சிறுகதை : யோவ்… இண்டர்நெட் வேலை செய்யலைய்யா…

  

“சுவிட்சை ஆன் பண்ணியிருக்கீங்களா சார் ” மறு முனையில் பேசிய கஸ்டமர் சர்வீஸ்காரனுடைய பேச்சைக் கேட்கக் கேட்க கிருபாவுக்கு எரிச்சல் பொத்துக் கொண்டு வந்தது. அடக்கிக் கொண்டு பதில் சொன்னான். 

“ஆன் பண்ணியிருக்கேன்” 

“உங்க மோடம்ல லைட் எரியுதா ?” 

“சுவிட்சைப் போட்டா லைட் எரியாம மோடமேவா எரியும்?” 

“சார்… பிளீஸ் சொல்லுங்க.. எத்தனை லைட் எரியுது ? 

“நாலு லைட்… பச்சை பச்சையா எரியுது” 

“அப்போ ஏதோ மிஸ்டேக். இரண்டாவதா இருக்கிற லைட் மஞ்சள் கலரா எரியணும்” 

“பாஸ்… இதையெல்லாம் நான் லாஸ்ட் ஒன் வீக்கா உங்க கிட்டே டெய்லி போன் பண்ணி சொல்லிட்டு இருக்கேன். நீங்க தான் வயரு சுவத்துல இருக்கா, சுவரு வீட்டுல இருக்கா, வீட்ல கரண்ட் இருக்கான்னு கடுப்படிக்கிறீங்க” 

“சாரி பார் த டிஸ்டர்பன்ஸ்… எவ்ளோ நாளா இண்டர்நெட் வர்க் ஆகலைன்னு சொன்னீங்க ?” 

“இன்னியோட முழுசா ஒரு வாரம்” 

“ஓ..கே சார்… உங்க பழைய கம்ப்ளையண்ட் நம்பர் என்ன ?” 

சொன்னான். 

“பிளீஸ் ஹோல்ட் ஆன்” மறுமுனை சொல்லி முடித்ததும் போனில் ஏதோ இசை வழியத் தொடங்கியது. மெலிதான இசைதான். ஆனால் இந்த சூழலில் அது கர்ண கொடூரமாய்த் தெரிந்தது. 

இந்த ஹோல்ட் ஆனைக் கண்டு பிடிச்சவனைக் கொல்லணும். நாலு கேள்வி கேட்டுட்டு ஹோல்ட்ல போட்டுட்டு டீ குடிக்க போயிடறாங்க போல. பத்து நிமிசம் கழிச்சு சாவாகாசமா வந்து சாவடிப்பாங்க. கிருபாவின் எரிச்சல் ஏறிக் கொண்டிருந்தது. 

இருக்காதா பின்னே. போன மாசம் தான் பிரியாவுக்கு அவனுக்கும் நிச்சயதார்த்தம் ஆச்சு. நிச்சயதார்த்தம் ஆன முதல் நாள்ல இருந்து எப்போவும் ஸ்கைப் தான் ஒரே துணை. நெட்ல பேசறது, வெப் கேம்ல சிரிச்சுக்கிறது, இ மெயில்ல போட்டோ அனுப்பிக்கிறது ன்னு வாழ்க்கை சுவாரஸ்யமா ஓடிட்டே இருந்தது. சுவாரஸ்யத்தோட உச்சத்துல இருந்தப்போ தான் ஒரு நாள் சட்டுன்னு அந்த சிக்கல் வந்துது. இண்டர் நெட் கணக்ட் ஆகலை ! 

நெட் கனெக்ட் ஆகாததெல்லாம் ஒரு பெரிய சர்வதேசக் குற்றம் கிடையாது தான். இன்னிக்கு பெப்பே காட்டும். கொஞ்சம் நேரம் கழிச்சு பார்த்தா கணெக்ட் ஆயிடும். இதுக்குன்னு சில ஸ்பெஷல் வைத்தியங்கள் உண்டு. 

முதல்ல மோடம் பின்னாடி இருக்கிற வயரை எல்லாம் கழற்றிட்டு திரும்ப மாட்டணும். என்னத்த கழட்டறோம்ன்னும் எதுக்கு கழட்டறோம்னும் யாருக்கும் தெரியாது. ஆனா ஒரு தடவை புல்லா கழற்றி மாட்டினா செத்துப் போன மேடம் வேலை செய்ய சாத்தியம் இருபது சதவீதம் உண்டு. 

அதுவும் வேலைக்காவலைன்னா இருக்கவே இருக்கு சிஸ்டம் ரீஸ்ட்டார்ட். கம்ப்யூட்டரை ஒரு வாட்டி ஷட்டவுன் பண்ணி ஆன் பண்ணினா அதுபாட்டுக்கு எல்லா கனெக்ஷன்களையும் தூசு தட்டு ஜம்முன்னு இண்டர்நெட் வேலை செய்ய ஆரம்பிக்கும். 

இப்படி எல்லா முதலுதவிகளும் செய்து பார்த்து கிருபாவுக்கே சலிப்பு வந்துடுச்சு. இந்த வாட்டி தான் இப்படிப் படுத்துது. என்ன பண்ணினாலும் வேலைக்காவலை. தெரியாத் தனமா இந்த பி.எஸ்.என்.எல் வேற வாங்கித் தொலச்சுட்டேன். வேற பிரைவட் கம்பெனின்னா கூப்பிட்டா உடனே வந்து நிப்பாங்க. முதல்ல இதை தலையைச் சுத்தி தூரப் போடணும். கிருபாவுக்கு இருப்புக் கொள்ளவில்லை. ஸ்பீக்கர் போனில் இன்னும் மியூசிக் தான் ஓடிக் கொண்டிருந்தது. 

கண்டிப்பா அந்த ….. போனை ஹோல்ட் பண்ணிட்டு டீ குடிக்கத் தான் போயிருக்கும்.  பொறம்போக்கு… கிருபா சத்தமாகவே அந்த வார்த்தையைச் சொல்லி அருகிலிருந்து சேரை எட்டி உதைத்துத் தள்ளியபோது மியூசிக் நின்றது. 

ஐயையோ .. மிதிச்ச மிதியில போனும் கட்டாச்சோ என ஒரு வினாடி கிருபா திடுக்கிட்டான். நல்ல வேளை அப்படியெல்லாம் நடக்கவில்லை. இல்லேன்னா மறுபடியும் போன் பண்ணி “பிரஸ் ஒன் பார் இங்கிலீஸ்” ன்னு கேக்கறதுக்கு பதிலா மோடத்தையே எரிச்சுடலாம் என்று அவனுக்குத் தோன்றியது. 

“தேக்ஸ் ஃபார் ஹோல்டிங் சார்” 

“சரி சரி.. டீ குடிச்சாச்சா ?” 

“ஐ.. டிடிண்ட் கெட் யூ சார்…” 

“எவ்ளோ நேரம் தான் ஹோல்ட்ல போடுவீங்க. இந்த மியூசிக் கேட்டுக் கேட்டு காதெல்லாம் வலிக்குது. உங்களுக்கு ரெஸ்ட் எடுக்கணும்ன்னு தோணினா ஹோல்ட் ல போட்டுடுவீங்க. அப்படித்தானே ? உண்மையைச் சொல்லுங்க… ” 

மறுமுனையில் அவன் சிரித்தான். “நோ சார்.. நான் உங்க டேட்டா எல்லாம் செக் பண்ணிட்டு இருந்தேன்” 

“ஓ… மறுபடியும் ஒரு செக்கிங்ஆ ? சரி… ஏதாச்சும் யூஸ் புல்லா கிடைச்சுதா ? இல்லை இன்னொரு நயன் டிஜிட் நம்பர் தருவீங்களா ? கஸ்டமர் கம்ப்ளையிண்ட் நம்பர்ன்னு. ” 

“நோ சார்… உங்க பிராப்ளம் என்னன்னு கண்டு பிடிச்சாச்சு” 

“ஓ ரியலி… தேங்க் காட்…. கேக்கவே சந்தோசமா இருக்கு. ? என்ன பிராப்ளம் ? நெட்வர்க் இஷ்யூவா ? ” 

“நோ.. நோ சார். எங்க சைட் எந்த பிராப்ளமும் இல்லை. உங்க சைட்ல தான்” 

“என் சைட்ல என்னய்யா பிராப்ளம்” 

“நீங்க இந்த மாசம் பணமே கட்டலை சார். சோ, டிஸ்கணக்ட் பண்ணியிருக்காங்க. உங்களுக்கு இண்டிமேஷன் கூட அனுப்பியிருக்காங்களே” 

மறுமுனையில் அவன் சொல்லச் சொல்ல கிருபாவுக்கு பக் என்றானது. ஐயையோ…. எப்படி மறந்தேன் ? பணமே கட்டாமல் இண்டர்நெட்டை துண்டித்திருக்கிறார்கள். அந்த விஷயம் தெரியாமல் ஒருவாரமாக எல்லோரிடமும் எகிறிக் குதித்து களேபரம் பண்ணியிருக்கிறேன். நினைக்க நினைக்க கிருபாவிற்கு தன் மேலேயே கடுப்பாய் இருந்தது. 

லவ் மூடில் பணம் கட்டவே மறந்து போன சமாச்சாரம் அவனுக்கு ரொம்ப லேட்டாக உறைத்தது. 

