வெளியூர் போனா வீடு பத்திரமா இருக்குமா ?

 

“ஹாய் மாலதி எப்படி இருக்கே ?”

“நல்லா இருக்கேன் ரம்யா…நீ எப்படி இருக்கே ? என்ன ஒரு சர்ப்ரைஸ் கால்…”

“என்னத்த சொல்றது. ஒரே ஊர்ல இருக்கோம் ஆனாலும் பாத்து பல மாசங்களாச்சு. அப்பப்போ போன்ல நாலுவார்த்தை பேசறதோட சரி”

“என்ன பண்ண சொல்றே ? நான் பிரீயா இருக்கும்போ உனக்கு வேலை வந்துடுது. உனக்கு நேரம் இருக்கும்போ எனக்கு ஏதாச்சும் ஒரு வேலை வந்துடுது” ரம்யாவின் குரலில் நட்பின் சிரிப்பு வழிந்தது.

“சரி… எனி திங் இண்டரஸ்டிங் ?”

“ஆமா.. நான் இரண்டு வாரம் லீவ்ல குடும்பத்தோட ஊர் சுத்த போறேன்” ரம்யாவின் குரலில் உற்சாகம் சிறகு விரித்தது.

“வாவ்… ரெண்டு வாரமா ? எப்படி லீவ் கிடைச்சுது ? உன் மேனேஜர் தான் லீவே தராத கஞ்சப் பயலாச்சே…. “

“அதையேன்டி கேக்கறே… ஆறு மாசத்துக்கு முன்னாடியே அவர் கிட்டே கெஞ்சி கூத்தாடி ரெண்டு வாரம் லீவ் வாங்கியிருக்கேன். பாவம் குழந்தைங்க, வீட்லயே அடஞ்சு கிடந்து ரொம்பவே சோர்ந்து போயிட்டாங்க”

“ஆமாமா….  குழந்தைங்க கூட நேரம் செலவிடவே முடியறதில்லை. அப்பப்போ வெளியேவாவது கூட்டிட்டு போறது ரொம்ப நல்லது !” சொன்ன மாலதி தொடர்ந்தாள், “சரி எங்கே போறீங்க ?”

“தாய்லாந்து ! “

“வாவ்… கடல் கடந்த பயணமா ? சூப்பர்….”

“ஆனா மனசுக்குள்ள ஒரு சின்ன பயம் இருந்துட்டே இருக்குடி…” ரம்யா சொன்னாள்.

“என்னடி பயம் ? பறக்கறதுக்கு பயமா ?”

“சே…சே… அதெல்லாம் ஒண்ணுமில்லை. தினமும் நியூஸ் பேப்பரைப் படிக்கிறேன். பூட்டிய வீட்டில் கொள்ளை, பட்டப் பகலில் கொள்ளைன்னு ஒரே டென்ஷன். நான் வேற இரண்டு வாரத்துக்கு வீட்டை அம்போன்னு விட்டுட்டு போயிடப் போறேன். எவனாவது வந்து சுத்தமா தொடச்சிட்டு போயிடுவானோன்னு நினைச்சா பக்குன்னு இருக்கு” ரம்யாவின் குரலில் கவலை அடர்த்தியாய் இருந்தது.

“ஒரு ரெண்டு வாரத்துக்கு உன் வீட்ல யாரையாவது தங்க வைக்கலாமே ? சொந்தக்காரங்க, பிரண்ட்ஸ் இப்படி யாராச்சும்  ?”

“பாத்தேன். அப்படி யாரும் கிடைக்கல.”

“அப்போ உன்னோட பயம் நியாயமானது தான்.  ஆனா, கொஞ்சம் உஷாரா இருந்தா இந்த சிக்கலையெல்லாம் சமாளிக்கவும் வழி இருக்கு….” மாலதி சொன்னாள்.

“சரி… என்னென்ன பண்ணனும்ன்னு கொஞ்சம் ஐடியா கொடேன்” ரம்யா கேட்க மாலதி ஆரம்பித்தாள்.

