக்கை பார்த்துவிட்டு திரும்பி வரும்போது எதற்கும் இருக்கட்டும் என கொஞ்சம் மண், மணல், கல், இலை தளை எல்லாம் பொறுக்கி வந்தார்கள். அப்படி எடுத்து வந்த சாம்பிள்களில் உலகையே புரட்டிப் போடும் ஒரு வியப்புப் புதையல் இருக்கும் என அவர்களே நினைத்திருக்க மாட்டார்கள். அந்த சாம்பிள்களிலிருந்து 1970ல் கண்டறியப்பட்டது தான் இந்த ரபாமைசின்.

இந்த ரபாமைசின் பல ஆண்டுகளாக அறுவை சிகிச்சைக்குப் பயன்பட்டபோதிலும், அது ஆயுளை நீட்டிக்கவும் பயன்படலாம் என யாரும் நினைத்திருக்கவில்லை. டேவிட் ஹாரிசன், ராண்டி ஸ்ட்ராங், ரிச்சர்ட் மில்லர் உட்பட 13 அமெரிக்க விஞ்ஞானிகள் தான் அதைக் கண்டுபிடித்தனர்.

இவர்கள் எலிகளை வைத்து நடத்திய சோதனை படு சக்சஸ். அமெரிக்காவில் டெக்ஸாஸ், மிச்சிகன், மெய்ன் என மூன்று இடங்களில் வைத்து இந்த சோதனை நடத்தப்பட்டது. சோதனை நடத்தப்பட்ட எலிகளின் வயது 20 மாதங்கள். மனிதனுடைய ஆயுளுடன் ஒப்பிட்டுப் பேசினால் 60 வயது ! இந்த மருந்து எலிகளின் ஆயுளை 10 சதவீதம் முதல் 38 சதவீதம் வரை நீட்டித்திருக்கிறது !

எனது வாழ்நாளில் இப்படி ஒரு அறிவியல் கண்டுபிடிப்பு நிகழும் என நான் நினைத்துக் கூடப் பார்த்ததில்லை என பிரமித்துப் போய் பேசுகிறார் டாக்டர் ஆர்லான் ரிச்சட்ஸன்.

“முப்பத்து ஐந்து ஆண்டுகளாக மனிதனுடைய ஆயுளை நீட்டிக்கும் ஆராய்ச்சியில் ஈடுபட்டு வருகிறேன். இந்த ஆராய்ச்சி தான் என் மாபெரும் வெற்றி. மருத்துவ மொழியில் சொன்னால், இந்த மருந்து TOR எனும் புரோட்டீனின் வளர்ச்சியைத் தடுப்பதன் மூலம் மனிதனுடைய ஆயுளை நீட்டிக்கிறது. சாதாரணமாக நூறு வயது வாழக் கூடிய ஒருவனுக்கு மிக எளிதாக இன்னும் ஒரு பத்து இருபது ஆண்டுகளைப் பரிசாய்க் கொடுக்கக் கூடிய மாஜிக் தான் இது” என்கிறார் அவர்.

இந்த மருந்தை அப்படியே சாப்பிட முடியாது. உடலில் நோய் எதிர்ப்புச் சக்தி குறைந்து போய் விடும். அதனால் இப்போதைக்கு இங்கே இரண்டு வேலைகள் பாக்கி. ஒன்று ஆபத்தில்லாத மாத்திரை வடிவில் இதை தயார் செய்வது. இன்னொன்று ஆயுளை நீடிக்கும்போது ஆரோக்கியமும் கூடவே அதிகரிக்குமாறு பார்த்துக் கொள்வது. அதெல்லாம் ஜுஜூபி மேட்டர், இன்னும் கொஞ்ச நாட்களில் ஆயுள் நீட்டிக்கும் மாத்திரையைத் தயார் செய்து காட்டுவோம் பாருங்கள் என சிரிக்கின்றனர் விஞ்ஞானிகள்.

இந்தக் கண்டுபிடிப்பு உலகெங்கும் மாபெரும் சிலிர்ப்பை உண்டாக்கியிருக்கிறது.  “மாத்திரையின் மூலம் ஆயுளை அதிகரிக்கலாம் என நிரூபிக்கப்பட்ட முதல் நம்பத்தகுந்த சோதனை முடிவு தான். அதிலும் வயதானவர்களுக்குக் கூட இந்த மருந்தைக் கொடுக்கலாம் என்பது ரொம்பவே ஸ்பெஷல்”  என்கிறார் டெக்ஸாஸ் பல்கலைக்கழக ராண்டி ஸ்டிராங்.

“இந்த ஆராய்ச்சி உண்மையிலேயே பிரமிக்க வைக்கிறது. ஆயுளுடன் கூடவே மனிதனுடைய ஆரோக்கியத்தையும் நீட்டித்தால் சூப்பர் தான்” என்கிறார் ஆக்ஸ்போர்ட் பல்கலைக்கழக ஆராய்ச்சியாளர் டாக்டர். லின் கோக்ஸ். இந்த ஆராய்ச்சி வெகு அற்புதம். இன்னும் தெளிவாக, விரிவாக இது ஆராயப்படவேண்டும் என்கிறார், சியாட்டலிலுள்ள வாஷிங்டன் பல்கலைக்கழக துணை பேராசிரியர் காபெர்லைன்.

விஞ்ஞானம் போகும் வேகத்தைப் பார்த்தால் “இதோ இந்த மாத்திரையைச் சாப்பிடுங்கள் உங்கள் ஆயுள் இன்னும் பத்து ஆண்டுகள் அதிகரிக்கும்” என விஞ்ஞானம் சொல்லும் நாள் வெகுதூரத்தில் இல்லை என்றே தோன்றுகிறது.

நன்றி : ஜூனியர் விகடன்

Paranormal Activity : எனது பார்வையில்…

பேராண்மை நாடகத்தைப் பார்த்து போரடித்துப் போய் ஏதாவது ஒரு சுவாரஸ்யமான படத்தைப் பார்க்கலாமே என கையில் எடுத்தேன் இந்தப் படத்தை.

“தனியே பார்க்காதீர்கள், பயப்படாமல் பார்க்கவே மாட்டீர்கள்” என ஏகப்பட்ட பில்ட் அப்கள் இந்தப் படத்துக்கு. வழக்கமாக திகில் படங்களை இராத்திரி நேரத்தில், காதில் ஹெட் போன் மாட்டி தனியே அமர்ந்து போர்ட்டபிள் டிவிடி பிளேயரில் பார்ப்பது தான் வழக்கம். இந்தப் படத்துக்கு வந்த பில்ட் அப்களைப் பார்த்து பயந்து போய் பகலிலேயே பார்த்தேன். அதுவும் நாலுபேரை துணைக்கு வைத்துக் கொண்டு !

ஒரு கதாநாயகன், ஒரு நாயகி. இருவரும் ஒரு தனிமையான வீட்டில் இருக்கிறார்கள் என இலக்கணம் மாறாத பேய் கதைக் களம். படம் முழுக்க இந்த இரண்டு பேர் மட்டும் தான். ஒரு டாக்டர் இரண்டு சீன் வந்து எட்டிப் பார்ப்பார், ஒரு தோழி இரண்டு வாட்டி வந்து ஹாய் சொல்லிப் போவாள். அவ்ளோ தான் ! கதாநாயகிக்கு ஒரு சிக்கல். அவளை ஒரு பேய் துரத்துகிறது. எட்டு வயதிலிருந்து ஆரம்பமானது இந்தப் பிரச்சினை. எங்கே போனாலும் அந்தப் பேய் துரத்தும் என்பது தான் இதன் முடிச்சு. அதனால் வீடு மாறி ஓடிப் போய் தப்பித்து விட முடியாது.