“சார்… இருக்கீங்களா ?” 

“யா… ஐ…ஐ..யாம் சாரி… ஐ.. பர்காட்… நான் பணத்தைக் கட்டிடறேன்” கிருபாவின் குரலின் சுருதி ஏகத்துக்குக் குறைந்திருந்தது. 

“ஈஸ் தெயர் எனிதிங் எல்ஸ் ஐ கேன் டு பார் யூ சார்” மறுமுனையில் கேட்டவனுடைய குரலில் கொஞ்சம் நக்கல் இருந்தது போல தோன்றவே “நோ.. தேங்க்ஸ்” என்று சொல்லாமலேயே போனைக் கட் பண்ணினான் கிருபா. 

அவனுக்கு முன்னால் பளீர் பச்சை நிறத்தில் எரிந்து கொண்டிருந்த மோடம் விளக்குகள் அவனைப் பார்த்து கை கொட்டிச் சிரிப்பதாய் தோன்றியது அவனுக்கு. 

ஃ 

 
 

  

பிடித்திருந்தால் வாக்களிக்கலாமே 

குட் டச், பேட் டச் – பெண்ணே நீ கட்டுரை

“குட் டச், பேட் டச்” ன்னு சொல்றதைக் கேட்டிருப்பீங்க. நல்ல தொடுதல், மோசமான தொடுதல். பொதுவா எல்லோருக்குமே தெரிஞ்ச விஷயம் தான் இது. ஆனாலும் இன்னிக்கும் பல்லாயிரம் பேர் இதனால பாதிக்கப்பட்டுக் கொண்டே தான் இருக்கிறார்கள்.

சுருக்கமா இதைச் சொல்லணும்ன்னா, நல்ல தொடுதல் ஒரு அம்மாவோட அரவணைப்பைப் போல அன்பானது. எந்தவிதமான கள்ளம் கபடம் இல்லாத தூய்மையான நேசம் உடையது. குறைந்த பட்சம் எந்த தப்பான சிந்தனையும் இல்லாத தொடுதல் நல்ல தொடுதல்.

மோசமான தொடுதல்ங்கறது தலை கீழ். தப்பான சிந்தனையோட தொடறது. குறிப்பா பெண் குழந்தைகளைக் கொஞ்சுவது போலவோ, விளையாடுவது போலவோ பாவனை காட்டி உள்ளுக்குள் வக்கிரமாய் தொடுவது என சொல்லலாம். இதைத் தவிர குழந்தைகளை அடிக்கிறது, உதைக்கிறது, அவர்களைக் காயப்படுத்தறது என நல்ல தொடுதல் இல்லாத எல்லாமே மோசமான தொடுதல்களில் வரும் விஷயங்கள் தான்.

தப்பான தொடுதலில் மிக முக்கியமானது பாலியல் ரீதியிலான தொடுதல். இந்தியா மாதிரி கூட்டுக் குடும்பங்கள் கலாச்சாரம் இருக்கிற இடங்களில் இது ரொம்பவே அதிகம். மாமா, மச்சான் ன்னு புடை சூழ வீடு நிரம்பியிருக்கும்போ பல தப்பான விஷயங்களும் நடந்து விடுகிறது. தப்பான தொடுதலுக்கு ஆளான குழந்தைகள் இதை பெரும்பாலும் வெளியே சொல்வதில்லைங்கறது தான் கவலைக்குரிய முதல் விஷயம். சுமார் 72.1 சதவீதம் குழந்தைகள் இதைப் பற்றி யார் கிட்டேயும் சொல்வதே இல்லையாம் ! இது இந்தியாவில் அரசு சார்பாக நடத்தப்பட்ட ஒரு புள்ளி விவரம் சொல்லும் சேதி !!

90 சதவீதம் தொந்தரவுகளும் குழந்தைக்குத் தெரிந்த நபர்களால் தான் வருதுங்கறது தான் ரொம்பவே அதிர்ச்சியூட்டும் செய்தி. இந்த பேட் டச் விஷயத்தை பெற்றோர்கள் அறிந்து கொள்வதும், அதைக் குழந்தைகளுக்குச் சொல்லிக் கொடுப்பதும் ரொம்ப ரொம்ப முக்கியமான தேவைகள். ஒரு குழந்தை மூன்று வயதாக இருக்கும் போதே பெற்றோர் இந்த எச்சரிக்கையையும், வழிகாட்டுதலையும் குழந்தைகளுக்கு வழங்கலாம் என்பது உளவியலார் கருத்து ! எனவே பிள்ளை வளரட்டும்ன்னு காத்திருக்காதீங்க.

குழந்தைங்களை ஒரு பாதுகாப்பான சூழலில் வளர்த்துவதும். எது நல்லது, எது கெட்டதுங்கற புரிதலை குழந்தைகளுக்குச் சொல்வதும் இன்றைய தேதியில் ரொம்ப முக்கியமான விஷயங்கள்.

இதொண்ணும் நிலாவுக்கு ராக்கெட் விடறமாதிரி கஷ்டமான விஷயம் கிடையாது. சிம்பிள் தான். நான் சொல்லப் போற தகவல்களை மனசுல வெச்சுருந்தீங்கன்னா போதும் !

1. குழந்தை ஸ்கூல் போயிட்டு வந்தாலோ, வெளியே யார் வீட்டுக்காவது போய் வந்தாலோ அங்கே நடந்த எல்லா விஷயங்களையும் கேளுங்க. கள்ளம் கபடமில்லாமல் பிள்ளைங்க சொல்ற விஷயங்களை வெச்சே நீங்க விஷயத்தைப் புரிஞ்சுக்க முடியும். ஒருவேளை ஏதாச்சும் தப்பு நடந்திருக்குன்னு தெரிஞ்சா கூட பதட்டப்பட்டு குழந்தைகளைப் பயப்படுத்தாதீங்க. முழுசா கேளுங்க.

2. “நோ” ன்னு சொல்ல குழந்தையைப் பழக்கணும். குழந்தை கிட்டே குழந்தையோட உடம்பு குழந்தைக்கு மட்டுமே சொந்தமானதுங்கற உண்மையை சொல்லுங்க. யாராச்சும் தப்பா தொட முயற்சி பண்ணினா “நோ” ன்னு அழுத்தமா, சத்தமா சொல்லப் பழக்குங்க.

3. குழந்தையை தன்னம்பிக்கை உடைய குழந்தையா வளர்க்க வேண்டியது அவசியம். அப்பா அம்மா அதுக்கு முன் மாதிரிகையா இருக்கணும். குழந்தைங்க கூட ரொம்ப நேரம் செலவிடுங்க. அவங்களுக்கு ஒரு பாதுகாப்பு உணர்வு வரவேண்டியது அவசியம்.

4. அம்மாவுக்கும் குழந்தைக்கும் இடையே நல்ல உரையாடல் பழக்கம் வேணும். அன்பான, விரிவான, அமைதியான உரையாடல் ரொம்ப முக்கியம். தினமும் குழந்தை கூட பேசுங்க. “அம்மா கிட்டே எதுன்னாலும் நம்பிக்கையா சொல்லலாம்” ங்கற நிலமை தான் இருக்கணும். அதுதான் அடிப்படை. இல்லேன்னா, குழந்தை உங்க கிட்டே விஷயத்தை மறைக்கவும் வாய்ப்பு உண்டு.

5. குழந்தை என்ன சொல்லுதோ அதை ரொம்பக் கவனமா கேளுங்க. எந்த குழந்தையும் கற்பனையா ஒரு பாலியல் தப்பை உருவாக்கிச் சொல்லாது. பொதுவா தெரிந்த நபர்கள் விளையாட்டுங்கற போர்வைல தான் இதைச் செய்வாங்க. அதைக் கவனத்துல வெச்சுக்கோங்க. குழந்தைகளை முழுக்க முழுக்க நீங்க நம்ப வேண்டியது ரொம்ப முக்கியம்.

6. “எனக்கு அந்த மாமாவைப் புடிக்காது” ன்னு ஒரு குழந்தை சொன்னா உள் மனசுல ஒரு சின்ன மணி அடிக்கட்டும். ஒருவேளை ஏதேனும் சில்மிஷம் நடந்திருக்கலாம். குழந்தையை வற்புறுத்தாதீங்க. யாராச்சும் குழந்தை கூட பழகற விதத்துல சந்தேகம் தெரிஞ்சா அந்த நபரை முழுமையா தவிர்க்க வேண்டியது ரொம்ப ரொம்ப முக்கியம்.

7. நீங்க இல்லாதப்போ குழந்தையை ஒரு மூணாவது நபர் கிட்டே ரொம்ப நேரம் விட்டுட்டு போகாதீங்க. உங்களுக்கு சந்தேகமே வராத இடத்துல கூட குரூரமான மனசு ஒளிஞ்சிருக்கலாம்.

8. “அம்மா கிட்டே சொல்லாதே” ன்னு யாராச்சும் ஏதாச்சும் சொன்னாங்களான்னு கேளுங்க. பிள்ளைங்க கள்ளம் கபடமில்லாதவங்க. நீங்க கேட்டா சொல்லிடுவாங்க. நிறைய தப்புகள் இந்த வாக்குறுதிக்குப் பின்னால இருக்க வாய்ப்பு உண்டு.

