பைபிள் மனிதர்கள் 45 (தினத்தந்தி) சேபாவின் அரசி

இஸ்ரயேலர்களின் மன்னனாக சாலமோன் விளங்கிய காலம். அவருக்கு அளவில்லா ஞானத்தையும், அறிவையும் கடவுள் வழங்கினார். அதனால் அவருடைய புகழ் உலகின் பல பாகங்களிலும் பரவியது.

அவருடைய புகழைக் கேள்விப்பட்டார் சேபா நாட்டின் அரசி. காண வருவது மன்னரையல்லவா ? எனவே ஏராளமான செல்வங்களை அவள் தன்னோடு கொண்டு வந்தாள். நறுமணப் பொருட்கள், பொன், விலையுயர்ந்த கற்கள், ஒட்டங்கள் என அவள் கொண்டு வந்தவற்றின் கணக்கைக் கேட்டால் வியப்படையாமல் இருக்க முடியாது.

மன்னருக்கு பரிசாய்க் கொடுத்த பொன் மட்டும் நாலாயிரத்து எண்ணூறு கிலோ. கப்பல்களில் வந்திறங்கின வாசனை மரங்களும், விலையுயர்ந்த கற்களும். அதன் பிறகு யாருமே சாலமோன் மன்னனுக்கு அந்த அளவுக்கு அள்ளிக் கொடுக்கவில்லை எனுமளவுக்கு செல்வக் குவியலை அவள் பரிசாகக் கொண்டு வந்தாள்.

மன்னனின் முன்னால் வந்து நின்ற அவள் தனது கேள்விகளினால் மன்னனை சோதித்தாள். சாலமோன் மன்னன் அறிவிலும், ஞானத்திலும் சிறந்து விளங்கியவர். அவருக்கு அரசியின் கேள்விகளை எதிர்கொள்வதில் சிரமம் இருக்கவில்லை. விடுகதைகள், புதிர்கள், கேள்விகள் என எல்லாவற்றையும் மிகச் சிறப்பாக எதிர்கொண்டார் சாலமோன்.

அரசி வியந்தாள். சாலமோனின் அறிவு ஒரு புறம் அவளைக் கட்டிப் போட்டது. மறுபுறம் சாலமோனின் செல்வச் செழிப்பு அவளை மலைக்க வைத்தது. அவருடைய அரண்மனையின் அழகு அவளை வியக்க வைத்தது. அந்த அரண்மனை சாலமோன் மன்னன் பதின்மூன்று ஆண்டுகள் செலவழித்துக் கட்டிய மாபெரும் அரண்மனை !

அவருடைய அரண்மனையில் பணி செய்யும் மக்கள் அரசியை இன்னும் மலைக்க வைத்தார்கள். அவர்கள் அனைவருக்கும் அழகான சீருடைகள் இருந்தன. மிகவும் சுறு சுறுப்புடன் அவர்கள் நடந்து கொண்டனர். பரிமாறுபவர்கள் மிகப் பெரிய திறமை சாலிகளாக இருந்தார்கள்.

கடைசியாக மன்னனின் கடவுள் பக்தி அவரை மிகவும் ஈர்த்தது. அவர் ஆண்டவருக்காய் செலுத்திய மாபெரும் எரிபலிகளைக் கண்டபோது பேச்சற்றுப் போனார். எல்லாவற்றையும் பார்த்தபின்னர் மன்னரை நோக்கி,

மன்னரே. எங்கள் நாட்டில் உங்களைப் பற்றி உயர்வாகப் பேசினார்கள். நீங்கள் அறிவிலும் ஞானத்திலும் பெரியவர், செல்வத்தில் வல்லவர் என்றெல்லாம் கூறினார்கள். நான் அவற்றை நம்பவேயில்லை. நேரில் வந்து பார்க்கும் போதுதான் தெரிகிறது உமது புகழ்.