“பேய் என்னதான் பண்ணுதுன்னு பார்ப்போமே” என வீடியோ கேமரா தூக்குகிறான் காதலன் மிக்கா. அவன் ஒரு ஹைடெக் ஹீரோ. படுக்கை அறையில் வீடியோ கேமரா வைத்து தூங்கும் போது என்ன நடக்கிறது என படம் பிடிக்கிறான். ( படுக்கை அறைக் காட்சிகள் நிறைந்த படம் என்று விளம்பரப் படுத்தலாம். பட்.. நோ ஜில்பான்ஸ் !! )

ஒவ்வொரு ராத்திரியாய் இந்த படம் பிடித்தல் நடக்கிறது. கொஞ்சம் கொஞ்சமாய் பேய் கைவரிசை காட்ட ஆரம்பிக்கிறது. ஐ..மீன் அதே கதவு ஆடறது, விளக்கு எரியறது, சத்தம் கேட்கறது இத்யாதிகள் தான். (போங்கடா பேய்களா, செத்தப்புறம் கூட வித்யாசமா யோசிக்க மாட்டீங்களா ) இராத்திரி நடக்கும் விஷயங்களைக் காலையில் லேப்டாப்பில் பார்க்கிறார்கள் ஹீரோவும், ஹீரோயினியும். குய்யோ முய்யோ என பயப்படுகிறார்கள் (கவனிக்க… பயப்படறதெல்லாம் அவர்கள் தான், நாம் அல்ல )

கிளைமேக்ஸ்ல ஏதோ பெரிய சமாச்சாரம் இருக்கும் என நாம் பரபரப்பாய் பார்த்துக் கொண்டிருக்கும் போதே கடைசி வந்து விடுகிறது. அது கடைசி என்பதையே “the end” எனும் வாசகத்தை வைத்துத் தான் புரிந்து கொள்ள வேண்டியிருக்கிறது ! ஒருவேளை நீங்கள் இந்தப் படத்தைப் பார்க்க வேண்டும் என புத்தாண்டு தீர்மானம் எடுத்திருக்கலாம் அதனால் அந்த முடிவை நான் சொல்லவில்லை.

இதை லோ பட்ஜெட் படம் என்று சொல்கிறார்கள். அப்படிச் சொல்வதே லோ பட்ஜெட் படங்களைக் கேவலப் படுத்துவதற்குச் சமம். செலவு நம்ம ஊர் குறும்படத்துக்கு ஆகும் செலவை விடக் குறைவு. வெறும் 15,000 டாலர்களாம். அதை வைத்துக் கொண்டு இதற்கு மேல் எதுவும் எடுக்க முடியாது தான். படு கேவலமான எடிட்டிங். உப்பு சப்பில்லாத டயலாக். சுவாரஸ்யமற்ற காட்சிகள், பெயருக்கு இசை என இழுவையோ இழுவை.

ஒரு மில்லி கிராம் அதிர்ச்சியைக் கூட தராத இந்தப் படத்தை எப்படி ஹிட் ஆக்கினார்கள் ? எப்படி 120 மில்லியன் டாலர்கள் சம்பாதித்தார்கள் என்பது இயக்கிய ஓரென் பேலிக்கே வெளிச்சம்.

ஒரே ஆறுதல் படம் 80 நிமிடங்களில் முடிந்து விடுவது தான்.

 பிடித்திருந்தால் வாக்களிக்கலாமே…

ரியலா ? ரியாலிடி ஷோ ?

பாஸ்டியனுக்கு வயது 18. அவனுடைய காதலி தமாராவுக்கு வயது 16. அவர்களுடைய கையில் தவழ்கிறது பதினோரு மாத கைக் குழந்தை ஒன்று. இருவரும் அந்த குழந்தையைக் கவனித்துக் கொள்கிறார்கள், “ஆய்” போனால் கழுவுகிறார்கள், அழுதால் உணவு கொடுக்கிறார்கள், குளிப்பாட்டுகிறார்கள், தாலாட்டுகிறார்கள்.

சரி.. இதில் என்ன ஆச்சரியம் என்கிறீர்களா ?

அவர்கள் இருவருக்கும் திருமணம் ஆகவில்லை. அவர்கள் கையில் இருக்கும் குழந்தைக்கும் அவர்களுக்கும் எந்த சம்பந்தமும் இல்லை. 

குழப்பமாய் இருக்கிறதா ? குழம்ப வேண்டாம். இந்த கேலிக்கூத்து நடப்பதெல்லாம் தொலைக்காட்சிகள் போட்டி போட்டு நடத்தும் இந்த “ரியாலிடி ஷோ” க்களில் தான்.

இந்த நிகழ்ச்சி நடப்பது ஜெர்மனியில். “”The Baby Borrowers” எனும் இந்த  ஷோ வில் ஒரு பதின் வயதுக் காதல் ஜோடிக்கு ஒரு குழந்தை கொடுக்கப்படுகிறது. உண்மையான குழந்தை !. அந்தக் குழந்தைக்கு நான்கு நாட்கள் அவர்கள் பெற்றோராய் இருந்துப் பார்த்துக் கொள்ள வேண்டும் என்பதே அந்த ஷோ வின் மையக்கரு. அதை ஷோ தயாரிப்பாளர்கள் முழுமையாய் படம் பிடித்து தொலைக்காட்சியில் ரியாலிடி ஷோவாக ஒளிபரப்புவார்கள்.

“குழந்தை வளர்ப்பு” எனும் உன்னதமான ஒரு பணி கூட இன்றைக்கு மலினப்பட்டு, வியாபாரப் பொருளாக்கப் பட்டிருப்பதை வேதனையோடு பார்க்க வேண்டியிருக்கிறது.

தாய்க்கும் குழந்தைக்குமான புனிதமான உறவைத் தடுத்து, கேமராவின் முன்னால் நான்கு நாட்கள் சம்பந்தமே இல்லாத ஏதோ இரண்டு பேருடைய கைகளில் ஏதுமறியாக் குழந்தையை ஒப்படைக்கும் பரிதாபமான நிலைக்கு ரியாலிடி ஷோக்கள் நம்மைக் கொண்டு வந்து விட்டதை அதிர்ச்சியுடன் ஒத்துக் கொள்ள வேண்டியிருக்கிறது.

இதே போன்ற ரியாலிடி ஷோ க்கள் உலகெங்கும் இன்றைக்கு புற்றீசல் போல குவிகின்றன. இங்கிலாந்திலுள்ள “பிக் பிரதர்” ஷோ வைப் பற்றி எல்லோருக்கும் தெரிந்திருக்கும். காரணம் அதில் சில்பா ஷெட்டி கலந்து கொண்டதும், இனவெறிப்பேச்சை அவருக்கு எதிராய் நடிகை ஜேட் பேசியதும் தான்.

பிரபலமான 12 நபர்களை ஒரு பெரிய வீட்டில் தங்க வைத்து, அவர்களுடைய தினசரி நடவடிக்கைகளை கேமராவில் பதிவு செய்து ஒளிபரப்புவது இந்த ஷோ. ஒவ்வோர் வாரமும் அந்த குழுவிலிருந்து ஒவ்வொரு நபர் வெளியேற்றப்படுவார். ஒருவர் பின் ஒருவராக எல்லோரும் வெளியேறிய பின் கடைசியில் மிஞ்சும் நபர் வெற்றி பெற்றதாக அறிவிக்கப்படுவார். இதுவே இந்த பிக் பிரதர் நிகழ்ச்சியின் கரு.

அடுத்தவன் வீட்டை ரகசியமாய் எட்டிப் பார்க்கும் நாகரீகமற்ற மனநிலையோ, அல்லது அடுத்தவன் அவமானப்படுத்தப்படும் போது மகிழ்ச்சியடையும் சைக்கோ மனநிலையோ தான் இந்த ஷோவைப் பார்க்கும் போதும் எழுகிறது. ஆனால் இந்த ஷோவுக்கு ஏகப்பட்ட வரவேற்பு.