முதல்ல வீட்ல இருக்கிற எல்லா எலக்ட்ரிக் சமாச்சாரத்தோட கனக்ஷனையும் உருவி விட்டுடு. சார்ஜர், டிவி, கம்ப்யூட்டர் எதுவுமே பிளக் பாயிண்ட்ல மாட்டியிருக்காம பாத்துக்கோ. எலக்ட்ரிக் தீ விபத்துல இருந்து தப்பிக்க இது ரொம்ப முக்கியம். சட்டு புட்டுன்னு காலநிலை மாறி மின்னல் ஏதாச்சும் வந்தா கூட எல்லா பொருளும் பாதுகாப்பா இருக்கும்.

அதேமாதிரி கேஸ் நல்லா மூடியிருக்கட்டும். பாதுகாப்பான இடத்துல கேஸ் சிலிண்டரை வைக்கிறது உத்தமம்.

எல்லா சன்னல்களையும், கதவுகளையும் பூட்டு வாங்கி இழுத்துப் பூட்டு. வீட்டை இலட்சக்கணக்கில செலவு பண்ணி கட்டிட்டு பூட்டு வாங்க கஞ்சத் தனம் பாக்கக் கூடாது. நல்ல பூட்டா பாத்து வாங்கணும். சிரமம் பார்க்காம எல்லா கொக்கி, தாழ்ப்பாளையும் போட்டு வை.

இப்பல்லாம் அலாரம் அடிக்கிற பூட்டு கூட இருக்கு. தப்பான சாவி போட்டா சத்தம் போடும். வேணும்ன்னா அதைக் கூட வாங்கி மாட்டலாம். முக்கியமான சமாச்சாரம், வீட்டுக் கீயை வீட்டுக்கு வெளியே ஒளிச்சு வைக்கிற சமாச்சாரமெல்லாம் வேண்டாம். உன்னை விட புத்திசாலிங்க தான் திருடங்க.

ரொம்ப பக்கத்துல இருக்கிற வீட்டுக்காரங்க கிட்டே மட்டும் நீ வெளியூர் போற விஷயத்தைச் சொல்லிடு. அப்படியே உன்னோட செல்போன் நம்பர்ஸ் எல்லாம் கொடு. அப்பப்போ வீட்டு மேல ஒரு கண் வெச்சுக்கச் சொல்லு.

அதுக்காக ஊர் முழுக்க நீ வெளியூர் போற விஷயத்தை டமாரம் அடிக்காதே. அது வம்பை விலை கொடுத்து வாங்கற மாதிரி. கொஞ்சம் உஷாரா தான் பேசணும். குறிப்பா கேண்டீன்ல, ஜிம்ல, கடைவீதில எல்லாம் இதுபத்தி பேசாதே.

ரொம்ப நம்பிக்கையான  நபர் ஒருத்தர் கிட்டே உன்னோட வீட்டுச் சாவி ஒண்ணைக் குடுத்து வை. ஏதாச்சும் அவசரமா வீட்டைத் திறக்க வேண்டியிருந்தா பயன்படும். முடிஞ்சா அப்பப்போ வீட்டை வந்து திறந்து பாத்துட்டுப் போகச் சொல்லு.

பேப்பர் காரப் பையன் கிட்டே மாசம் ஒண்ணாம் தியதில இருந்து பேப்பர் வேண்டாம்ன்னு சொல்லு. ஒரு வாரம், இரண்டு வாரத்துக்குப் பேப்பர் நிறுத்தினா நீ ஊர்ல இல்லேங்கற விஷயம் பேப்பர் காரப் பையனுக்கு தெரிஞ்சு போயிடும்.   அதே போல காலைல பால்க்காரர் கிட்டேயும் “கொஞ்ச நாளைக்குப் பால் வேண்டாப்பா..” ன்னு சொல்லி நிப்பாட்டி வை.

போஸ்ட் ஆபீஸ்ல போய் உன்னோட லெட்டர்ஸை எல்லாம் இரண்டு வாரம் கழிச்சு வந்து கலெக்ட் பண்ணிக்கறேன்னு சொல்லு. பெரும்பாலான போஸ்ட் ஆபீஸ்ல அந்த வசதி இருக்கு.