9. அதே மாதிரி “அம்மா கிட்டே சொல்லுவேன், அப்பா கிட்டே சொல்லுவேன்” ன்னு யாராச்சு மிரட்டினாங்களான்னும் கேளுங்க. இப்படிப்பட்ட பிளாக் மெயில் தொந்தரவு ரொம்ப ஆபத்தானது ! தொடர்ச்சியான பாலியல் தொந்தரவுகளுக்கு இது காரணமாகிவிடும்.

10. யாராச்சும் சாக்லேட் குடுத்தாங்களா ? கிஃப்ட் குடுத்தாங்களா ? ஏதாச்சும் வாங்கித் தரேன்னு சொன்னாங்களான்னு கேளுங்க. இதெல்லாம் மோசமான தொடுதலுக்கான முன்னுரைகளாய் இருக்கலாம். இந்த விஷயத்துல மட்டும் படிச்சவங்க, படிக்காதவங்க, ஏழைங்க, பணக்காரங்கன்னு வித்தியாசமே கிடையாது. இது உங்க மனசுல இருக்க வேண்டியது அவசியம்.

11. குழந்தை கிட்டே பதட்டமோ, சோகமோ, கவலையோ இருந்தா அமைதியா உக்காந்து என்ன விஷயம்ன்னு கேளுங்க. குழந்தையோட உடம்புல ஏதாச்சும் காயம், அடையாளம் ஏதாச்சும் இருக்கான்னும் பாருங்க. வித்தியாசமா ஏதாச்சும் தெரிஞ்சா உஷாராயிடுங்க.

12. இப்படி ஏதாச்சும் தப்பு நடந்தா, தப்பான விஷயத்தை யாராச்சும் பண்ண முயற்சி பண்ணினா, யார் கிட்டே தகவல் சொல்லணும்ங்கற விஷயத்தை குழந்தை கிட்டே சொல்லிடுங்க. முக்கியமான போன் நம்பர்களை குழந்தைகிட்டே எழுதிக் குடுத்திருங்க.

13. குழந்தைங்க தப்பு செய்தா உடனே எகிறிக் குதிச்சு களேபரம் பண்ணாதீங்க. அதுக்காக தப்பை கண்டிக்காதீங்கன்னு சொல்ல வரலை ! தப்பு பண்றது சகஜம், ஆனா அதை திரும்ப பண்ணக் கூடாதுங்கறதை சொல்லிப் புரியவையுங்க. தப்பு பண்ணினா கூட அதை உங்க கிட்டே சொல்ற அளவுக்கு குழந்தைகளை பழக்குங்க.

14. திரையரங்கு, பேருந்து, பள்ளிக்கூடம், பூங்கா போன்ற இடங்கள்ல எப்படி நடந்துக்கணும்ங்கறதை அவங்களுக்கு சொல்லிக் குடுங்க. எப்படியெல்லாம் எச்சரிக்கையா இருக்கணுங்கறதை அவங்களுக்கு அமைதியா சொல்லிக் குடுங்க. அதுக்காக அவங்களை ஒரேயடியா பயமுறுத்தி வைக்காதீங்க.

15. திடீர்ன்னு யாராச்சும் சொந்தக்காரங்க குழந்தை கிட்டே ரொம்ப பாசமா இருந்தா கவனிங்க. கடைக்குக் கூட்டிட்டு போறேன், சினிமாக்கு கூட்டிட்டு போறேன்னு சொன்னா மறுத்துடுங்க. இந்த தொந்தரவு தருபவர்களில் எல்லா வயசு மனிதர்களும் உண்டு. பதின் வயது விடலைகள் முதல், நரை விழுந்த கிழடுகள் வரை. எனவே விழிப்பு அவசியம்.

16. ஆபாசப் புத்தகம், படம் இப்படியெல்லாம் யாராச்சும் காட்டினா வீட்ல சொல்லச் சொல்லுங்க. குழந்தைங்களை தப்பான சிந்தனைக்குள்ள கொண்டு போய் அவங்களை பயமுறுத்தி பாலியல் பிரச்சினை செய்றவங்க ஏராளம்.

17. யாராச்சும் குழந்தையை போட்டோ எடுக்க வந்தால் “வேண்டாம்” ன்னு சொல்லப் பழக்குங்க. குழந்தைகளை மோசமா படம் எடுக்கவும் இது வழி வகுக்கும்.

18. அதேபோல குழந்தைங்க கிட்டே ஒரு தடவை இதைப் பற்றி சொல்லிட்டேன்னு விட்டுடாதீங்க. அடிக்கடி கேட்டுட்டே இருங்க. குழந்தைங்களை மத்தவங்க சீக்கிரம் ஏமாத்திட முடியும் !

19. கிராமத்து அம்மாக்களுக்கு ஒரு நம்பிக்கை உண்டு. இந்த மாதிரி பேட் டச் சமாச்சாரங்களெல்லாம் நகரத்துல மட்டும் தான்னு ! ஆனா அது ரொம்ப தப்பான அபிப்பிராயம். இந்த விஷயத்துல எல்லா இடத்துலயும் சிக்கல் உண்டு. அதுவும் சம அளவில் !

20. தப்பு நடந்தது தெரிஞ்சா அதை லேசா எடுத்துக்காதீங்க. “அவரு தெரியாம பண்ணியிருப்பாரு. இனிமே பண்ண மாட்டாரு” ன்னு நீங்களா தீர்ப்பு எழுதாதீங்க. இந்த மாதிரி சிந்தனை உள்ளவங்க சினிமாவோட கிளைமேக்ஸ் மாதிரி சட்டுன்னு திருந்த மாட்டாங்க.

எது தப்பு எது சரின்னு தெரியாத மழலைப் பருவத்தில் இப்படிப்பட்ட எச்சரிக்கைகளைக் கொடுப்பது குழந்தைகள் பாதுகாப்பா இருக்க வழி வகுக்கும். இன்னொரு முக்கியமான விஷயம். பாலியல் சிக்கல் பெண் குழந்தைகளுக்கு மட்டுமல்ல. ஆண்களுக்கும் உண்டு. சுமார் 18 சதவீதம் ஆண் குழந்தைகள் இந்த சிக்கலை சந்திக்கிறாங்க என்கிறது ஒரு புள்ளி விவரம்.

ஒட்டு மொத்த சமூகமும் ஒரு நாளில் திருந்தி விடப் போவதில்லை. பெற்றோர் விழிப்பாய் இருப்பதும், குழந்தைகளை விழிப்பாய் இருக்கப் பழக்குவதுமே இந்தக் சிக்கலை எதிர்கொள்ளும் வழிகளாகும் !

 
 

வாக்களிக்க விரும்பினால்

 

SHUTTER ISLAND : எனது பார்வையில்

ஷட்டர் ஐலண்ட் :

 

ஷட்டர் ஐலண்ட் மர்மங்கள் நிறைந்த ஒரு தீவு. இந்த தீவில் அமைந்திருக்கும் மன நிலை மருத்துவமனை ஒன்றுக்கு விசாரணைக்காக வருகின்றனர் இரண்டு யு.எஸ் மார்ஷல்கள். ஆண்டு 1954. அது மனநிலை பாதிக்கப்பட்ட குற்றவாளிகளுக்கு சிகிச்சை அளிக்கும் ஒரு மருத்துவமனை. வருபவர்களில் ஒருவர் ஹீரோ லியானார்டோ டிகாப்ரியோ இன்னொருவர் மார்க் ரஃபல்லோ. அந்தத் தீவிலிருந்து காணாமல் போன ஒரு பெண்ணைத் தேடி வருகிறார்கள் இவர்கள் இருவரும்.

அந்தப் பெண்ணோ தனது மூன்று குழந்தைகளையும் நதியில் மூழ்கடித்துக் கொன்றவர். அந்த மருத்துவமனையின் டாக்டர் பென் கிங்க்ஸ்லி. மர்மப் பார்வையுடனும், செயல்பாடுகளுடனும் இருப்பவர். விசாரணை தொடரத் தொடர கொஞ்சம் கொஞ்சமாக மர்மங்கள் விரிவடைந்து கொண்டே செல்கின்றன. அந்த மருத்துவமனையில் மூளை சிகிச்சைகள், கொடுமைகள் என ஏதேதோ மர்மங்கள் இருப்பதாக கதை விரிகிறது.

தொடத் தொட விரியும் மர்மங்களையும், கூடவே தன் மனைவியின் சாவுக்குக் காரணமான லாடிஸ் என்பவனையும் கண்டு பிடிக்க ஹீரோ அந்த தீவில் அலைகிறார். அந்த தீவில் மொத்தம் 66 நோயாளிகள். உண்மையில் 67வது நபர் ஒருவர் உண்டு. அவர்தான் லாடிஸ் என்பது ஹீரோவின் கண்டுபிடிப்பு. அந்த மனிதனைத் தேடி அலைகிறார். இடையிடையே அவருடைய இரண்டாம் உலகப் போர் அனுபவங்கள், கனவில் தொடரும் இறந்து போன மனைவி என கதை வலுவடைகிறது.