அமெரிக்காவில் எதற்கெடுத்தாலும் ரியாலிடி ஷோ தான். அதுவும் விதவிதமான வடிவங்களில், வித விதமான வகைகளில். உதாரணமாக பழக்கமே இல்லாத சிலரை ஒரே இடத்தில் கூட்டிச் சேர்த்து ஏதேனும் செய்யச் சொல்வது, எங்கேனும் தங்கச் சொல்வது, என சில ரியாலிடி ஷோக்கள் நடக்கின்றன.

நடிகைகளை வைத்தும், அவர்களுடைய தினசரி வாழ்க்கையை வைத்தும் நடத்துகின்ற ரியாலிடி ஷோக்கள் அமெரிக்காவில் மிகப் பிரபலம். தொட்டதுக்கெல்லாம் ரியாலிடி ஷோ நடத்தும் மேலை நாடுகளில் டேட்டிங் போவதற்கெல்லாம் கூட ரியாலிடி ஷோ இருக்கிறது.

“சீட்டர்ஸ்” எனும் ரியாலிடி ஷோ ஏமாற்றுத் தனங்களை வெளிப்படுத்துவதற்காக என கிளம்பி பல குடும்பங்களின் நிம்மதியை குலைத்திருக்கிறது. கணவன் மனைவியிடையே சந்தேகம் ஏற்பட்டால் கூட அவர்களில் ஒருவரை ரகசியமாய் கண்காணித்து படமெடுத்து அதை உலகுக்கே காண்பிப்பது இந்த ஷோவின் குறிக்கோள்.

இதெல்லாம் வெளிநாட்டுச் சமாச்சாரங்கள் என்றால், இந்தியாவில் நிலமை இன்னும் மோசம். மேலை நாட்டில் மழையடித்தால் இந்தியாவுக்குக் காய்ச்சலடிக்கும் எனும் நிலமையே இங்கே. எல்லாவற்றையும் வால் பிடித்துப் பார்க்கும் ரியாலிடி ஷோக்கள் இந்தியாவிலும் நிரம்பிவிட்டது.

வாரம் முழுதும் ஏதேனும் ஒரு ரியாலிடி ஷோ என தொலைக்காட்சிகள் போட்டி போட்டுக் கொண்டு நிகழ்ச்சிகளை கொட்டுகின்றன. ஒரு தொலைக்காட்சியில் ஒரு நடன நிகழ்ச்சி துவங்கினால் உடனே அனைத்து தொலைக்காட்சிகளும் அதன் வால் பிடித்து அதே போன்ற ஒரு நிகழ்ச்சியை ஆரம்பித்து விடுகின்றன.

ஏதேனும் ஒரு தொலைக்காட்சி ஒரு உரையாடல் நிகழ்ச்சியை நடத்தினால் அதே போன்ற நிகழ்ச்சி உடனே மற்ற தொலைக்காட்சிகளின் நிகழ்சிப் பட்டியலிலும் இடம் பெற்று விடுகிறது.  பாட்டு பாடுவது, நகைச்சுவை சொல்வது, விளையாட்டுகள் நடத்துவது என எல்லா முகங்களுடனும் நடக்கின்றன ரியாலிடி ஷோக்களின் தாண்டவம்.

வட இந்தியத் தொலைக்காட்சி ஒன்று சுயம்வரம் நிகழ்ச்சியை நடத்துகிறது. திருமணம் என்பது எத்தனை முக்கியமானது, அது நீண்டகால உறவின் அஸ்திவாரம் என்பதையெல்லாம் கணக்கில் கொள்ளாமல் ஷோவிலேயே திருமணம் முடிவு செய்யப்படும் கேலிக் கூத்தெல்லாம் இன்றைக்கு பரவிக் கொண்டிருக்கின்றன.

கொஞ்ச நாட்களுக்கு முன் குழந்தைகளுக்கான ஒரு பாடல் ஷோ வில் தோற்றுப் போன குழந்தைகளெல்லாம் அழுது கொண்டும், அவமானப்பட்டும் மேடையிலிருந்து இறங்கி வரும் நிகழ்ச்சியைப் பார்த்தபோது மனம் துடித்துப் போனது.

தோல்வி என்பது அவமானகரமானது, வெற்றி மட்டுமே அங்கீகரிக்கப்படக் கூடியது எனும் தவறான சிந்தனையை இந்த ரியாலிடி ஷோக்கள் அவர்களுடைய மனதில் அழுத்தமாய் எழுதியிருக்கின்றன. குழந்தைகள் எத்தனை கவனமாய் வளர்க்கப்பட வேண்டியவர்கள். எத்தனை கவனமாய் கையாளப்படவேண்டியவர்கள். அவர்களை சபையிலே நிற்கவைத்து அவமானப்படுத்துவது எந்த வகையில் நியாயம்.

குழந்தைகள் இத்தகைய ஷோக்களில் பங்குபெறும் போது மிக அதிக அளவில் மன அழுத்தமடைகிறார்கள். அவர்களுடைய தன்னம்பிக்கை, எதிர்காலம் எல்லாமே உடைந்து சுக்கு நூறாகிப் போகக்கூடிய வாய்ப்பு இந்த ரியாலிடி ஷோக்களால் உருவாகிறது. இப்போது சொல்லுங்கள், ஷோ தயாரிப்பாளர்கள் செல்வம் சேர்க்க உங்கள் செல்வங்களின் வாழ்க்கையைப் பலியிடுவீர்களா ?

இந்த ரியாலிடி ஷோக்களுக்கு நீதிபதிகளாய் இருப்பவர்களைப் பற்றி சொல்லவே வேண்டாம். அவர்கள் ஏதோ எல்லாம் தெரிந்த கடவுளின் குளோனிங் வடிவங்களாகவே தங்களை பாவித்துக் கொள்கிறார்கள். நேர்மையான விமர்சனம் சொல்கிறேன் எனும் சாக்கில் அவர்கள் அவிழ்த்து விடும் தத்தக்கா பித்தக்கா தத்துவங்களும், நேரடித் தாக்குதலும் பங்கு பெறுபவர்களை மன உளைச்சலுக்கு ஆளாக்கி விடுகின்றன.

கேரளாவில் கொடிகட்டிப் பறக்கும் “பாடகர்” நிகழ்ச்சிகள் ஏதும் சிறந்த பாடகர்களை உருவாக்குவதில்லை என வெளிப்படையாகவே குற்றம் சாட்டுகிறார் கேரள அரசின் விருது பெற்ற இசையமைப்பாளர் எம்.ஜெயசந்திரன்.

தேவையற்ற ரியாலிடி ஷோக்களில் மாணவர்கள் கலந்து கொள்வதற்கு பள்ளிக்கூடங்களும் தடை விதிக்கவேண்டும். கல்வியுடன் கலாச்சாரம் ஒழுக்கம் இவற்றைக் கற்றுக் கொடுக்க வேண்டிய கடமை பள்ளிக்கூடங்களுக்கு உண்டு.

இன்னொரு முக்கியமான விஷயம், இமை கொட்டாமல் பரபரப்புடன் நீங்கள் பார்க்கும் வாக்கு வாத நிகழ்ச்சிகள் பெரும்பாலும் திரைமறைவில் செய்யப்படும் தீவிர ஒத்திகைக்குப் பின் நடத்தப்படும் நாடகங்களே!