‘உண்மையைச் சொல்லவேண்டுமென்றால், அவர்கள் உமது புகழில் பாதியைக் கூட சொல்லவில்லை என்பதே உண்மை. உமது ஞானமும் செல்வமும் அவர்கள் சொன்னதை விட மிகுதியாகவே இருக்கிறது. உமது மனைவியரும், பணியாளரும் பாக்கியம் செய்தவர்கள். கடவுள் போற்றப்படுவாராக’ என வாழ்த்தினார் அரசி.

சாலமோன் மன்னனும் விருந்தோம்பலில் குறை வைக்கவில்லை. சேபா நாட்டு அரசிக்கு ஏராளமான பரிசுகளைக் கொடுத்தார். அது மட்டுமல்லாமல் அவர் எதையெல்லாம் விரும்பிக் கேட்டாரோ அவற்றையெல்லாம் அவர் அவருக்குக் கொடுத்தார்.

அரசி மகிழ்ச்சியடைந்தார். தனது பணியாளர்களோடு சொந்த நாட்டுக்குத் திரும்பிச் சென்றார்.

உலகில் இவரைப் போல யாரும் செல்வச் செழிப்பாய் இருந்ததில்லை என சொல்லுமளவுக்கு செல்வத்தில் புரண்டவர் சாலமோன் மன்னன். ஆண்டு தோறும் அவருக்கு பரிசாகக் கிடைக்கும் பொன்னின் எடை மட்டுமே சுமார் இருபத்து ஏழாயிரம் கிலோ. அவருடைய மாளிகைகள், பயன்பாட்டுப் பொருட்கள், அரியணைகள் என எல்லாமே தங்க மயமாய்க் காட்சியளித்தன. வெள்ளியைப் பயன்படுத்துவதே கவுரவக் குறைச்சல் எனும் நிலை இருந்தது.

சேபா நாட்டு இளவரசியைக் குறித்த குறிப்புகள் பெரும்பாலான மதக் குறிப்புகளில் காணப்படுகின்றன. பைபிளைத் தவிர, குரான், யூத நூல்கள், எத்தியோப்பியக் கலாச்சாரப் பதிவுகள் என பல இடங்களில் அரசி குறித்த செய்திகள் இடம் பெறுகின்றன. ஒரு சில சின்ன மாறுதல்களுடன்.

அவற்றில் ஒரு கதை சுவாரஸ்யமானது. அரசிக்கு கழுதைக் கால்கள் என்றும், கால்களில் நிறைய ரோமம் உண்டு என்றும் செய்திகள் உலவின‌. அதைத் தெரிந்து கொள்வதற்காக சாலமோன் மன்னன் தனது அரண்மனையின் தரையை பளபளப்பாக்கி தண்ணீரைப் போல வைத்திருந்தார். தண்ணீர் தான் கிடக்கிறது என நினைத்த அரசி தனது ஆடையை சற்றே தூக்கி நடந்தபோது அவருடைய கால்கள் வெளிப்பட்டன, கால்களின் உண்மை நிலை தெரிய வந்தது என்பது ஒரு கதை.

சேபா இளவரசி வியக்குமளவுக்கு கடவுளுக்குப் பலிகள் செலுத்திய சாலமோன், பின்னர் வழி விலகினார். வேற்று தெய்வங்களை வழிபடும் பெண்களை சகட்டு மேனிக்கு திருமணம் செய்து கொண்டார். அவருக்கு எழுநூறு மனைவியரும், முன்னூறு வைப்பாட்டியரும் இருந்தனர்.

உலகப் புகழ்பெற்ற ஞானியாய், அறிவாளியாய் இருந்தாலும் ஆன்மீகத்தில் சறுக்கி விடாத கவனம் தேவை. மிகச் சிறந்த நீதி நூல்களை எழுதினாலும், செபங்கள் செய்தாலும், பாடல்கள் எழுதினாலும் கடவுளை விட்டு விலகி நடந்தால் விண்ணக வாழ்வுக்குச் செல்வது சாத்தியமற்றது என்பதையே சாலமோன் மன்னனின் வாழ்க்கை நமக்குப் படம் பிடித்துக் காட்டுகிறது.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s