மர்மத்தின் கடைசி முனையைக் கண்டுபிடித்த திருப்தியுடன் இருக்கும் போது தான் உண்மையான மர்மமே அவிழ்கிறது. அதாவது ஹீரோ ஒரு மனநோயாளி. இரண்டு வருடங்களாக அங்கே சிகிச்சை பெற்று வருபவன். அவன் தான் அந்த 67வது நோயாளி. தன்னைச் சுற்றி ஒரு மாய உலகத்தை உருவாக்கி வாழ்ந்து கொண்டிருப்பவர். அவருடைய மனைவிதான் தனது மூன்று குழந்தைகளையும் கொன்றவர். அவரை ஹீரோ கொன்று விடுகிறார் என அடுக்கடுக்காய் அதிச்சிப் பக்கங்கள் புரட்டப்படுகின்றன.

டென்னிஸ் லெஹென் எனும் பிரபல எழுத்தாளரின் நாவலைத் தழுவி எடுக்கப்பட்ட திரைப்படம் இது. சில ஆண்டுகளுக்கு முன்பு மாபெரும் சலசலப்பை உருவாக்கிய மிஸ்டிக் ரிவர் நாவல் இவர் எழுதியது தான்.

அமானுஷ்ய தீவை மிரட்டும் ஒளிப்பதிவில் அள்ளி எடுத்து வந்து பதட்டத்தை அதிகப்படுத்தியிருப்பதில் ரிச்சட்சனின் ஒளிப்பதிவுக்கு முக்கிய பங்கு உண்டு. கூடவே ராபட்சனின் இசையும் மிரட்டல் ரகமாக திடுக்கிட வைக்கிறது.

பியூட்டிபுல் மைண்ட், சிக்ஸ்த் சென்ஸ், ஹைட் அண்ட் சீக் போன்ற படங்களின் அடி நாதமாக இருக்கும் நாட் தான் இந்தப் படத்திலும். அந்த கனத்தை மிக லாவகமாக கையாண்டு பிரமிப்பூட்டியிருப்பவர் டிகாப்ரியோ. எப்படியாவது ஒரு ஆஸ்கர் விருதையாவது டி காப்ரியோவுக்கு வாங்கிக் கொடுக்கவேண்டுமே என தொடர்ந்து கங்கணம் கட்டி முயன்று வருகிறார் இயக்குனர் மார்ட்டின் கோர்ஸெசி. இருந்தாலும் டிபார்டட், ஏவியேட்டர் மற்றும் குட்ஃபெல்லாஸ் போன்ற படங்களுடன் ஒப்பிடுகையில் இது ஒரு படி கம்மி தான்.

 
 

நைட் ஷாமளனுடைய சிக்ஸ்த் சென்ஸ் போல இரண்டாவது முறை பார்க்கும் போது மிக வித்தியாசமான அனுபவத்தைத் தரும் படம் இது !

 

சைக்காலஜிக்கல் திரில்லர் வகையில் ஏமாற்றாத படம் !

 
 

பிடித்திருந்தால் வாக்களியுங்கள்

 

 

 

Alice in Wonderland : எனது பார்வையில்

 

நாம சில வேளைகளில் கனவு காண்போம். எங்கிருந்தாவது விழுந்து கீழே கீழே போய்க்கொண்டே இருப்போம் அப்புறம் ஒரு கட்டத்தில் இது கனவு என்று நமக்கே தோன்றி விடும். அப்படி ஒரு ஆழமான குழிக்குள் விழும் ஒரு பெண் அங்கே ஒரு அற்புத உலகத்தை சந்திக்கிறாள். நிஜமாக நடக்கும் அந்த விஷயத்தைக் கனவு என்று நினைத்துக் கொள்கிறாள். இது தான் ஆலிஸ் இன் ஒண்டர் லேண்ட் படத்தில் கான்சப்ட்.

 கற்பனை உலகின் கதவைத் திறப்பது எல்லோராலும் சாத்தியமில்லை. என்னைப் பொறுத்தவரை நிஜத்தை எழுதுவது சிம்பிள். மொழி கைவசம் இருந்தால் நிஜத்தின் வாசத்தை அப்படியே எழுத்தில் கொண்டு வந்து விடலாம். ஆனால் கனவு உலகத்தை உருவாக்க மனிதனுடைய வலது மூளை ரொம்பப் பலமாக இருக்க வேண்டும். ஹாரி பாட்டர், லார்ட் ஆஃப் த ரிங்க்ஸ், அவதார் என கிறங்கடிக்கும் ஏகப்பட்ட கற்பனை உலகங்களின் வரிசையில் இதுவும் ஒன்று. 

பாதாள உலகில் இரண்டு ராணிகள். இருவரும் சகோதரிகள். வெள்ளை ராணி நல்லவள். சிவப்பு ராணி கெட்டவள். ஆலிஸ் கெட்ட ராணியின் டிராகனைக் கொன்று, வெள்ளை ராணியை ஆட்சியில் அமர்த்துகிறாள். என சுருக்கினால் அது எந்த வகையிலும் இந்தப் படத்தை கௌரவிப்பது ஆகாது. படத்தின் ஒவ்வோர் பாத்திரப் படைப்பும் சுவாரஸ்யமாய் விரிகிறது. லாஜிக் ஆசாமிகள் இந்த மந்திரக் குழிக்குள் நழுவி விழாமல் சென்று விட வேண்டியது முக்கியம்.

 இந்தப் படத்தில் ஆலிஸ் இளம் பெண். சுதந்திரமாக இருக்க விரும்புபவள். பிராணிகளோடு அன்பு அதிகம். தனக்குப் பிடிக்காத ஒரு ராயல் மாப்பிளைக்கு மண ஒப்பந்தமாகப் போகும் நேரத்தில் கோட் சூட் முயல் ஒன்று வருகிறது. அதைத் தொடர்ந்து ஓடி குழியில் விழுகிறாள். அங்கிருக்கும் கதவைத் திறந்து வெளியே போய் அவள் அதிசய உலகத்தைப் பார்க்கிறாள். வாவ், தன் கனவில் அடிக்கடி வரும் அதே உலகம். எனவே இதுவும் கனவு என நினைக்கிறாள் அவள்.

 அதிசய உலகில் இருக்கும் விலங்குகளுக்கு, “இவள் தான் முன்பொருமுறை வந்த குட்டிப் பெண் ஆலிஸா ?” என்பதில் சந்தேகம். பிறகு அந்த சந்தேகம் கொஞ்சம் கொஞ்சமாய் மறைகிறது. தம்மடிக்கும் கம்பளிப்பூச்சி, புகையாய் பறந்து திரியும் பூனை, கொடிய மிருகம் என விந்தை உலகம் ஆலிஸை வியக்க வைக்கிறது. அங்கே இருக்கிறார் நம்ம ஜானி டெப். அவருக்கு இதில் பைத்தியக்கார தொப்பிக்காரன் எனும் பெயர்.

 சிவப்பு ராணியின் கோட்டையில் மந்திர வாள். மந்திரவாளைக் கொண்டு தான் டிராகனைக் கொல்ல முடியும். டிராகனிக் கொன்றால் தான் வெள்ளை ராணி ஆட்சியைப் பிடிக்க முடியும் என்றெல்லாம் சுவாரஸ்யமும், அம்புலிக் கதைத் திருப்பங்களும். இத்தகைய படங்களுக்கு முடிவு என்ன என்பதெல்லாம் சொல்லத் தேவையில்லை !

 இந்தக் கதையின் மூலம் 1865ம் ஆண்டில் சார்லஸ் டாட்ஸன் எனும் எழுத்தாளரின் கற்பனையில் முளைத்தது என்பது வியப்பளிக்கிறது. அந்தக் கற்பனைக்கு நவீன கலர் அடித்திருக்கிறார்கள். அதன் பிறகு இந்த நூல் பல்வேறு மொழி மாற்றங்கள் இணைப்புகள் என உலகெங்கும் பாப்புலராகி விட்டது. இந்த லேட்டஸ்ட் திரைப்படத்தின் சாராம்சம் ஆலிஸ் அட்வன்சர்ஸ் இன் ஒண்டர்லேண்ட் மற்றும் துரூ த லுக்கிங் கிளாஸ் ஆகிய இரண்டு நாவல்களின் கூட்டாஞ்சோறு. லெவிஸ் கோரல் தான் இந்த நாவல்களை எழுதியவர். கூட்டாஞ்சோறாக்கி பரிமாறியிருக்கும் இயக்குனர் டிம் பட்டன். சந்தேகம் வேண்டாம் பேட்மேன், சார்லி அண்ட் த சாக்லேட் பேக்டரி போன்ற பேசப்பட்ட படங்களை இயக்கிவர் இவர் தான்.

ரசிக்க வேண்டுமென குழந்தை மனசோடு அமர்ந்தால் உங்களால் ரசிக்காமல் இருக்க முடியாது.

  

பிடித்திருந்தால் வாக்களியுங்களேன்….

 

வாங்க ஜெயிக்கலாம் : எனது புதிய நூல்

“இதையெல்லாம் கொஞ்சம் வாசிச்சுப் பாருங்க” எனக்கு முன்னால் கத்தையாய் கொஞ்சம் பேப்பரைப் போட்டார் பிலால், பிளாக் ஹோல் மீடியா நிறுவனர்.