ஒரு தலைப்பைக் கொடுத்து அதற்கு என்னென்ன பதில்கள் சொல்லப்பட வேண்டும், எப்படி உணர்ச்சி பூர்வமாக பேசவேண்டும், எப்படி கை அசைக்கவேண்டும் என்பன உட்பட எல்லாமே முன்னமே அட்சரம் பிசகாமல் செய்து பார்க்கப்படுகிறது.

அப்படி ஒளிபரப்பாகும் அரங்கங்களைத் தான் நாம் “அடடா… ஆஹா… ஐயோ…அப்படியா..” என்றெல்லாம் உணர்ச்சி வசப்பட்டுப் பார்க்கிறோம் என்பதை உணர வேண்டும்.

நமது நேரத்தை விழுங்கி, நமது பணத்தை விழுங்கி, நமது குழந்தைகளின் நிம்மதியை விழுங்கி கூடவே நமது கலாச்சாரத்தையும் விழுங்குகின்றன இத்தகைய ஷோக்கள்.

சினிமாவின் குத்துப் பாட்டு ஓடுகிறது. குழந்தைகள் அந்தப் பாடலுக்கு ஆண் குழந்தைகளுடன் சேர்ந்து பெரியவர்களைப் போல ஆடுகிறார்கள். அவர்களுடைய உடைகளிலும் மழலைத் தன்மையை மறைத்து சினிமா நடிகர்களை நகலெடுக்கும் உத்வேகம் !

எப்படித் தான் இப்படிப்பட்ட நிகழ்ச்சிகளுக்கு தங்கள் குழந்தைகளை பெற்றோர் அனுப்பி வைக்கிறார்களோ என நினைக்கத் தோன்றுகிறது. குழந்தைகளுக்கான நிகழ்ச்சி, இங்கே குழந்தைகளுக்கான நிகழ்ச்சியாய் இருப்பதில்லை. பெரியவர்களுடைய நிகழ்ச்சியை சிறுவர்கள் நடத்துவது போல இருக்கிறது.

ஒவ்வோர் போட்டியிலும் பார்வையாளர்களை எஸ்.எம்.எஸ் அனுப்ப ஊக்குவித்து அதன் மூலம் கணிசமான வருவாயை இந்த நிகழ்ச்சித் தயாரிப்பாளர்கள் பெற்று விடுகிறார்கள். என்பது இங்கே கவனிக்கத் தக்கது. எஸ் எம் எஸ் அனுப்புபவர்களில் சிலருக்கு பரிசு, பங்கு பெறும் வாய்ப்பு என்றெல்லாம் வலை விரிப்பது நம் பையில் இருக்கும் காசை லாவகமாய்ப் பிடுங்கிக் செல்ல மட்டுமே.

கவர்ச்சிகரமாக ஆரம்பித்து டி.பி.ஆர் ரேட்டிங்கை எகிற வைத்து, அதன் மூலம் விளம்பரங்களில் கோடிக்கணக்கில் சுருட்டுவதே இந்த ரியாலிடி ஷோக்களின் உள் நோக்கம். மற்றபடி நீங்கள் நினைப்பது போல தமிழகத்திலுள்ள மக்களின் திறமையை உலகுக்கு உணர்த்துவதல்ல.

வாழ்க்கையின் அர்த்தத்தையும், புனிதத்தையும் இந்த ரியாலிடி ஷோக்கள் கொன்று குவிக்கின்றன. மக்களுடைய ரசனையும் இந்த ஷோக்களினால் அகல பாதாளத்தில் கொன்று குவிக்கப்படுகிறது. அடுத்த முறை தொலைக்காட்சியில் ஒரு ஷோ ஓடும் போது “இது கதை வசனம் எழுதப்பட்டு நிகழ்த்தப்படும் நிகழ்ச்சி“ என்பதை நினைவில் கொள்ளுங்கள்.

நன்றி : பெண்ணே நீ…

பிடித்திருந்தால் வாக்களியுங்கள்….

பொங்கல் : தெரிந்ததும், தெரியாததும்…

தமிழர்களின் கலாச்சார அடையாளமாய் நிமிர்ந்து நிற்கிறது பொங்கல் விழா. தமிழகம், இலங்கை போன்ற தமிழர் வாழும் நாடுகளில் மட்டுமல்லாமல் தமிழர்கள் புலம்பெயர்ந்துள்ள இடங்களிலும் பொங்கல் விழாவினைக் கொண்டாடி தங்கள் இன, சமூக, கலாச்சார, வாழ்வியல் அடையாளங்கள் தொலைந்து போகாமல் பார்த்துக் கொள்கிறார்கள். சுமார் ஐம்பது நாடுகளில் இன்று தமிழர்கள் தங்கள் விழாவைக் கொண்டாடுகிறார்கள்.

சங்ககாலமான கி.மு இருநூறுக்கும் கி.பி முன்னூறுக்கும் இடைப்பட்ட காலத்திலேயே தமிழர்கள் பொங்கல் விழா கொண்டாடியதாக நம்பப்படுகிறது. அறுவடை விழாவாகக் கொண்டாடப்படும் பொங்கல், தங்களுக்கு நல்ல விளைச்சலைக் கொடுத்த இயற்கைக்கும், இறைவனுக்கும் நன்றி செலுத்தவும், தங்கள் கவலைகளை விலக்கி புதிய பயணத்தைத் துவங்கவும் கொண்டாடப்படுகிறது. மதங்களுக்கு அப்பாற்பட்ட ஒற்றுமையின் விழாவாகக் கொண்டாடப்படும் இந்த விழா தன்னகத்தே நான்கு விழாக்களைக் கொண்டிருக்கிறது.

தமிழகத்தில் பொங்கல் விழா கொண்டாடப்படும் அதே நாளில் இந்தியா முழுவதும் அறுவடை விழா பல பெயர்களில் கொண்டாடப்படுகிறது. வட இந்தியாவில் லகோரி என்றும், அஸ்ஸாமில் போகாலி பிகு என்றும், உத்தர பிரதேசம், குஜராத், மஹாராஷ்டிரா மற்றும் பீகாரில் மகர் சங்கராந்தி என்றும், ஆந்திராவில் போகி என்றும் இந்த விழா கொண்டாடப்படுகிறது. கேரளாவில் இந்த நாளில் தான் மலையில் மகர ஜோதி ஏற்றப்பட்டு வழிபடப்படுகிறது.

தை நீராடல் என்னும் பொங்கல் விழாவின் முன்னோடியைக் குறித்த செய்திகள் கி.பி நான்காம் நூற்றாண்டு – எட்டாம் நூற்றாண்டைச் சேர்ந்த இலக்கியங்களான ஆண்டாள் திருப்பாவை, திருவெம்பாவை போன்ற இலக்கியங்களில் குறிப்பிடப்பட்டுள்ளன.

பொங்கல் விழா தமிழர் விழாவாக பெருமையுடன் கொண்டாடப்படும் அதே வேளையில் பொங்கல் விழாவின் அர்த்தத்துடனான விழாக்கள் உலகெங்கும் கொண்டாடப்படுகின்றன.

ஆதிகாலத்திலேயே விவசாயிகள் அறுவடை விழா கொண்டாடுவதை வழக்கமாகக் கொண்டிருந்தார்கள். இதற்குப் பல காரணங்கள் இருந்தன. பயிர்களில் ஆவிகள் இருப்பதாகவும் அவை மனம் குளிர்ந்தால் விளைச்சல் அமோகமாகவும், இல்லையேல் குறைவாகவும் இருக்கும் என்று மக்கள் நம்பினார்கள். அதுபோல ஒவ்வொரு பயிருக்கும் ஒவ்வொரு காவல் தேவதை இருப்பதாகவும் அதனிடம் வேண்டுதல் செய்தால் அறுவடை அதிகரிக்கும் என்றும் நம்பினார்கள். அறுவடை செய்யும்போது பயிர்களிலுள்ள ஆவி கோபமடையும் என்பதும், அந்தக் கோபத்தை குறைக்க அவற்றுக்குப் படையல் செலுத்த வேண்டும் என்பதும் கூட ஆதியில் இருந்த நம்பிக்கைகளில் ஒன்று.

