பைபிள் மனிதர்கள் 44 (தினத்தந்தி) சிமயி

 

பைபிளில் மனிதர்களில் அதிகம் அறியப்படாத நபர்களில் ஒருவர் சிமயி. தாவீது மன்னனின் குடும்பம் தான் இவனுடைய குடும்பமும்.  தாவீது மன்னனுடைய ஆட்சிக்காலத்தில் ஒரு சிக்கல் எழுகிறது. அவருடைய மகன் அப்சலோம் தாவீதுக்கு எதிரியாக மாறுகிறான். தாவீது மன்னனுக்கு தர்ம சங்கடமான நிலை. உயிர் பிழைக்க தப்பி ஓடுகிறார். தான் நேசிக்கும் மகனே தன்னை கொல்லத் தேடுகிறானே எனும் பெருங் கவலையோடு.

அவர் தனது ஆதரவாளர்களுடன் எருசலேம் செல்கிறார். யானை சேற்றில் புதைந்தால் சுண்டெலி கூட வந்து உதைக்கும் என்பார்கள். அதே போல, தாவீது மன்னனின் வீழ்ச்சி மக்களிடம் அவமானத்தைக் கொண்டு வந்தது. தாவீது பகூரிம் என்னுமிடத்துக்கு வந்தபோது சிமயி வந்தான்.

அவன் கோபத்துடனும், வெறுப்புடனும் தாவீதையும் அவன் கூட இருந்தவர்களையும் பழித்துரைத்தான். கற்களைப் பொறுக்கி எல்லோர் மேலும் எறிந்தான். “இரத்த வெறியனே, பரத்தை மகனே. சவுலுக்குப் பதிலாக நீ ஆட்சி செய்தாய். இப்போது உன் மகன் உனக்குப் பதிலாய் ஆட்சி செய்வான். நீ இரத்த வெறியன். உனக்கு அழிவு நிச்சயம்” என சபித்தான்.

மன்னனாக அரியணையில் இருந்தவர். அவர் முன்னால் நிற்பதற்கே மற்றவர்கள் பயப்படுவார்கள். இப்போதும் ஒன்றும் கெட்டுப் போய்விடவில்லை. தாவீதைச் சுற்றி அவனைப் பாதுகாக்கவும், உதவி செய்யவும் ஏராளம் வீரர்கள் உண்டு.

தாவீதுடன் இருந்தவர்களில் ஒருவன் தாவீதின் சகோதரி செரூயாவின் மகன் வீரனான அபிசாய். அவனுக்கு கடும் கோபம். நேராக தாவீது மன்னனிடம் வந்தான்.

“அரசே.. இவன் ஒரு செத்த நாய். இவன் உங்களைப் பழித்துப் பேசுவதா. ஒரு வார்த்தை சொல்லுங்கள்,. இவனுடைய தலையை வெட்டி வீசுகிறேன்”

தாவீது அமைதி காத்தார். “வேண்டாம். நான் பெற்ற மகனே என்னைக் கொல்லத் தேடுகிறான். இவன் பேசுவதில் என்ன இருக்கிறது. ஒருவேளை கடவுளே கூட இவனைத் தூண்டிவிட்டு பேசச் செய்திருக்கலாம். நாம் அமைதியாய் இருப்போம். இந்த பொறுமைக்காகக் கடவுள் நமக்கு நன்மை செய்வார்” என்றார்.

நாட்கள் செல்கின்றன. இப்போது காட்சிகள் மாறுகின்றன. தாவீது மன்னன் மீண்டும் அரியணையில் அமர்கிறார். எதிர்ப்பாளரான அவருடைய மகன் கொல்லப்படுகிறான்.

தாவீது மன்னர் யோர்தான் ஆற்றின் கரையில் வந்தார். அப்போது சிமயி தாவீது மன்னனைத் தேடி வந்தான். தாவீதின் முன்னால் சென்று தரையில் விழுந்தான் சிமயி.

“மன்னரே மன்னியும். நான் செய்தது பெரும் பாவம். பழைய நிகழ்ச்சிகளை எல்லாம் மனதில் வைக்காதீர்கள். மன்னியுங்கள் என கெஞ்சினான்”. அபிசாய் அப்போதும் பக்கத்தில் இருந்தார்.

“மன்னரே, கடவுளால் திருப்பொழிவு செய்யப்பட்ட ஒருவரைப் பழித்ததற்காக இவனைக் கொல்லவா ?” என்று கேட்டார். அப்போதும் தாவீது இரக்கம் காட்டினார். “வேண்டாம் விட்டு விடு” என்றார்.

காலம் கடந்தது. இப்போது தாவீது மன்னன் மரணப் படுக்கையில். அவருடைய மகன் சாலமோன் அரியணையில். தனது மரணத்துக்கு முந்திய வினாடிகளில் தாவீது சாலமோனை அழைத்தார்.

“மகனே, சிமயி உன்னோடு இருக்கிறான். அவன் என்னைப் பழித்து சபித்தான். நான் அவனை மன்னித்தேன். ஆனால் நீ அப்படிச் செய்யாதே. அவன் இரத்தத்தில் தோய்ந்து இறந்து போகும்படி செய்” என சொல்லி விட்டு இறந்து போனார்.

சாலமோன் சிமயியை வரவழைத்தான். ஆனால் கொல்லவில்லை. “நீ எருசலேமிலேயே ஒரு வீட்டில் தங்கியிரு. என்றைக்கு நீ கெதரோன் நீரோடையைக் கடப்பாயோ, அன்று நிச்சயம் கொல்லப்படுவாய்” என்றார்.

சிமயி தலை தப்பியது தம்பிரான் புண்ணியம் என எருசலேமில் தஞ்சம் புகுந்தான். மூன்று ஆண்டுகள் சுமூகமாக ஓடின. இப்போது அவனுடன் இருந்த இரண்டு அடிமைகள் அவனை விட்டு விட்டு காத் எனும் வேறு ஒரு ஊருக்குப் போய்விட்டார்கள். சிமயி மன்னனுக்குச் செய்த உடன்படிக்கையை மறந்தான். எருசலேமை விட்டு வெளியேறி காத்துக்குச் சென்று அவர்களைக் கூட்டி வந்தான். விஷயம் சாலமோன் காதுகளுக்குச் சென்றது. சிமயியை வரவழைத்தார்.

“நீ வெளியேறிச் சென்றால் கொல்லப்படுவாய் என்று சொன்னேனல்லவா. நீயும் ஆண்டவர் மீது ஆணையிட்டாயே ? என்னாயிற்று ? நீ செய்த பாவங்களுக்குத் தண்டனை பெற வேண்டும் என்பதற்காகத் தான் கடவுள் உன்னை இப்படி நடத்தியிருக்கிறார் போலும்” என்றான்.  சிமயி கதிகலங்கி நின்றான்.

“சிமயியைக் கொன்று விடு” என தனது வீரன் பெனாயாவுக்குக் கட்டளையிட்டார் சாலமோன் சிமயி கொல்லப்பட்டான்.

சிமயியின் வாழ்க்கை இரண்டு விஷயங்களைச் சொல்கிறது.

தாவீதைப் போல கடவுளோடு தொடர்ந்து நடந்த ஒரு மனிதன் கூட தனது மனதில் பழிவாங்குதல் எனும் பாவ உணர்வைக் கொண்டிருக்கலாம் எனும் எச்சரிக்கை முதலாவது. ஆண்டவரை விட  பொருளாசை தேவை என ஓடினால் அழிவு நிச்சயம் எனும் பாடம் இரண்டாவது.

*

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s