ஏதோ ஸ்கூல் பிள்ளைங்களோட பரீட்சை பேப்பர் போல இருந்தது. வித விதமான கை எழுத்துகளில் கிறுக்கலாய் கிடந்த பேப்பர்களில் ஒன்றை எடுத்து வாசித்தேன். புரியாமல் அவரை ஏறிட்டுப் பார்த்தேன்.

“என்ன தலைவரே இதெல்லாம் ?”

தனது டிரேட் மார்க் புன்னகையுடன் பேசத் தொடங்கினார் அவர், அருகில் ஆசிரியர் யாணன் அவர்கள்.

ஒருபக்கம் பெண்கள் வளர்கிறாங்கன்னு சொல்றோம். இன்னொரு பக்கம் அவங்களுக்கு எதிரான குற்றங்கள் குறையக் காணோம். அப்படி என்னென்ன பிரச்சினைகளைத் தான் பெண்கள் முக்கியமா எதிர்கொள்றாங்க ? அவங்களுக்கு இன்னிக்கு என்னென்ன விஷயத்துல பாதுகாப்பும், ஆலோசனையும் தேவைன்னு யோசிச்சோம். பெண்களோட பிரச்சினையை பெண்களே சொல்லட்டுமேன்னு முடிவு பண்ணினோம். அதோட விளைவு தான் இந்தப் பேப்பர்கள் !

வேலைபாக்கிற பெண்கள் தொடங்கி படிக்கிற பெண்கள் வரை நிறைய பேர்கிட்டே பேப்பரைக் கொடுத்து அவங்களுக்கு ஆலோசனை தேவைப்படற ஐந்து பிரச்சினைகளை எழுதச் சொன்னோம். அந்தப் பிரச்சினைகள் தான் இந்தக் காகிதங்கள்ல இருக்கு.

இந்தப் பிரச்சினைகள்ல முக்கியமான சில பிரச்சினைகளை எடுத்து ஒரு நல்ல புக் போடணும். அது பெண்களோட பிரச்சினைகளுக்கு ஒரு தோழியா கூடவே இருந்து வழிகாட்டணும். அதுதான் பிளாக் ஹோல் மீடியாவோட ஐடியா.

அவர் பேசிக்கொண்டிருக்கும் போதே அந்த பேப்பர்களை ஒவ்வொன்றாகப் புரட்டினேன். படிகப் படிக்க வியப்பாகவும், வேதனையாகவும் இருந்தது. பெண்கள் சந்திக்கும் பிரச்சினைகள் தான் எத்தனை எத்தனை ? பெண்கள் வளர வளர அவர்களுக்கு எதிரான சதி வலைகளும் கூட வளர்கிறதோ எனும் பயமும் உருவாகிவிட்டது. கண்ணுக்குப் புலப்படாத கண்ணிகளும், புதைகுழிகளும் அவர்களுடைய பாதைகளில் மறைந்து தான் கிடக்கின்றன. வாசித்தவற்றில் பல பிரச்சினைகள் புதியவை. சில பிரச்சினைகள் விகடன், பெண்ணே நீ போன்ற இதழ்களுக்காக பிரத்தேயகமாக எழுதப்பட்டவை.

“என்ன செய்யலாம் சொல்லுங்க” என்றேன்.

அந்தந்த துறையில் அனுபவம் வாய்ந்தவர்களின் ஆலோசனைகளைக் கேட்பது, பிரச்சினைகளைக் குறித்து அலசி ஆராய்வது, கிடைக்கும் தகவல்களைத் தொகுத்து கட்டுரைகள் எழுதுவது என முடிவானது !

அப்படி எழுதப்பட்ட கட்டுரைகள் தான் “வாங்க ஜெயிக்கலாம்” எனும் கட்டுரைத் தொகுப்பு.

பெண்களோட வளர்ச்சிக்கு எதிராக எழுப்பப்பட்டிருக்கும் தடுப்புச் சுவர்களை இந்த நூல் அடையாளம் காட்டுகிறது. “நீ நெருப்பின் நடுவில் இருக்கிறாய்” என்று சொல்லிவிட்டுக் கடந்து போகாமல், எப்படி வெந்து போகாமல் வெளியே வருவது என்றும் இந்த கட்டுரைகள் வழிகாட்டுகின்றன.

வெற்றி என்பது பள்ளியிலோ, கல்லூரியிலோ பெறும் மதிப்பெண்களில் மட்டும் அடங்கிவிடுவதல்ல. சமூகம் நம்மீது திணிக்கும் ஒவ்வொரு சவாலிலும் ஜெயித்துக் காட்டுவது தான். வாங்க ஜெயிக்கலாம் நூல் அந்தப் பணியை திறம்படச் செய்திருக்கிறது என நம்புகிறேன்.

வாய்ப்புக் கிடைத்தால், வாசித்துப் பாருங்கள்.வாசித்தால் உங்கள் கருத்துக்களைச் சொல்லுங்கள்.

பிளாக் ஹோல் மீடியா பப்ளிகேஷன் லிமிடெட், எண் 75, ஏகாம்பர தபேதார் தெரு, ஆலந்தூர் , சென்னை – 16

Pages : 172,  Rs : 130/-

9600086474

91-44-43534303/ 43534304

admim@blackholemedia.in

www.blackholemedia.in

வாக்களிக்க விரும்பினால் கிளிக்குங்கள்

“மருந்தை” நாடும் பெண்கள், சிக்கலில் தாம்பத்யம்!!!

“என் பையனை தலையணை மந்திரம் போட்டு மயக்கிட்டா” என மாமியார்கள் புலம்புவதும், “அவனை முந்தானைல முடிஞ்சுட்டா” என பெண்கள் கிண்டலடிப்பதும் வெகு சகஜம். தாம்பத்யத்தின் தேவையை ஒருவகையில் இந்த வாசகங்களெல்லாம் திரும்பத் திரும்ப உறுதிப் படுத்திக் கொண்டிருக்கின்றன. தாம்பத்யம் உயிர்ப்பாக இருக்கும் காலமெல்லாம் தம்பதியருக்கு ஹனிமூன் காலம் தான். அந்த ஏரியா வீக் ஆகும்போது குடும்பத்தில் ஏகப்பட்ட பிரச்சினைகள் வந்து குவியும். மன அழுத்தத்தை விரட்டும் ஒரு அசத்தலான விஷயம் செக்ஸ் என்கின்றனர் உளவியலார்கள்.

மணிமேகலையின் கையிலிருக்கும் அமுத சுரபிபோல செக்ஸ் வாழ்க்கை எப்போதும் வற்றாத விஷயமாய் இருப்பதில்லை என்பது தான் சிக்கல். ஆண்களுக்கும் பெண்களுக்கும் இந்த விஷயத்தில் ஏகப்பட்ட பிரச்சினைகள் உண்டு. குறிப்பாக ஆண்களுக்கு என்ன தான் “விருப்பம்” இருந்தாலும் உடல் ஒத்துழைக்காவிட்டால் தோல்வி தான். ஆண்மைக் குறைவு பல்வேறு காரணங்களில் இருக்கலாம். நோய், மன அழுத்தம், உடல் குறைபாடு, விருப்பமின்மை இப்படி ஏதோ ஒன்று !

இதை வெளியே சொல்வது அவமானம் என பெரும்பாலான ஆண்கள் நினைக்கிறார்கள். “வாலிப வயோதிக அன்பர்களே” என்று தெருக்கடை முனை முதல் தொலைக்காட்சித் திரை வரை கேட்கும் குரல்களுக்கு  மூலதனமே இந்தப் பயம் தான்.  ஆண்மைக் குறைவு சிக்கலைச் சரிசெய்ய ஏகப்பட்ட வழி வகைகள் உண்டு. ரத்தினச் சுருக்கமாய்ச் சொல்ல வேண்டுமென்றால், “இரத்த ஓட்டத்தை தேவையான இடத்தில் பாயச் செய்து விட்டால்” பிரச்சினை தீர்ந்தது ! அந்த வேலையைச் செய்யும் ஆயிரத்து சொச்சம் மருந்துகளில் இன்றைக்கு முதலிடம் வயாகராவுக்கு !

ஆண்களுக்கு வயாகரா ? அப்படின்னா பெண்களுக்கு ? இப்படி சிந்தித்த மக்கள் தான் இன்று பணம் சம்பாதிக்க தலையைப் பிய்த்துக் கொள்கிறார்கள். பெண்களைப் பொறுத்தவரை உடல் சார்ந்த குறைபாடு விகிதம் ரொம்பவே குறைவு. பெரும்பாலும் மனம் தான் ! நிம்மதியான வாழ்க்கையோ, குடும்ப சூழலோ இல்லாவிட்டால் அவர்களால் தாம்பத்யத்தில் முழுமையாக ஈடுபட முடியாது. ஆனால் அதையெல்லாம் தாண்டித் தான் இன்றைக்கு பெரும்பாலான பெண்களின் பாலியல் நதி ஓடிக்கொண்டிருக்கிறது.