இதனடிப்படையில் தான் ஆதியில் அறுவடை விழாக்கள் இயற்கைக்கும், இயற்கையைப் பராமரிக்கும் தெய்வங்களுக்கும் ஆனந்தமளிப்பதற்காக நடத்தப்பட்டன. கிரேக்க, ரோம, எகிப்திய, எபிரேயக் கலாச்சாரங்கள் பல ஆயிரம் ஆண்டுகளுக்கு முன்பே அறுவடை விழா கொண்டாடியிருக்கின்றன.

கொரியாவில் அறுவடை விழா சூசாக் என்னும் பெயரில் கொண்டாடப்படுகிறது. செப்டம்பர், அக்டோ பர் மாதங்களில் கொண்டாடப்படும் இந்த விழா நன்றி விழாவாக கொரிய மக்களால் கொண்டாடப்படுகிறது.

ஜப்பானியர்கள் நவம்பர் மாதத்தில் டோ ரி-னோ-இச்சி என்னும் பெயரில் அறுவடை விழா கொண்டாடுகிறார்கள். இரவு முழுதும் ஆட்டம் பாட்டமாய் இந்த விழா குதூகலமூட்டுகிறது.

அமெரிக்காவில் நவம்பர் மாதத்தின் நான்காவது வியாழக் கிழமை நன்றி செலுத்தும் விழா கொண்டாடப்படுகிறது. சுமார் நானூறு ஆண்டுகளுக்கு முன்பே ஆரம்பிக்கப்பட்ட இந்த விழா விளைச்சலுக்காக இறைவனுக்கு நன்றி செலுத்தும் விழாவாகக் கொண்டாடப்படுகிறது. இந்த விழாவில் மக்கள் வாழ்த்துக்கள் பரிமாறிக் கொள்கிறார்கள். அமெரிக்கா வழி செல்லும் கனடாவில் அக்டோ பர் மாதம் இரண்டாவது திங்கட் கிழமை இந்த விழா கொண்டாடப்படுகிறது.

சைனாவில் மக்கள் ஆகஸ்ட் நிலா விழா கொண்டாடுகிறார்கள். இந்த விழாவின் முக்கிய உணவான மூன்கேக்குகளை மக்கள் பகிர்ந்து, பரிசளித்து மகிழ்கிறார்கள்.

வியட்நாமில் – தெட் திரங் து என்னும் பெயரில் எட்டாவது லூனார் மாதத்தின் பதினைந்தாம் நாளில் கொண்டாடப்படுகிறது. பெற்றோர் தங்கள் விவசாய காலம் முடிந்து குழந்தைகளுடன் ஆனந்தமாய் ஒன்றித்திருக்கும் விழாவாக இந்த விழா அமைந்து குழந்தைகளை மையப்படுத்துகிறது.

இஸ்ரேலில் எபிரேய மாதமான திஸ்ரியின் பதினைந்தாவது நாள் சுக்கோத் விழா கொண்டாடப்படுகிறது. அறுவடை விழாவான இது நன்றி தெரிவித்தல் விழாவாகவும் கொண்டாடப்படுகிறது. சுமார் மூவாயிரம் ஆண்டுகளாக யூதர்கள் இந்த அறுவடை விழாவைக் கொண்டாடி வருகிறார்கள். இந்த விழா இன்று கிறிஸ்தவர்களாலும் கொண்டாடப்படுகிறது.

ஆப்பிரிக்காவில் யாம் என்னும் பெயருடன் இந்த விழா நடைபெறுகிறது. இந்த விழா ஆப்பிரிக்காவில் சில பகுதிகளில் மூன்று நாட்கள் நடக்கிறது. இறந்து போன உறவினர்களை நினைவு கூரும் நிகழ்வுடன் ஆரம்பிக்கும் இந்த விழா நல்ல விளைச்சலைத் தந்த இறைவனுக்கு, இயற்கைக்கும் நன்றி செலுத்துகிறது. இரட்டையர்கள், மூவர் முதலானோர் இறைவனின் சிறப்புப் பரிசுகளாகக் கருதப்பட்டு இந்த விழாவில் பெருமைப்படுத்தப் படுவதுண்டு.

ரோமர்கள் அக்டோ பர் நான்காம் நாள் செரிலியா என்னும் விழாவைக் கொண்டாடுகிறார்கள். இது தங்களுக்கு நல்ல விளைச்சலைக் கொடுத்ததற்காக சோளப் பயிரின் பெண் தெய்வமான சீரஸ் என்பவருக்கு நன்றி செலுத்தும் விழா. தங்கள் தெய்வத்துக்கு புதிய காய்கற்஢கள், பழங்கள் , பன்றி போன்றவற்றைப் படைத்து, இசை, விளையாட்டு, நடனம் என விழாவை கொண்டாடுகிறார்கள். வினாலியா என்றொரு விழாவையும் இவர்கள் கொண்டாடுகிறார்கள். தங்கள் திராட்சைத் தோட்டங்களில் விளையும் முதல் திராட்சைக் குலையை இறைவனுக்குப் படைத்து அந்த விளைச்சல் காலத்தை ஆசீர்வதிக்க ஆண்டவனை வேண்டுகிறார்கள்.

எகிப்தியர்கள் விளைச்சல் விழாவில் காய்கறிகள் மற்றும் வளம் தரும் கடவுளான மின் வழிபாடு பெறுகிறார். இசை, நடனம் என கோலாகலப் படுகிறது எகிப்தியர்களின் இந்த அறுவடை விழா.

ஆஸ்திரேலியாவிலும் ஏப்பிரல் மாத கடைசியில் திராட்சை அறுவடை விழாவும், ஜனவரி மாதத்தில் லாவண்டர் மலர் அறுவடை விழாவும், மார்ச் மாதத்தில் ஆப்பிள் அறுவடை விழாவும், டிசம்பர் – ஜனவரி காலத்தில் கோதுமை அறுவடை விழாவும் கொண்டாடப்படுவது பல இடங்களில் வழக்கத்தில் உள்ளது.

ஜெர்மனியில் அறுவடை விழா அக்டோ பர்விழா என்று அழைக்கப்படுகிறது. இந்த விழா திராட்சை அறுவடையின் கடைசியில் கொண்டாடப்படுகிறது. அக்டோ பர் மாதத்தின் முதல் ஞாயிற்றுக் கிழமை இந்த விழா கொண்டாடப்படுகிறது. வண்ண மயமான பேரணிகளும், நடனங்களும் இந்த விழாவில் முக்கிய இடம் பிடிக்கின்றன.

மலேஷியாவில் ஜூன் மாதம் இரண்டாம் நாள் அறுவடை விழா கொண்டாடப்படுகிறது. அரிசி விளைச்சலுக்காக கடவுளுக்கு நன்றி செலுத்தும் விழாவாக இந்த விழா கொண்டாடப்படுகிறது. புதிய அரிவாள்களுடன் அறுவடை செய்து, வயல்வெளிகளில் கூடி இந்த விழாவை இவர்கள் கொண்டாடுகிறார்கள்.

இங்கிலாந்தில் அறுவடைவீடு என்னும் பெயரில் இந்த விழா கொண்டாடப்படுகிறது. செப்டம்பர் மாதம் கொண்டாடப்படும் இந்த விழாவில் பழங்களையும், காய்கறிகளையும் இறைவனுக்குப் படைக்கும் விழாவாகவும், நன்றி செலுத்தும் விழாவாகவும் இது கொண்டாடப்படுகிறது. ஆலயங்களை எல்லாம் அலங்கரித்து மக்கள் அறுவடை செழிக்கவேண்டுமென்று இறைவனை வேண்டுகிறார்கள்.