வீட்ல இருக்கிற போனோட வால்யூமை ரொம்ப கம்மியா வை. ரொம்ப நேரம் சும்மா அடிச்சிட்டே இருக்கிற மாதிரி வெளியாட்களுக்குத் தெரியக் கூடாது. அதே மாதிரி உன்னோட ஆன்சரிங் மெஷின்ல நீ வெளியூர் போற சமாச்சாரத்தை எல்லாம் போட்டு வைக்காதே.

வீட்டு முற்றத்துல சைக்கிள், பாத்திரம், விளையாட்டு இப்படிப்பட்ட ஐட்டம்ஸ் எல்லாம் போட்டு வைக்காதே. அதையெல்லாம் வீட்டுக்குள்ளே பத்திரமா பூட்டி வெச்சுடு.  வீட்ல இருக்கிற பணம், நகை எல்லாத்தையும் மறக்காம பேங்க் லாக்கர்ல வெச்சுடு. வீட்ல அலமாராவில போட்டு பூட்டி வைக்கிற வேலையே வேண்டாம்.
காரை தெருவிலே நிப்பாட்டுவேன்னா, யாரையாவது வெச்சு காரை அப்பப்போ எடுத்து இடம் மாத்தி நிப்பாட்டச் சொல்லு. ஆள் இருக்கிற மாதிரி ஒரு தோற்றம் கிடைக்கும்.

வீடு ஆள் நடமாட்டம் இருக்கும்போ எப்படி இருக்குமோ அதே மாதிரி இருக்கற மாதிரி செட் பண்ணு. குறிப்பா டோர் கர்ட்டன், விண்டோ கர்ட்டனெல்லாம் முழுசா இழுத்து மூட வேண்டாம். நார்மலா இருக்கட்டும். சன்னல் பக்கத்துல அலமாரா, டீவி இப்படிப் பட்ட பொருள் இருந்தா கொஞ்சம் தள்ளி வைக்கப் பாரு.

முடிஞ்சா கிளம்பறதுக்கு முன்னாடி வீட்டை ஹேண்டி கேம்ல வீடியோ எடுத்து வை. திரும்பி வந்தப்புறம் எல்லாம் அதனதன் இடத்துல இருக்கான்னு செக் பண்ண வசதியா இருக்கும்.

கடைசியா ரொம்ப முக்கியமான ஒரு விஷயம். உன்னோட ஏரியா போலீஸ் ஸ்டேஷன்ல போய் நீ வெளியூர் போற விஷயத்தைச் சொல்லு. போலீஸ் விடியற்காலை, ராத்திரின்னு அடிக்கடி அந்தப் பக்கமா விசிட் அடிக்கும்போ உங்க வீட்டுப் பக்கத்துல இறங்கி ஒரு பார்வை பாத்துட்டு போவாங்க ! இதுக்கு கட்டணம் ஏதும் கிடையாது ! ரொம்ப பேருக்கு இப்படி ஒரு போலீஸ் சர்வீஸ் இருக்கிறதே தெரியாது !

சொல்லி விட்டு நீளமாய் பெருமூச்சு விட்ட மாலதி கேட்டாள் “என்ன ? சத்தமே காணோம் ? நான் சொல்றதெல்லாம் நோட் பண்ணிட்டியா இல்லையா ?”  

“நோட் பண்ணல, ஆனா எல்லாத்தையும் மொபைல்லயே ரெக்கார்ட் பண்ணிட்டேன். இதுல இவ்ளோ விஷயம் இருக்கிறது எனக்குத் தெரியவே இல்லைடி. நான் வெளியூர் போறதுக்கு முன்னாடி உன்னை வீட்ல வந்து பாக்கறேன்” ரம்யா சிரித்தாள்.

“ஓ.. வீட்டுக்கு வரியா ?”