இந்த “விருப்பம்” எனும் விஷயத்தைத் தான் மருந்து தயாரிப்பாளர்கள் கையில் எடுத்திருக்கிறார்கள். பெண்களுக்கு செக்ஸ் ஆசையைத் தூண்டும் மருந்துகளைத் தயாரிக்கிறேன் பேர்வழி என ஏகப்பட்ட பேர் பிசினஸ் களத்தில் இறங்கிவிட்டார்கள். அவர்கள் சமீபத்தில் சுடச்சுட அறிவித்த பெயர் பிளிபான்செரின். இந்த மருந்தை தினமும் சாப்பிட்டு வந்தால் காலமெல்லாம் ஹனிமூன் தான் என ஏகப்பட்ட பில்டப் கொடுத்தார்கள். ஆனால் கடைசி நேரத்தில் அதற்கான அனுமதி மறுக்கப்பட்டது. தீர ஆய்வு செய்த எஃப்.டி.ஏ இந்த மருந்தை நிராகரித்து விட்டது. பக்கா விளைவு தரும் என எதிர்பார்க்கப் பட்ட மருந்தில் ஏகப்பட்ட பக்க விளைவுகளாம்.

முதலில் பெண்களுக்கான செக்ஸ் மருந்தையும் “இரத்த ஓட்டத்தை” அந்த இடத்தில் அதிகரிக்கும் விதத்தில் தான் உருவாக்கினார்கள். அது எடுபடவில்லை. அப்புறம் ஹார்மோன்களை வைத்து விளையாட ஆரம்பித்தார்கள் டெஸ்ட்டோஸ்ட்ரோன் எனும் ஹார்மோன் தான் பரவச நிலையின் காரணகர்த்தா. அதைத் தூண்டும் மருந்துகளைச் செய்ய முனைந்தார்கள். ஹார்மோனைத் தொட்டு விளையாடுவது ஆபத்து என அதுவும் தோல்வியிலேயே முடிந்தது. அதன் பின் மன அழுத்தம் தீர்க்கும் வித்தையைக் கொண்டு மருந்து தயாரித்துப் பார்த்தார்கள். அதுவும் பிளிபான்செரின் மூலமாக தோல்வியடைந்திருக்கிறது.

இப்போதைய லேட்டஸ்ட் தயாரிப்பு பெண்களுக்கான ஜெல் ! லிபிஜெல் என்று பெயரிடப்பட்டுள்ள இதைத் தயாரிப்பவர்கள் பயோசெனட் எனும் பிரபல மருந்து  தயாரிப்பாளர்கள். ஆனால் இதற்கும் பயனிருக்குமா ? அனுமதி கிடைக்குமா என்பதெல்லாம் ஆண்டவனுக்கே வெளிச்சம்.

இதற்கிடையில் பிரிமெலானோடைட் எனும் ஒரு புதிய மருந்தும் வருகிறது. இது ஒரு ஸ்ப்ரே ! மூக்கில் வைத்து ஸ்பிரே அடிக்க வேண்டும். அந்த வாயு நேரடியாக மூளைக்குப் போய் மூளையின் ஹைப்போத்தலாமஸ் பகுதியைத் தூண்டுமாம். அந்த ஏரியா தான் செக்ஸ் ஆர்வத்தை ஊக்கப்படுத்தும் இடம். இந்த ஸ்ப்ரேயின் சிறப்பு என்னவென்றால் , இதை ஆண்களும் பயன்படுத்தலாம் என்பது தான். ஆனால் இதுவும் இன்னும் அங்கீகரிக்கப்படவில்லை என்பது குறிப்பிட வேண்டிய விஷயம் !

இப்படி பெரும்பாலான பெண்களின் ஆர்வத்தைத் தூண்டும் மருந்துகள் தோல்வியிலேயே முடிந்தாலும் பல்வேறு விதங்களில், பெயர்களில் போலியான மருந்துகள் பெண்களை ஏமாற்றிக் கொண்டு தான் இருக்கின்றன. இவற்றில் பெரும்பாலானவை மன அழுத்தத்தைக் குறைக்கும் மருந்துகள் என்பதே உண்மையாகும்.

சரி பெண்களுக்கான ஆர்வத்தைத் தூண்டும் மருந்துகளின் தயாரிப்பு இருக்கட்டும். இந்த மருந்துகளெல்லாம் தேவை தானா ? இது உண்மையிலேயே பெண்களின் செக்ஸ் ஆர்வத்தைத் தூண்டுமா ?

உலக அளவில் எடுக்கப்பட்ட முடிவுகள் சொல்வது ஆச்சரியமளிக்கிறது. சுமார் 40 சதவீதம் பெண்கள் பாலியல் ஆர்வமே இல்லாமல் இருக்கிறார்கள். அல்லது கடலளவு இருக்க வேண்டிய ஆர்வம் சிறு டம்ளர் அளவுக்கே இருக்கிறது. எனவே, ஒருவகையில் பெண்களின் விருப்பத்தை அதிகரிப்பது அவர்களுடைய தாம்பத்ய வாழ்க்கையை வலுவாக்கும்.

செக்ஸ் ஆர்வத்தைத் தூண்டுவது என்பதே தப்பான சிந்தனை என்கிறார் டாக்டர் லெனோர் டிஃபர். நியூயார்க் மருத்துவக் கல்லூரியின் உளவியல் நிபுணர் இவர். மக்கள் மக்களோடு தான் ஆர்வம் கொள்ளவேண்டுமே தவிர செக்ஸ் ஆர்வத்தை வலுக்கட்டாயமாகத் தூண்டக் கூடாது. ஒருவேளை மருந்து சாப்பிட்டு செக்ஸ் கிடைத்தே ஆகவேண்டும் என பெண்ணின் மனம் தூண்டப்பட்டால் அது வேறு விளைவுகளையும் ஏற்படுத்தலாமல்லவா ? அப்படி ஒரு மருந்து இருந்தால் அது ஆண்களுக்கு வசதியாகிவிடக் கூடும். பெண்ணுடன் உறவை அந்த மருந்தின் மூலம் ஆண்கள் நிறைவேற்றக் கூடும். எனும் அவருடைய பயத்தில் நியாயம் இல்லாமலில்லை. 

செக்ஸ் ஆராய்ச்சியாளரான கனடாவின் ரோஸ்மெரி பாஸன் என்பவரும் இந்த விஷயத்தை எதிர்க்கிறார். பாலியல் ஆர்வம் என்பது தனிநபர் சார்ந்தது. அன்றைய பொழுது எப்படி இருந்தது ? அலுவல் எப்படி இருந்தது ? கணவனின் நடவடிக்கைகள் எப்படி இருந்தது என்பதெல்லாம் தான் பெண்ணின் ஆர்வத்தை நிர்ணயிக்கின்றன. “பெண்ணின் விருப்பமென்பது ஸ்டவ் அடுப்பு அல்ல. தேவைப்படும் போது பற்ற வைத்துக் கொள்ள,”  என காட்டமாகவே சுடுகிறார் அவர்.

எல்லா பெண்களுக்கு செக்ஸ் ஆர்வம் ஒரு குறிப்பிட்ட அளவுக்கு இருக்க வேண்டும். அது எப்போதுமே இருக்க வேண்டும். என்பதெல்லாம் ஒருவகையில் தவறான அனுமானங்கள். எந்த அளவு சரியான அளவு என்று சொல்ல முடியுமா ? என இந்த மருந்துக்கு எதிரான விமர்சனங்களும் லாஜிக் மீறாமல் தான் ஒலிக்கின்றன.

பெண்களுக்கான மருந்தை எப்படியேனும் கொண்டு வந்தே தீருவேன் என மருந்து கம்பெனிகள் மூக்கால் உழுவதற்கு ஒரே ஒரு காரணம் தான். பணம் ! வயாகரா எனும் ஒரு மாத்திரையைக் கொண்டே உச்சத்துக்குப் போய்விட்ட ஃபைசர் போல, பெண்களுக்கான ஒரு மருந்து கிடைத்தால் போதும் உச்சத்துக்கு போய்விடலாம் என கனவு காண்கின்றன நிறுவனங்கள். ஆனால் அவர்களின் பெரும்பாலானவர்கள் உண்மையான சிக்கலைச் சரிசெய்யும் முயற்சியில் இறங்கவில்லையோ என்று தான் யோசிக்கத் தோன்றுகிறது. அஸ்திவாரத்தை விட்டு விட்டு ஏழாவது மாடி கட்ட ஆசைப்படும் நிலையே பல நிறுவனங்களின் கண்டுபிடிப்புகளிலும் தெரிகின்றன.

தாம்பத்ய உறவு என்பது கணவன் மனைவியரிடையேயான புரிதலின் மூலம் வரவேண்டும். அவர்களுடைய உரையாடல், அரவணைப்பு என இந்த உறவின் நீளம் விரிவடைய வேண்டும். அதை விட்டு விட்டு மருந்தைக் குடித்து விட்டு விஷயத்தை முடிப்பதெல்லாம் எந்த அளவுக்கு ஆரோக்கியமான குடும்பத்தைக் கட்டியெழுப்பும் என்பது சொல்வதற்கில்லை.

ஆர்வமும் விருப்பமும் யாரும் கட்டளையிடுவதால் வராது என்பதே உண்மை. அதனால் தான் மருத்துவம் பெண்களின் செக்ஸ் ஆர்வத்தைத் தூண்டும் முயற்சியில் பின்னடைவைச் சந்திக்கக் காரணம். சொல்லப் போனால் ஆண்களின் ஆர்வத்தையும் எந்த மருந்தும் அதிகரிப்பதில்லை. அவர்களுடைய ஆண்மைக் குறைவை நிவர்த்தி செய்கிறது அவ்வளவு தான். எனவே இத்தகைய மருந்துகளை ஒதுக்கி விட்டு, இலகுவான மனநிலையுடன் குடும்ப வாழ்க்கையை ஆனந்தமாய் அணுகுவதே நிரந்தரத் தீர்வாக முடியும்.