இவ்வாறு உலகெங்கும் கொண்டாடப்படும் அறுவடை விழாக்கள் இயற்கையோடு மனிதனுக்கு உரிய தொடர்பையும், இறைவனோடும் சக மனிதனோடும் மனிதன் கொள்கின்ற உறவையும் வெளிப்படுத்துபவையாக திகழ்கின்றன. எந்த ஒரு விழாவும் வெறும் அடையாளத்தை மட்டும் அணிந்து கொண்டு அதன் அர்த்தத்தை இழந்து விடுமெனில் பயனற்றதாகி விடுகிறது. விழாக்கள் அதன் அர்த்தங்களை அறிந்து கொள்ள அழைப்பு விடுக்கின்றன. மனிதனோடும், இயற்கையோடும், இறைவனோடும் கொண்டுள்ள உறவை உறுதிப்படுத்தவும், சீரமைக்கவும் இந்த விழாக்கள் நமக்கு அழைப்பு விடுக்கின்றன.

– தமிழ் ஓசையில் வெளியானது.

தமிழிஷில் வாக்களிக்க….

மறுமணம் செய்யப் போகிறீர்களா – டிப்ஸ் இதோ !

சந்தி உற்சாகமாக இருந்தாள். மாலை நேர சன்னலின் வழியே வழக்கமான சூரியன் இன்று ரொம்பவே அழகாய்த் தெரிந்தான். காரணம் அருகில் கணவன் ரமேஷ்.

வசந்திக்கு இது இரண்டாவது ஹனிமூன். முதல் கணவன் சங்கருடன் ஆறு மாதங்கள் படாத பாடுபட்டு இப்போது தான் விடுதலை. எதற்கெடுத்தாலும் சந்தேகம், எதற்கெடுத்தாலும் சண்டை என கவலையில் போனது அவளுடைய முதல் வாழ்க்கை. விவாகரத்து வாங்கி எல்லாவற்றையும் முடித்து வைப்பதற்குள் போதும் போதுமென்றாகிவிட்டது. இப்போது புதிய வாழ்க்கை, புதிய கனவுகள் என அவளுடைய சிந்தனைகள் பறந்து கொண்டிருந்தன.

திடீரென வந்தது அந்த தொலைபேசி அழைப்பு. முதல் கணவனிடமிருந்து. தான் தவறு செய்தது போல மறுமுனையில் சங்கர் கண்ணீர் விட்டான். இவளைப் பிரிந்து வாழ முடியாது என புலம்பினான். அவனுடைய குரல் அவளை அசைத்தது. அவளுடைய உற்சாகமெல்லாம் வடிந்து போக சட்டென அமைதியானாள்.

“யார் போன்ல” ரமேஷ் கேட்டான்.

“அ..அவர் தான்… சங்கர்” குரல் தடுமாறியது, கண்கள் கலங்கின.

“ஓஹோ… பழைய புருஷன் ஞாபகம் அழ வைக்குதோ ? அப்புறம் எதுக்கு இன்னொரு கல்யாணம் பண்ணிகிட்டே” ரமேஷின் குரலில் கோபம் குதித்தது.

அந்த ரம்மியமான மாலைப் பொழுது வசந்தியின் புதிய வாழ்க்கையில் ஒரு கீறலாய் விழுந்து விட்டது. ரமேஷின் தேவையற்ற சந்தேகப் பார்வையும் வசந்தியின் மீது விழ அவளுடைய புதிய திருமண வாழ்க்கையும் நொண்டியடிக்க ஆரம்பித்தது. 

“கல்லானாலும் கணவன் புல்லானாலும் புருஷன்” என்பதெல்லாம் ரொம்பவே பழசாகிப் போச்சு. “உள்ளார்ந்த நேசம் இல்லையேல் டைவர்ஸ்” என்பது தான் இப்போதைய வாழ்க்கை.

மண முறிவுகளை இரண்டு கோணத்தில் பார்க்கலாம். ஒரு கோணத்தில் மண முறிவுகள் பலவீனமான குடும்ப உறவின் வெளிப்பாடுகள். ஒருவருக்கொருவர் விட்டுக் கொடுத்தல், அனுசரித்துப் போதல், அகந்தை களைதல் எனும் பல விஷயங்களில் நிகழும் தோல்வி. அர்ப்பணித்தல் இல்லாததன் அடையாளம். 

இன்னொரு கோணத்தில் மணமுறிவுகள் தைரியத்தின் சின்னங்களாகவும் பார்க்கலாம். இது ஒரு வகையில் பெண்களின் தன்னம்பிக்கையின் வெளிப்பாடுகள். சமூகத்தின் பல துறைகளில் பட்டையைக் கிளப்பும் பெண்கள் வீடுகளில் அங்கீகாரம் கிடைக்காவிடில் என்ன செய்வது ?. குடும்பம் என்பது முதலாளி தொழிலாளி சமாச்சாரமல்ல. கணவன் மனைவி உறவு என்பது சர்வாதிகார – அடிமை உறவு நிலையுமல்ல. எனவே உண்மையான புரிதல் இல்லையா ? பிரிதலே நல்லது என பெண்களும் பேச ஆரம்பிக்கின்றனர்.  

ஆனால் சமூகம் தனது வழக்கமான புராணத்தைத் தான் பாடிக் கொண்டிருக்கிறது. ரொம்பவே நாசூக்காக, ஹைடெக் வாசனையுடன். “பொண்ணு சரியில்லே” என்பது தான் பெரும்பாலான டைவர்ஸ்களின் முனகல்கள். இதில் எவ்வளவு சதவீதம் உண்மை என்பது கணவர்களின் மனசாட்சி சொல்லும். சமூகத்தின் நரம்புகளில் இன்னும் ஆணாதிக்க ரத்தம் தான் வேகமாகப் பாய்கிறது என்பதன் உதாரணம் இது. ஆண்களின் இயலாமையை மறைக்க பெண்களின் நடத்தை மேல் ஒரு சந்தேகத்தைப் போட்டு விட்டால் போதுமே !  

சிலர் திருட்டுக் காதலுக்காக அழகான குடும்ப வாழ்க்கையை சிதைக்க நினைப்பார்கள். இது மன்னிக்க முடியாத குற்றம். மறு மணங்கள் மரணங்களினாலோ, சரி செய்ய முடியாத சிக்கல்களாலோ நிகழலாம். ஆனால் திருட்டுத் தனமான ஆசைகளுக்காக சிதைவது அவலம். அதுவும் குழந்தைகள் பிறந்தபின் இத்தகைய சூழல் ஏற்பட்டால் அது குழந்தைகளின் அமைதியான வாழ்க்கையை சின்னாபின்னமாக்கிவிடும். கூடவே அந்த குற்ற உணர்வு உங்களையும் துரத்தித் துரத்தி நிம்மதியற்ற எல்லைக்குள் தள்ளி விடும்.

மணமுறிவு எனும் முடிவை யாரும் ஒரு நிமிடத்தில் எடுத்து விடுவதில்லை. ஆற அமர யோசித்து வேறு வழியில்லையேல் மட்டுமே எடுக்கின்றனர். ஆனால் அதன் பின் நடக்கும் இரண்டாவது திருமணங்கள் பல வேளைகளில் பெண்களை ரொம்பவே நிலைகுலைய வைத்து விடுகிறது. ஏகப்பட்ட அவமானங்கள், நெருக்கடிகள், சிக்கல்களுக்கிடையே காலம் தள்ள வேண்டிய சூழலுக்குள் தள்ளி விடுகிறது. அதற்குக் காரணம் சரியான திட்டமிடல் இல்லாதது தான். மறுமணம் ரொம்ப நல்ல விஷயம். ஆனால் அப்படி ஒரு முடிவை எடுத்தபின் பெண்கள் செய்ய வேண்டியது என்ன என்பதில் தெளிவு ரொம்பவே அவசியம். மண முறிவு தரும் மனக் காயங்களும், சமூக சிக்கல்களும் அதீத கனம் வாய்ந்தவை.