“ஆமா… என்னோட வீட்டுச் சாவி ஒண்ணை உன் கிட்டே தான் குடுத்துட்டுப் போகப் போறேன். அப்பப்போ வந்து வீட்டைப் பாத்துக்கோ”

“அடிப்பாவி… கடைசில ஐடியா குடுத்தவளை வாட்ச்மேன் ஆக்கிட்டியே” மாலதி நகைச்சுவையாய் சொல்ல ரம்யா சிரித்தாள். அந்த சிரிப்பில்  உற்சாகம் மின்னியது

நன்றி : பெண்ணே நீ

தமிழிஷில் வாக்களிக்க

அப்பார்ட்மெண்ட் அபாயங்கள் : பாதுகாப்பு வழிகள்…

 

ப்பார்ட்மெண்ட் அபாயங்கள், கவனம் அவசியம்


ப்பார்ட்மெண்ட் குறித்த அதிர்ச்சிச் செய்தி இல்லாமல் இப்போதெல்லாம் நாளிதழ்களே வருவதில்லை. அப்பார்ட்மெண்டில் தனியே இருந்த பெண்ணைக் கட்டிப் போட்டுக் கொள்ளையடித்தனர். தனியே இருந்த பெண் படுகொலை செய்யப்பட்டார். அப்பார்ட்மெண்டில் தனியே இருந்த முதியவர் தாக்கப்பட்டார். இப்படி ஏதோ ஒரு செய்தி நாள் தோறும் அப்பார்ட்மெண்ட் விபரீதங்களைச் சொல்லி பயமுறுத்திக் கொண்டே இருக்கிறது. 

பெண்கள் தனியே இருக்கும் வீடுகளைக் குறிவைத்தே பெரும்பாலான குற்றங்கள் நடக்கின்றன. நகர்ப்புற வாழ்க்கையில் அதுவும் அப்பாட்மெண்ட் போன்ற இடங்களில் பாதுகாப்பின்மைக்கு என்னக் காரணம் ?

முதல் காரணம் நகர்ப்புறத்தின் அவசர வாழ்க்கை. காலில் சக்கரம் கட்டிக் கொண்டு என்பார்களே அதைவிட ஒரு படி மேலான அவசரம். நீங்கள் அப்பார்ட்மெண்ட் வாசியா ? சரி உங்கள் அப்பார்ட்மெண்டில் இருக்கும் எத்தனை நபர்களை உங்களுக்குத் தெரியும் ? அவர்களைப் பற்றி என்னென்ன விவரங்கள்  ? அவர் என்ன வேலை செய்கிறார் ? வீட்டில் எத்தனை பேர் உண்டு ? அவர் வீட்டுக்குப் போயிருக்கிறீர்களா ? இப்படி உங்களையே சில கேள்விகள் கேட்டுப் பாருங்கள். விஷயம் பளிச் எனப் புரிந்து போய் விடும்.

எதேர்ச்சையாகப் படியில் சந்தித்துக் கொள்ளும் போது ஒரு சின்ன சிரிப்புடன் கடந்து போய் விடுகிறோம். அவ்வளவு தான் பழக்கமெல்லாம். அடுத்த வீட்டு நபர்களின் பெயர்களைத் தெரிந்து கொள்ளாமலேயே முடிந்து போகிறது வாழ்க்கை. இது தான் நிஜம். இதற்கு நேர் எதிரான வாழ்க்கையைப் பார்க்க வேண்டுமானால் கிராமத்துப் பக்கம் தான் போகவேண்டும். 

கிராமத்திலுள்ள அத்தனை நபர்களுக்கும், ஒவ்வொருத்தரைப் பற்றியும் தெரியும். அறிதல் என்பது உறவுகளின் இறுக்கத்துக்கு ரொம்பவே அவசியமானது. புதிய நபர் யாராவது கிராமத்து பஸ் ஸ்டாண்டில் வந்து இறங்கினாலே ஒட்டு மொத்த கண்களும் அவரை மொய்க்கும். அவரிடம் நேரடியாகவே போய் விசாரணையையும் தொடங்கி விடுவார்கள். ஏதேனும் அச்சுறுத்தல் வந்தால் ஒன்று படுவதும், யாருக்கேனும் உதவி தேவையெனில் சட்டென களம் இறங்குவதும் கிராமத்தின் குணாதிசயங்கள்.  