நன்றி : பெண்ணே நீ

பிடித்திருந்தால் வாக்களியுங்கள்….

இலக்கியவாதி ரஜினி ரசிகராய் இருக்கலாமா ?

பத்திரிகை உலக நண்பர் ஒருவருடன் பேசிக்கொண்டிருந்தேன். பேச்சின் இடையே எந்திரன் பற்றிய பேச்சும் வந்தது. அது வராம ஒரு பேச்சு இப்பல்லாம் இருக்க முடியுமா என்ன ?

“எந்திரன் பாட்டு கேட்டீங்களா ? ” என்று கேட்டார்.

“நல்லாயிருக்கு… ரொம்ப ரசிச்சு கேக்கறேன். கார்க்கியோட வரிகள் தான் அவ்வளவு ரசிக்கும்படியா இல்லை” ன்னு சொன்னேன்.

“உங்களுக்கு எந்திரன் பாட்டு புடிச்சிருந்துதா ?” என்று அவர் ஒரு உலக மகா ஆச்சரியத்துடன் கேட்டார். ஏதோ நான் சொல்லக் கூடாததைச் சொன்னது போல ! “ஆமா.. நான் ரஜினி ரசிகன். அதனால எனக்கு பாட்டு ரொம்பவே புடிச்சிருந்துது” என்றேன்.

“இதைச் சொல்ல உங்களுக்கு வெக்கமாயில்லையா ?” என்றார் பட்டென்று.

“பாட்டு புடிச்சிருக்குன்னு சொல்றதுக்குக் கூட வெக்கப்படணுமா என்ன?” என்றேன்

அதைச் சொல்லல. ரஜினி ரசிகர்ன்னு சொல்றீங்களே ! ஒரு எழுத்தாளர் இப்படி சொல்லலாமா ? என்று ஆரம்பித்தார். அப்புறம் அவரோட பட்டறிவு அகராதியிலிருந்து ஏதேதோ பேசிக்கொண்டிருந்தார். நம்ம சின்ன மூளைக்குள் அதெல்லாம் சென்று சேரவில்லை. அவரோட பேச்சு தான் ஆச்சரியத்தையும், கேள்விகளையும் எழுப்பி விட்டுக்கொண்டிருந்தது.

ஒருவேளை இலக்கியவாதியாய் இருப்பவர்களுக்கு ரஜினியைப் பிடிக்கவே கூடாது என்று ஏதேனும் விதிமுறை வைத்திருக்கிறார்களோ என்னவோ ?

நான் பொதுவாகவே அறிவு ஜீவிகளை விட்டுத் தள்ளியே இருக்க விரும்புவேன். அதுக்குக் காரணம் இல்லாமலில்லை. “நாளைக்கு என்ன பண்றதுன்னு யோசிக்கல” ங்கற ஒரு வரியையே “அடுத்த நாளைக்குறித்த பிரக்ஞையற்று வனாந்தர வெளியில் வட்டமடிக்கிறது மனசு” என்று எழுதினால் தான் இலக்கியம் என்று பேசுபவர்கள் சுத்த போர் எனக்கு. ஒரு பக்கக் கட்டுரையை அரை நாள் படிக்குமளவுக்கு சுழற்றிச் சுழற்றி எழுதும் பலரை நான் நிராகரித்ததுண்டு. தினத்தந்தி ரேஞ்சுக்கு சிம்பிளா இருந்தா போதும் என்பது என் சிந்தனை. எழுத்து என்பது தமிழ் தெரிந்த எல்லோருக்குமே புரியவேண்டும், இலக்கியம் தெரிந்தவர்களுக்கு மட்டுமல்ல.

சினிமா குறித்த பேச்சுகளில் ரஷ்ய படம், ஈரானிய படம், குறும்படம் என்று நான்கு விஷயம் பேசுவதை கௌரவமாய் நினைப்பவர்கள் உண்டு. கூகுளில் தேடி பெயரைப் படித்து விட்டு வருவார்களோ எனும் சந்தேகம் எனக்குண்டு.

ஒரு இலக்கிய விமர்சகர் ஒருவரிடம் ரெண்டு மாதங்களுக்கு முன்பு ஒரு நாள் பேசிக்கொண்டிருந்தேன். அவர் சார்த்தரைத் தவிர வேறு யாரைப் பற்றியும் பேசுவதாய் இல்லை. உங்களுக்கு சார்த்தரைப் பிடிக்குமா என்றார்.

“ஆல்ஃபர்ட் மால்கம் எழுதிய சூயிசைடல் திங்கிங் தான் எனக்குப் பிடிச்ச நூல்” படிச்சுப் பாருங்க, அசந்துடுவீங்க என்றேன். அப்படி ஒரு நூலும் கிடையாது, எழுத்தாளரும் கிடையாது.

“அந்த புக் பற்றிக் கேள்விப்பட்டிருக்கேன்.. ஆனா படிச்சதில்லை” என்றார் அவர். இல்லாத ஒரு புக்கைச் சொன்னால் கூட கேள்விப்பட்டிருக்கிறேன் என்று சொல்வதே கவுரவம் என்று நினைக்கிறாரே என உள்ளுக்குள் சிரித்துக் கொண்டேன்.

எதுக்குத் தான் இப்படி அடுத்தவங்களுக்காக வாழறாங்களோ மக்கள். இவர்களைப் பார்க்கும் போதெல்லாம் “இது என்னோட அப்பான்னு சொல்ல வெக்கப்படற பையன்” கதை தான் ஞாபகத்துக்கு வரும். என்னைப் பொறுத்தவரை, ரசனையில் உயர் ரசனை கீழ் ரசனை என்றெல்லாம் கிடையாது. அது தனிப்பட்ட சிலிர்ப்புகள் சார்ந்தது. அதீத ரசனை பற்றிப் பேசற சிலர் தங்களோட தனி வாழ்க்கையில் நிகழ்த்தும் சில “ஆங்…” ரக ரகசிய ரசனைகள் நமக்குத் தெரியாததா ?

சரி அதெல்லாம் இருக்கட்டும், எந்திரன் பிரிவியூ டிக்கெட் ஒண்ணு கிடைக்குமா ?

 

பிடித்திருந்தால் வாக்களியுங்கள்

எனக்கு வந்த மின்னஞ்சல்…

அந்த மின்னஞ்சல் என்னைப் புரட்டிப் போட்டது. அண்ணா என்று அழைத்த அந்தக் கடிதம் “திருமணம் ஆகி மூன்றே மாதத்தில் கணவரை விபத்தில் பறி கொடுத்து விட்டேன். அவர் நினைவில் வாழும் எனக்கு, எனக்கே எனக்காய் ஒரு கவிதை எழுதித் தருவீர்களா ?” என்று வலியுடனும் உரிமையுடனும் அந்தக் கடிதம் விண்ணப்பம் வைத்திருந்தது. ஏதோ ஒரு முகம் தெரியாத சகோதரியின் மனக் குரலின் வார்த்தை வடிவமாய் அது என்னை அறைந்தது.

எத்தனையோ விதமான கடிதங்களின் மத்தியில் எனது அன்றைய தினத்தைப் கசக்கிப் போட்ட கடிதமாய் அது அமைந்து விட்டது. வாழ்க்கையில் துயரங்களின் பக்கத்தில் அமர்ந்திருக்கும் அந்த சகோதரியின் நிலை மனதுக்குள் இனம் புரியாத ஒரு இருளை உருவாக்கியது. தனது சோகத்தைச் சொல்லி நம்மிடம் ஒரு கவிதை கேட்கிறார்களே என்றபோது மனம் கனத்தது.

அன்றே ஒரு நீண்ட கவிதையை எழுதி அனுப்பினேன். துயரத்தின் வலிகளைச் சொல்லி பின்னர் வாழ்வின் இனிமையைச் சொல்லி கடைசியில் வாழ்வதற்கான நம்பிக்கையைச் சொல்லி அந்தக் கவிதையை முடித்திருந்தேன். எந்த வரிகளும் அவருடைய தன்னம்பிக்கையின் முனையை இம்மியளவும் சிதைக்காமல், அவருக்கு வாழ வேண்டும் எனும் உந்துதலைத் தரவேண்டுமென கவனமாய் எழுதினேன். எனக்கு அதில் முழு திருப்தி வந்தபின்பு அதை அனுப்பினேன்.

அந்தக் கவிதை அவருடைய மனதில் எத்தகைய மாற்றங்களை விளைவித்ததென்று தெரியவில்லை. கண்ணீரும், ஆனந்தமும், ஆயிரம் நன்றிகளுமாய் அவருடைய பதில் மடல் அடுத்த நாளே என்னை வந்து சேர்ந்தது. “கவிதையைத் தொடர்ந்து வாசித்துக் கொண்டே இருக்கிறேன். எப்போதெல்லாம் மனசு கனக்கிறதோ அப்போதெல்லாம் உங்கள் கவிதைச்சாலை தளத்துக்கு வருவேன். மனம் இலகுவாகும். கவிதைகளின் மீது எனக்கு அவ்வளவு பிரியம். இப்போது இந்தக் கவிதை எனக்கு வாழ்வின் மீதான ஒரு நம்பிக்கையையும், பிடிமானத்தையும் தந்திருக்கிறது” என்று சொன்னார்கள்.