இன்னொரு திருமணம் செய்து கொள்ளப் போகும் பெண்கள் கவனத்தில் கொள்ள வேண்டிய விஷயங்கள் பல உள்ளன.

  1. இரண்டாவது திருமணம் செய்து கொள்ள முடிவெடுத்தால் முதலில் செய்ய வேண்டியது முதல் திருமணத்தின் மிச்சம் மீதிகளை செட்டில் செய்வது தான். உங்கள் கணவரைப் பிரிந்து வாழ முடியுமா என்பதை முதலில் நீங்கள் முடிவு செய்ய வேண்டும். புதிய வாழ்க்கையில் பழைய நினைவுகள் உறுத்தாமல் இருக்க வேண்டியது ரொம்ப அவசியம். மன ரீதியாக முடிவெடுத்துவிட்டீர்களெனில் பாதி கிணறு தாண்டி விட்டீர்கள் என்று அர்த்தம். இப்போது சட்ட ரீதியான, குடும்ப ரீதியான, சமூக ரீதியான பிரிவுகளையும் நிகழ்த்தி விடுங்கள். உங்கள் புதிய வாழ்க்கை “ரொம்பப் புதிதாய்” இருக்க வேண்டியது ரொம்ப ரொம்ப அவசியம்.
  2. எல்லாத்துக்கும் காரணம் அவர் தான்” எனும் சிந்தனையைக் கொஞ்சம் ஒதுக்கி வையுங்கள். கடந்த திருமண பந்தம் எப்படிச் சென்றது என்பதை மிக மிக அமைதியாக ஆழமாக சிந்தியுங்கள். உங்கள் தரப்பில் என்னென்ன பிழைகள் இருந்தன என்பதை கொஞ்சமும் தயவு தாட்சண்யமில்லாமல், பாரபட்சமில்லாமல் அலசுங்கள். அந்த பிழைகளை அடுத்த முறை செய்யப் போவதில்லை எனும் முடிவை எடுங்கள். இது மிகவும் முக்கியம்.
  3. “என்னம்மா இப்படி ஆயிடுச்சே” என குசலம் விசாரிக்க வரும் பழைய உறவின் சொந்தங்கள், நண்பர்கள் எல்லோரையும் விலக்கி விடுங்கள். நீங்கள் புதைத்துப் போட்டவற்றை தோண்டி எடுத்து வேடிக்கை காட்ட பலரும் விரும்புவார்கள். உங்கள் புதிய வாழ்க்கையின் தோல்வி பழைய உறவுகளுக்கு ரொம்பவே உங்கள் பழைய சிந்தனைகளையும், வலிகளையும் கிளறும் எந்த உறவையும் அனுமதிக்காதீர்கள்.
  4. முதல் திருமணத்தில் நீங்கள் இழந்ததாய் நினைத்ததைப் பெறப் போகும் வாழ்க்கை தான் இரண்டாவது திருமணம். “இருந்ததும் போச்சே” எனும் நிலை வரவே கூடாது என்பதில் கவனம் தேவை. அதற்காக உங்கள் வருங்காலக் கணவரைப் பற்றி முழுமையாய் கொள்ளுங்கள். அவசரம் கூடவே கூடாது. அவருடைய கடந்த காலம், குடும்பம், சூழல், சிந்தனைகள் என அனைத்தையும் அறிந்து கொள்ளுங்கள். ஒத்து வராது என்று சற்றே சந்தேகம் எழுந்தாலும் விட்டு விடுங்கள். முழுமையான நம்பிக்கை, சந்தேகமற்ற மனம் இரண்டும் மிக மிக முக்கியம்.
  5. உங்களைப் பற்றி உங்கள் வருங்காலக் கணவரிடம் பகிர்ந்து கொள்ளுங்கள். உங்கள் இருவருடைய விருப்பங்கள், செயல்கள், எதிர்பார்ப்புகள், தனிப்பட்ட குணாதிசயங்கள், உரையாடல் வகைகள், மதம், குடும்பச் சிக்கல்கள், பொருளாதாரச் சிக்கல்கள் என பலவற்றைக் குறித்த தெளிவும் ரொம்ப அவசியம்.திருமணம் ஏன் தோல்வியடைந்தது. எவையெல்லாம் உங்களைக் காயப்படுத்தும், எவையெல்லாம் உங்களை மகிழ்விக்கும், எவையெல்லாம் உங்கள் எதிர்பார்ப்புகள் என்பதையெல்லாம் பேசுங்கள். திருமணத்துக்குப் பின் விரும்பத் தகாத ரகசியங்கள் வெளியாவது குடும்ப உறவைப் பாதிக்கும்.
  6. என்னதான் உலகம் பற்றித் தெரிந்த அறிவுள்ளவராய் இருந்தாலும் ஒரு கவுன்சிலிங் வைத்துக் கொள்வது நல்லது. உங்கள் சிந்தனைகள் சரிதானா என்பதை ஊர்ஜிதப் படுத்திக் கொள்ளவேனும் இது உதவும். எனவே நல்ல மேரேஜ் கவுன்சிலிங் ஒன்றில் கலந்து கொண்டு தெளிவு பெறுங்கள். நீங்களும் உங்கள் வருங்காலக் கணவருமாக திருமணத்துக்கு முந்தைய “பிரீ மேரிடல்” கவுன்சிலிங் ஒன்றில் கலந்து கொண்டால் சூப்பர்.
  7. புதிய திருமணம் செய்து கொண்டால் ஒரு புதிய இடத்துக்குப் போங்கள். புது வீடு, புதிய அக்கம் பக்கம், புதிய சூழல் என அமைவது ரொம்ப நல்லது. பழைய சிந்தனைகளும், கசப்புகளும் உங்களை கலவரப்படுத்தாமல் இருக்க இது உதவும்.
  8. அன்புடனும் பொறுமையுடனும் உங்கள் வாழ்க்கையை நடத்துங்கள். புதிய பொழுது போக்குகள், புதிய பழக்கங்கள் என உங்களை உற்சாகப்படுத்திக் கொள்ளுங்கள். எதிலும் உற்சாகமற்றவராகவோ, குற்ற உணர்வுடையவராகவோ உங்களைக் காட்டிக் கொள்ளாதீர்கள்.
  9. சில விஷயங்களை விட்டுக் கொடுக்க வேண்டியிருந்தால் சிந்தியுங்கள். அவை உங்களால் முடியும் என்றால் ஆனந்தமாய் ஒத்துக் கொள்ளுங்கள். முடியாதவற்றை முடியும் என்று சொல்லி பிரச்சினையில் உழல வேண்டாம்.

10.  முதல் திருமணத்தில் குழந்தைகள் இருந்தால் சிக்கல் இன்னும் அதிகமாகும். உங்கள் குழந்தைகளின் நலனின் அக்கறை கொள்பவர் கணவராக வருவது முக்கியம். கணவரின் குடும்பத்தினரின் மனநிலையும் இதில் ரொம்ப அவசியம். பழைய குடும்ப வாழ்க்கையில் குழந்தையின் பொருளாதார உரிமைகளைப் பெற்றுக் கொள்வதும் அவசியம். உங்களுடைய திருமண தேடுதல்கள் குழந்தைகளின் மனநிலையையோ, எதிர்காலத்தையோ எந்த விதத்திலும் பாதிக்காமல் இருக்க வேண்டியது ரொம்ப அவசியம்.