ஒரு கிராமத்தான் வெளியூர் போகிறார் என்று வைத்துக் கொள்ளுங்கள். உடனே பக்கத்து வீட்டுக் காரர்களிடமெல்லாம் போய், “நான் வெளியூர் போறேன் வீட்டைக் கொஞ்சம் பார்த்துக்கோங்க” என்பார். அதே சம்பவம் நகர்ப்புறத்தில் என்றால் எப்படி இருக்கும். நாம வீட்ல இல்லேங்கறது யாருக்கும் தெரியக் கூடாது. ஏதோ பக்கத்து தெருவுக்கு போறாமாதிரி பாவ்லா காட்டணும். பக்கத்து வீட்டுக் காரன் கிட்டேயே மூச்சு விடக் கூடாது. விட்டால் பக்கத்து வூட்டுக்காரனே லவட்டிட்டுப் போக வாய்ப்பு அதிகம். இப்படித் தான் பதட்டப்படும்! 

நகர்ப்புற வாழ்க்கை பயத்தின் மேல் கட்டி எழுப்பப்பட்டிருக்கிறது. முதல் பயம் நம்பிக்கையின்மை. அதற்கு நியாயமான காரணம் உண்டு. பெரும்பாலான நகர்ப்புற விபரீதங்கள் ரொம்பத் தெரிந்த நபர்களின் துணையோடு தான் நடக்கிறது. இரண்டாவது நம்ம வேலையைப் பார்த்துக் கொண்டு பேசாமல் போய்விடுவோம், எதுக்கு வீண் வம்பு எனும் மனோபாவம். 

நகர்ப்புற வாழ்க்கையும், அப்பார்ட்மெண்ட் வாழ்க்கையும் இப்படி ஏகப்பட்ட சிக்கல்களோடு தான் நம் முன்னால் நிற்கிறது. இந்த சூழலில் பாதுகாப்பாய் இருப்பது நமது கையில் தான் இருக்கிறது. கீழே உள்ள சின்னச் சின்ன விஷயங்களில் கவனம் செலுத்துங்கள். பெரும்பாலான சிக்கல்கள் விலகி ஓடிவிடும்.