கவிதைகளால் ஆய பயன் என்ன” என்று வாழ்க்கையைப் புரியாதவர்கள் இன்னும் கேட்டுக் கொண்டு தான் இருக்கிறார்கள்

தமிழிஷில் வாக்களிக்க…

த கராட்டே கிட்- எனது பார்வையில்

 

பார்க்க வேண்டும் என நினைத்து நினைத்து கடைசியில் பார்த்தே விட்டேன். ஹாலிவுட் வில்ஸ்மித் பையன், பொடியன் ஜேடன் ஸ்மித் தான் கதையின் ஹீரோ. கால் நூற்றாண்டுகளுக்கு முன்பு வந்த தி கராட்டே கிட் திரைப்படத்தின் மறு பதிப்பு தான் இந்த புதிய படம்.

கதை ? அமெரிக்காவின் டெட்ராய்டிலிருந்து சீனாவுக்கு குடிபெயர்கின்றனர் ஜேடனும் அம்மாவும். இனிமேல் டெட்ராய்டில் எதுவுமே இல்லை எனும் சூழல். மிச்சமுள்ள வாழ்க்கை சீனாவில் தான். சீனா வந்ததும் பூங்காவில் விளையாடப் போகும் ஜேடனுக்கு அறிமுகமாகிறாள் ஒரு பதின் வயதுத் தோழி. வழக்கம் போலவே அதைச் சகித்துக் கொள்ள முடியாத பதின் வயதுப் பசங்க ஜேடனை அடித்து விடுகிறார்கள். போதாக்குறைக்கு வில்லன் சிறுவர்கள், தோழி, ஜேடன் என எல்லாருமே ஒரே பள்ளிக்கூடத்தில் படிக்க வேண்டிய கட்டாயம்.

நம்ம ஜாக்கி சான், ஜேடன் தங்கியிருக்கும் அப்பார்ட்மெண்டின் மெயிண்டனன்ஸ் மேன். ஆர்ப்பாட்டமெல்லாம் செய்யாமல் தானுண்டு தன் வேலையுண்டு என திரியும் ஒரு முதுமை மனிதர். ஒரு நாள் ஜேடனை அவருடைய வீட்டு வாசலில் வைத்தே ஆறு மாணவர்கள் புரட்டி எடுக்க, காப்பாற்றுகிறார் த ஃபாஸ்ட் ஃபைட்டர் ஜாக்கிசான்.

அந்த சண்டை போட்ட சிறுவர்களின் மாஸ்டரிடம் போய் “சமாதானம் பேச வந்திருக்கேன். இனிமே சண்டை வேண்டாம்” ன்னு சொல்ல, அந்த மாஸ்டரோ எதிர்பார்த்தபடியே வில்லன். சண்டைல இரக்கமெல்லாம் காட்டக் கூடாது என பசங்களுக்குப் பாடம் எடுப்பவர். பிரபல கங் ஃபூ மாஸ்டர். சமாதானம் வேணும்ன்னா உங்க ரெண்டு பேருல யாராச்சும் ஒருத்தர் சண்டை போடணும் என்கிறார் அவர். வழக்கமான படமாய் இருந்திருந்தால் ஜாக்கி சான் சட்டையைக் கழற்றி, பட்டையைக் கிளப்பியிருப்பார். இந்தப் படத்தில் “இந்த பையன் வரப்போற போட்டில கலந்து சண்டை போடுவான்” என சொல்கிறார். வழக்கம் போலவே வில்லன் நக்கலடிக்க, பையனின் மாஸ்டராகிறார் ஜாக்கி.

கடைசியில் பையன் போட்டியில் வென்றானா இல்லையா என்பதை திரையில் காணாமலேயே சொல்லி விடுவோம் எல்லோருமே !

அதிரடி சண்டைக்காரர் ஜாக்கிசானுக்கு வயதாகிவிட்டது. அந்த வயதுக்கேற்ற ஒரு வேடத்தைப் பிடித்திருக்கிறார். இதுவரை அவரிடம் கவனிக்க மறந்து போன நுணுக்கமான உடல் அசைவுகளை இதில் கவனிக்க. இருந்தாலும் ஜாக்கிசான் என்றாலே பறந்து பறந்து பதறடிக்க வேண்டாமா ? ம்ம்… என்ன செய்ய !

ஜேடன் எண்பதடி பாய்ந்த குட்டி. ஆணா, பெண்ணா என்றே குழம்புமளவுக்கு மழலை முகம். கசிந்து அழும் காட்சியில் அப்படியே செவன் பவுண்ட்ஸ் வில்ஸ்மித்தின் மினியேச்சராய் தெரிகிறார். தனுஷுன் சுள்ளான் எல்லாம் பார்த்துப் பழகிப் போனதால் ஜேடனின் பென்சில் உருவம் நம்மை ரொம்ப டென்ஷன் ஆக்கவில்லை என்பது கொசுறுச் செய்தி.

படத்துக்கு ஏன் கராத்தே கிட் என்று பெயர்வைத்தார்கள் என்பது ஹாலிவுட் கடவுளுக்கே வெளிச்சம். படத்தில் படிப்பதென்னவோ கங் ஃபூ தான். நாம நினைக்கிற பிளாக் பெல்ட் சமாச்சாரங்கள் ஏதும் இல்லை. அதனால் தான் சீனாவில் உஷாராக “த கங்ஃபூ டிரீம்” என்று பெயரிட்டிருக்கிறார்கள் ! “நாம செய்ற எல்லா செயல்லயுமே கங் ஃபூ இருக்கிறது. இது சண்டை அல்ல சமாதானம் ” என வசனங்கள் ஆங்காங்கே பளிச்.

பிரமிக்க வைக்கும் ஒளிப்பதிவு, இசை, காட்சிகள் என படம் தொய்வில்லாமல் போகிறது. ஐஸ்வர்யா ராயும், பிரசாந்தும் ஓடி நடந்த சீனப் பெருஞ்சுவரை இன்னும் அழகாய்க் காட்டியிருக்கிறார்கள். உள்ளொளிப் பயணம், பாம்பை மயக்கும் சண்டை, ஜாக்கியின் உடைய வைக்கும் பிளாஷ்பேக் என கதையின் பயணம் பார்வையாளரைக் கட்டிப் போட்டு விடுகிறது. சீனாவின் கலாச்சாரத்தை, ஜேடனின் தலை முடியைத் தொட்டுப் பார்க்க விரும்பும் தோழியின் வழியாய் காட்டி விடுகிறார்கள், அழகான காட்சியமைப்பு.

ஹீரோ சண்டையிட்டு ஜெயிக்கும் அக்மார்க் கதை தான் என்றாலும் அதை பரபரப்பும், அழகும், வசீகரமுமாகக் காட்டியதில் கராத்தே கிட் வசீகரிக்கிறது. என்ன தான் இருந்தாலும் சீனாவுக்குள்ளே வந்து ஒரு அமெரிக்க சிறுவன் சீனர்களை அடித்து வெற்றி பெறுகிறானே ? என்று ஏதேனும் சீனப் பத்திரிகை விமர்சனம் எழுதியிருந்தாலும் ஆச்சரியப்படுவதற்கில்லை.

கதை ராபர்ட் மார்க், திரைக்கதை கிறிஸ்டோபர். இசை, அவதார், அப்போகாலிப்டோ என அசத்திய ஜேம்ஸ் ஹார்னர். இயக்கம் ஹெரால்ட் ஸ்வார்ட்.

பார்க்கலாமா வேண்டாமா என இருதலைக் கொள்ளியாய் இருக்கும் நண்பர்களுக்கு “தைரியமாய்ப் பாருங்கள்” என்று தான் சொல்வேன்.

 

CLICK HERE TO VOTE………

ராகுல் காந்தி : என்னுடைய புதிய நூல்

 

ராகுல் காந்தி – மாற்றங்களின் நாயகன் எனும் என்னுடைய புதிய நூல் ஒன்று வெளியாகியிருக்கிறது. பிளாக் ஹோல் மீடியா பதிப்பகத்தின் வழியாக வெளியாகியிருக்கும் இந்த நூல் ராகுல் காந்தியின் தனி வாழ்க்கையையும், அவருடைய அரசியல் வாழ்க்கையையும் அலசுகிறது.

ராகுல் காந்தியைக் குறித்து தமிழில் வெளியாகும் முதல் நூல் இது என்று நினைக்கிறேன்.

வாய்ப்புக் கிடைத்தால் வாசித்துப் பாருங்கள். வாசித்தால் உங்கள் கருத்துக்களைச் சொல்லுங்கள்.

 

பிளாக் ஹோல் மீடியா பப்ளிகேஷன் லிமிடெட், எண் 75, ஏகாம்பர தபேதார் தெரு, ஆலந்தூர் , சென்னை – 16

9600086474

91-44-43534303/ 43534304

admim@blackholemedia.in

www.blackholemedia.in

Please Vote