11. மறுமணங்களில் உள்ள ஒரு சிக்கல் யாருக்கு முக்கியத்துவம் தருவது என்பதில் எழும். குழந்தைகளுக்கா கணவனுக்கா ? மனைவி தனக்குத் தான் முக்கியத்துவம் தர வேண்டுமென்பது கணவனின் விருப்பமாய் இருக்கும். பிள்ளைகளோ தங்களுக்கே அம்மா முக்கியத்துவம் தரவேண்டும் என ஆசைப்படுவார்கள். இதில் அழகான பேலன்ஸ் செய்ய முடிந்தால் வாழ்க்கை நலமாகும்.

12.  மற்றவர்கள் என்ன நினைப்பார்கள், என்ன பேசுவார்கள் என்பதையெல்லாம் ஒதுக்கித் தள்ள வேண்டியது அவசியம். அவர்களுக்கு இந்த செய்தி எல்லாம் கொஞ்சகாலம் தான். அப்புறம் போரடித்துப் போய் அந்த வாய்களெல்லாம் புதுசாக வேறு அவலை மெல்லக் கிளம்பிவிடும்.  

 இரண்டாவது திருமணங்களில் மணமுறிவுகள் முதல் திருமணத்தை விட அதிகம் என்கின்றன சர்வதேசப் புள்ளி விவரங்கள். எனவே இரட்டைக் கவனம் ரொம்பவே அவசியம். 

நன்றி : பெண்ணே நீ…

தமிழிஷில் வாக்களிக்க…

எந்திரன் சீசன் துவங்கிடுச்சு !!

(கிளிக் பண்ணினா படம் பெருசா தெரியும்னு நான் சொல்ல வேண்டியதில்லை…)

இன்னா ஷங்கர், இரண்டு பக்கமும் பன்றிக் காய்ச்சல் வந்தவனை நிக்க வெச்சுட்டு என்னை நடிக்க சொல்றீங்க ? 

ஐஸ் : ஷங்கர், இது பப்ளிக் பிளேஸ்….

நான் எந்த பொண்ணு பின்னாடியும் போக மாட்டேன், பட், என் முன்னாடி எந்தப் பொண்ணு போனாலும் தடுக்கவும் மாட்டேன். 

வாசிக்கிறது வாத்தியம், எல்லாமே எந்திரனால சாத்தியம்…  இதான்பா பஞ்சு..

ஷங்கர், இந்த ஏரியா முழுக்க கலர் கலரா சாரி கட்டி வுட்டுட்டு நான் வேணும்னா தூம் ஸ்டைல்ல வரட்டுமா ?

ஐஸ் : என்னால சிரிக்காம இருக்க முடியல

ரஜினி : என்னால இருக்காம சிரிக்க முடியல ..வயசாகுதுல்ல.. ஹா..ஹா..ஹா…

ஹைடெக் ஆளு எந்திரனா
மனசை மயக்கும் மந்திரனா
ஐஸுப் பக்கம் ஐஸை வைத்து
நைஸாப் பேசும் தந்திரனா ? சுந்தரனா…..

(ஹி..ஹி… ஓப்பனிங் சாங் )

எனது நூல் “அன்னை : வாழ்க்கை அழகானது”

அன்னை தெரசா பற்றிய எனது இரண்டாவது நூல் இது. முதல் நூல் சில ஆண்டுகளுக்கு முன் கவிதை நடையில் வெளிவந்தது. அந்த நூலிற்குக் கிடைத்த வரவேற்பில் மகிழ்ந்துபோன தோழமை பதிப்பாசிரியர் நண்பர் பூபதி அவர்கள், உரை நடை வடிவில் நூலை எழுதச் சொன்னார். அது தான் இப்போது வெளிவந்திருக்கிறது. இரண்டு முறை பார்த்தாலும் சலிக்காத நயாகரா நீர்வீழ்ச்சி போல, இரண்டு முறை எழுதும் போதும் சற்றும் சுவாரஸ்யம் குறையவில்லை அன்னையின் வாழ்க்கை. ஒவ்வோர் முறை நனையும் போதும் புதிதாய்த் தெரியும் மழையின் சாரலாய் மனதுக்குள் அன்னையின் மனித நேயம் குளிரடிக்கிறது.

எந்த ஒரு வரலாற்று மனிதரையும் அவர் சார்ந்த சமூக, அரசியல், மத பின்னணி இல்லாமல் முழுமையாய் அறிந்து விட முடியாது. அந்த வகையில் இந்த நூல் அன்னையின் பணிகளுக்கான காரணங்களையும் சேர்த்தே பதிவு செய்கிறது. உதாரணமாக, ஏன் கத்தோலிக்க மதம் அன்னையின் விண்ணப்பத்தை நிராகரித்தது எனும் கேள்விக்கு கத்தோலிக்க மதத்தின் மீதான பரிச்சயம் தேவையாகிறது. இந்த நூல் அத்தகைய நுட்பமான காரண காரியங்களைத் தவற விடாமல் பதிவு செய்திருக்கிறது என நம்புகிறேன்.

வாய்ப்பும், வசதியும் கிடைத்தால் படியுங்கள், படித்தால் உங்கள் கருத்துக்களைத் தெரியப்படுத்துங்கள்.

(படத்தை பெரிதாய்ப் பார்க்க படத்தின் மேல் கிளிக்கவும்… )

 சேவியர்

———–

பதிப்பகம் : தோழமை ( புத்தகக் கண்காட்சியில் # 432 )

        5டி, பொன்னம்பலம் சாலை, கே.கே நகர், சென்னை – 78

பக்கங்கள் 144

விலை : 70/-

பதிப்பாசிரியர் பூபதி : 9444302967

————————————————- 

சேவியரின் எழுத்து எல்லைகள் கடந்து விரிகிறது. இந்த மென்பொறியாளர் எழுதுவதற்கு ஆயிரம் இருக்கிறது. கிமு கதைகள் எழுதியவர், இயேசுவின் கதையைக் கவிதையாய்ச் சொன்னவர் இப்போது அன்னை தெரசா என்கிறார். ஆயிரம் உறவுகள் தாண்டி நாம் அன்னை மடியில் அடைக்கலம் தேடுகிறோம். மனிதம் புறக்கணித்த தொழுநோயாளர்களை, நிராகரிக்கப்பட்ட முதியோர்களை, குப்பைத் தொட்டியில் வீசப்பட்டக் குழந்தைகளை அன்பின் கரங்களில் அரவணைத்த்தது இந்த அன்னையின் மடி.

அன்னை தெரசா எனும் ஒற்றைச் சொல்லை மட்டுமே அறிந்த நமக்கு பேரன்பும் பெருமதிப்பும் கொண்ட அந்தப் பேருள்ளத்தின் வரலாற்றை அழகிய நடையில் சுவாசிக்கத் தந்திருக்கிறார் சேவியர். பாரத தேசம் தூக்கிப் போட்ட மனிதர்களை தூர தேசத்திலிருந்து வந்த ஒரு புண்ணியத் தாய் ஏந்திக் கொண்டார். கவித்துவமும் கவிதைத் தமிழும் கலந்த எழுத்து நடையை சேவியர் நடை என்றே சொல்லலாம். மனித நேயத்தின் பாதையில் மலர்களைத் தூவிய அன்னையின் பாதையில் கிடந்தவை முட்களே. இது அன்பின் வாழ்க்கை. கருணை கடந்து வந்த பாதை.

இந்த நூலில் கிடைக்கப் போவது வாசிப்பு அனுபவம் மட்டுமல்ல, ஓர் ஆத்ம தரிசனமும் கூட.

–     

பின் அட்டையில் – எழுத்தாளர், பத்திரிகையாளர் சுந்தரபுத்தன்