  1. அப்பார்ட்மென்ட்களை புக் செய்யும் போதே அதன் பாதுகாப்புக் குறித்து விசாரித்து அறிந்து கொள்வது மிகவும் முக்கியம். அப்பாட்மெண்டைச் சுற்றி உள்ள இடங்கள், அதன் பாதுகாப்பு, போக்குவரத்து வசதிகள், போன்ற சிறு சிறு விஷயங்களிலும் கவனம் செலுத்துங்கள்.
  2. அப்பாட்மெண்ட் கதவு பலமானதாய் இருக்கிறதா என்பதைக் கவனியுங்கள். முன் கதவு நல்ல உறுதியாய் இருக்க வேண்டியது அவசியம். ரொம்ப அலங்காரம் எனும் பெயரில் டிசைன் செய்து மரத்தின் கனத்தைக் குறைத்து விடாதீர்கள்.
  3. கதவில் வெறுமனே பெயருக்கு ஒரு பூட்டு போடுவது உதவாது. பூட்டு நல்ல தரமான பூட்டாக இருக்க வேண்டும். கொஞ்சம் தூரத்திலுள்ள ஏதேனும் ஒரு கடையில் நீங்களாகவே போய் வாங்கிக் கொள்ளுங்கள். 
  4. இப்போதெல்லாம் எல்லாக் கதவுகளுக்கும் முன்னால் ஒரு கிரில் போட்டு விடுகிறார்கள். அது ரொம்ப நல்லது.
  5. கதவுடன் இணைக்கப்பட்டிருக்கும் “டெட் போல்ட் லாக்” வாங்கி மாட்டுங்கள். கதவை படீரென திறந்து கொண்டு யாரும் வர முடியாது. வெளியே யாராவது வந்து கதவைத் தட்டினால் கூட முழுமையாய்க் கதவைத் திறக்காமலேயே பேச முடியும்.
  6. வீட்டுக் கதவில் எத்தனை பூட்டுகள், தாழ்ப்பாள் சங்கதிகள் உண்டோ எல்லாவற்றையும் இரவில் பூட்டி வையுங்கள். சும்மா ஒரு தாழ்ப்பாள் மட்டும் பெயருக்குப் போட்டுக் கொண்டு தூங்காதீர்கள். நிறைய பூட்டுகள் இருந்தால் திருட நினைப்பவர்களுக்கு அதிக வேலையைக் கொடுக்கும். அது யாரையாவது எழுப்பி விடும்.
  7. வீட்டைப் பூட்டாமல் வெளியே போகவே போகாதீர்கள். “ரோட்டுக்கு எதிரே தான் கடை ஒரு எட்டு போயிட்டு ஓடி வந்துடறேன்” ன்னு நினைக்க வேண்டாம். அந்த சில வினாடிகளில் யாராவது உங்கள் வீட்டுக்குள் புகுந்து கொள்ளலாம். நீங்கள் திரும்பி வந்தபின் தாக்கலாம் !  
  8. சந்தேகப் படும்படியான நபர் “வாட்டர் பில்டர்” சரி செய்ய வந்திருக்கிறேன், ஏசி சரிசெய்ய வந்திருக்கிறேன் என்றால் உஷாராகி விடுங்கள். உடனடியாக நிறுவனத்துக்குப் போன் செய்து அப்படி யாரையாவது அனுப்பியிருக்கிறார்களா எனக் கேளுங்கள். எக்காரணம் கொண்டும் “அலுவலக நம்பர் என்னப்பா” என வந்தவனிடமே கேட்காதீர்கள். ஏமாந்து விடுவீர்கள்.
  9. இப்போதைய டிவிக்கள், ரேடியோக்கள் எல்லாவற்றிலுமே டைமர் சிஸ்டம் உண்டு. எனவே நீங்கள் வீட்டில் இல்லாவிட்டால் கூட சும்மா அவ்வப்போது டிவி ஓடுமாறு செட் செய்யலாம், ரேடியோ பாடுமாறு செய்யலாம். வீட்டில் யாரோ இருப்பது போன்ற தோற்றம் உருவாகும்.\
  10.   வீட்டுக்கு அருகில் நல்ல நண்பர் ஒருவரையாவது கொண்டிருங்கள். நீங்கள் வெளியே போகும் விஷயத்தைச் சொல்லுங்கள். மாறி மாறி தேவைப்படும் போதெல்லாம் உங்கள் வீடுகளைக் கண்காணித்துக் கொள்ளலாம்.
  11. சந்தேகத்துக்கு இடமான நபர் தென்பட்டால் உடனடியாக போலீஸுக்குத் தெரியப்படுத்துங்கள். கூடவே அப்பார்ட்மெண்ட் நிர்வாகம், வாட்ச்மேன் அனைவரையும் உஷார் படுத்திவிடுங்கள்.
  12. அப்பார்ட்மெண்ட்களில் சில ஆபத்தான பகுதிகள் உண்டு. படிக்கட்டுகள், கார் பார்க்கிங் போன்றவை சில உதாரணங்கள். அங்கெல்லாம் கொஞ்சம் விழிப்பாய் இருக்க வேண்டியது அவசியம்.
  13. வெளிச்சமான இடங்கள் திருட்டு வேலைக்காரர்களுக்கு அலர்ஜி. அப்பார்ட்மெண்டைச் சுற்றி இரவு முழுவதும் பகல் போல வெளிச்சம் இருந்தால் ரொம்பப் பாதுகாப்பானது. சில வெளிநாடுகளில் இது கட்டாயம்.
  14. அட்டவணைப்படி எல்லாவற்றையும் செய்யாதீர்கள். “எல்லா சனிக்கிழமையும் மாலையில் ஷாப்பிங் போவாங்க, சண்டே ஈவ்னிங் வெளியே டின்னர் போவாங்க, இப்படி ஒரு தெளிவான அட்டவணை இருப்பது ஆபத்து !” இது திருடர்கள் சாவாகாசமாக அமர்ந்து திட்டமிட உதவும். “எப்போ போவாங்க எப்போ வருவாங்கன்னே தெரியாது” எனும் நிலை தான் அப்பார்ட்மெண்ட் விஷயத்தில் பாதுகாப்பானது. வெளியே போகும்போது கூட வேறு வேறு பாதைகளில் உங்கள் பயணங்களை அமைத்துக் கொள்ளலாம்.
  15. அப்பார்ட்மெண்ட் வாசிகளுடன் ஒரு நம்பிக்கை  வளர்த்துக் கொள்ளுங்கள். அதற்காக அளவுக்கு அதிகமாகப் பேசி வம்பை விலை கொடுத்து வாங்கவும் வேண்டாம். “அதை ஏங்கா கேக்கறீங்க என் வூட்டுக் காரர் அடுத்த வாரம் புல்லா வெளியூராம்” என ஸ்பீக்கர் வைத்துப் பேசாதீர்கள்.
  16. எப்போதும் செல்போன் கையிலேயே இருக்கட்டும். அதில் லோக்கல் போலீஸ் நம்பர், ஆம்புலன்ஸ் நம்பர், அப்பார்ட்மெண்ட் ஆபீஸ் நம்பர், நம்பிக்கையான சிலருடைய நம்பர்கள் எல்லாம் தவறாமல் இருக்கட்டும். மறக்காம சார்ஜ் பண்ணி வைத்துக் கொள்ளுங்கள்.
  17. அப்பார்ட்மெண்ட்களில் வாடகைக்குப் போகிறீர்களென்றால் கெடுபிடி அதிகமுள்ள இடங்களுக்கே போங்கள். “ஆயிரத்தெட்டு டீட்டெயில்ஸ் கேட்டு சாவடிப்பாங்க” என வெறுக்காதீர்கள். அதே போல எல்லோரிடமும் கேட்பதால் அப்பார்ட்மெண்ட்களில் வருபவர்கள் பாதுகாப்பானவர்களாய் இருக்க சாத்தியம் அதிகம்.
  18. முன்பு வாடகைக்கு இருந்தவர் பயன்படுத்திய பூட்டு மாற்றப்பட்டுள்ளதா என்பதை 100 சதம் உறுதிப் படுத்திக் கொள்ளுங்கள். இல்லையேல் முதல் வேலையாக அதை மாற்றுங்கள்.
  19. வசதியிருப்பவர்கள் செக்யூரிடி கேமராக்களையும் வீடுகளில் பொருத்தலாம். வீட்டில் குழந்தைகளை ஆயா நன்றாகக் கவனிக்கிறாரா என்பது முதல், யாராவது அத்துமீறி நுழைகிறார்களா என்பது வரை சகலத்தையும் அதில் பிடித்துவிடலாம்.
  20. அப்பார்ட்மெண்டின் தன்மைக்கு ஏற்ப பாதுகாப்புகள் அமைத்துக் கொள்ளுங்கள். ஒரு ரூமில் நடப்பது மற்ற ரூமுக்கே கேட்காது என வைத்துக் கொள்ளுங்கள். வீட்டில் ஒரு டோர் அலார்ம் சிஸ்டம் வாங்குவது நல்லது. கதவு திறக்கப்பட்டால் அது அதிக சத்தம் போட்டு உங்களை உஷார் ப்படுத்திவிடும்.1.  கதவில் ஒரு சிறிய லென்ஸ் பொருத்தி வெளியே இருப்பவர் யார் என்பதைப் பார்ப்பது ரொம்ப நல்லது. சிம்பிள் செக்யூரிடி சிஸ்டம். ஆனால் ரொம்பப் பயனளிக்கும். இந்த அட்ரஸ் எங்கே இருக்கு தெரியுமா ? ஒரு போன் பண்ணிக்கலாமா ? இப்படி ஏதாவது ஒரு சிம்பிள் உதவியுடன் பெரிய பெரிய ஆபத்துகள் வரலாம் கவனம் தேவை. 
  21. நீங்கள் ஒரு திருடராய் இருந்தால் உங்கள் வீட்டில் எப்படியெல்லாம் நுழைவீர்கள் என யோசியுங்கள். அந்த இடங்களிலெல்லாம் பாதுகாப்பைப் பலப்படுத்துங்கள். 
  22. ஒருவேளை உங்கள் வீட்டில் திருடன் நுழைந்து விட்டானென்றால், உதவி உதவியென கத்தினால் ஒருவேளை உதவி கிடைக்காமல் போகலாம். எனவே தீ.. தீ என கத்துங்கள் !! இது அனுபவஸ்தர்களின் அட்வைஸ்.
  23. கழற்றிப் போட்டிருக்கும் ஷூவிற்குள், மிதியடிக்குக் கீழே, செடித்தொட்டிக்கு அடியில், கதவுக்கு மேல் இப்படிப்பட்ட இடத்திலெல்லாம் சாவியை வைத்துச் செல்லாதீர்கள். இதெல்லாம் ஹைதர் கால டெக்னிக்.
  24. கார் கீயில் வீட்டுச் சாவியையும் போட்டு வைக்காதீர்கள். எங்கேயாவது வேலட் பார்க்கிங் சமயத்தில் கூட உங்கள் கீ டூப்ளிகேட் செய்யப்படலாம். உங்கள் கார் எண்ணை வைத்து உங்கள் விலாசம் கண்டுபிடிக்கப் படலாம் !
  25. யாராவது போன் பண்ணினால் உடனே உங்கள் ஜாதகத்தை அவரிடம் சொல்லாதீர்கள். அவர்கள் யார், என்ன சமாச்சாரம் என்பதையெல்லாம் முதலில் கேட்டு விட்டு தேவையான பதிலை மட்டும் சொல்லுங்கள். அடிக்கடி ராங் கால் வருகிறதா ? தொலைபேசி நிறுவனத்திற்கு கம்ப்ளெயிண்ட் செய்யுங்கள். வீடு காலியாய் இருக்கிறதா ? ஆட்கள் இருக்கிறார்களா என்பதைத் தெரிந்து கொள்ளக் கூட ராங் கால்கள் வரும் உஷார்.
  26. முதலில் ஒரு காலர் ஐடி வாங்கிக் கொள்ளுங்கள். யாரெல்லாம் உங்களைத் தொடர்பு கொண்டிருக்கிறார்கள் எனும் விஷயம் தெரியவரும். உங்கள் வீட்டு குப்பைகளில் கூட கவனம் செலுத்துங்கள். குடும்பத்தினரைப் பற்றிய, வங்கிக் கணக்கு பற்றிய விஷயங்களெல்லாம் அதில் இல்லாதபடி பார்த்துக் கொள்ளுங்கள்.
  27. யாராவது வந்து உங்கள் பக்கத்து வீட்டுக் காரர்களைப் பற்றி தேவையற்ற கேள்விகள் கேட்டால் உஷாராகிவிடுங்கள். அவர்களிடம் கவனமாய் இருங்கள். நம்பிக்கையற்றவராய் தெரிந்தால் அப்பார்ட்மெண்ட் ஆபீஸ் போய் செய்திகளை வாங்கச் சொல்லுங்கள். முடிந்தால் செல்போனில் நைசாக அவனை ஒரு படம் பிடித்துக் கொள்ளுங்கள். மறக்காமல் உங்கள் பக்கத்து வீட்டுக்காரரிடம் விஷயத்தைச் சொல்லுங்கள்.
  28. நகைகளையெல்லாம் வங்கி லாக்கரில் வைத்து விடுதல் உசிதம். கொஞ்சம் தேவைக்கேற்ற பணம் மட்டும் வீட்டில் இருப்பதே பாதுகாப்பானது.
  29. உங்கள் பக்கத்து வீட்டுக்காரர்கள் என்னென்ன கார் வைத்திருக்கிறார்கள் என்பதை கவனியுங்கள். ஏதேனும் வித்தியாசமான கார் வந்தால் அலர்ட் ஆகி விடுங்கள். அதன் எண்ணை எழுதி வையுங்கள். தேவைப்படலாம் !

 நன்றி : பெண்ணே நீ…

 

பயனுள்ளதாய் இருந்தால்… வாக்களியுங்கள் ….


சேவியர்