தொலைபேசியில் ஆபாசப் பேச்சு

தொலைபேசியில் ஆபாசப் பேச்சு !

செக்ஸ். இந்த ஒற்றை வார்த்தையைக் கழித்து விட்டு மனித குல வரலாற்றையோ, இலக்கியங்களையோ, வாழ்க்கை முறையையோ முழுதாகப் புரிந்து கொள்ள முடியாது. மனிதன் தோன்றிய காலத்திலேயே துவங்கிவிட்டது பாலியல் விஷயங்கள். ஒவ்வோர் காலகட்டத்திலும் அதன் பரவலும் பாதிப்பும் மாறிக்கொண்டே இருக்கிறது என்பது மட்டும் தான் கவனிக்கப் பட வேண்டிய விஷயம். மற்றபடி செக்ஸ் எனும் ஒரு விஷயம் மனிதனை எப்படியெல்லாம் ஆட்டிப் படைக்கிறது என்பதைச் சொல்லத் தேவையில்லை.

ஒத்துக் கொள்ள முரண்டு பிடிப்பவர்கள் ஏதேனும் ஒரு தினசரியைப் புரட்டிப் பார்த்தாலே போதுமானது. டீன் ஏஜ் பெண்களின் காதல் முதல் முக்கால் கிழடுகளின் கள்ளக் காதல் வரை எல்லாமே சொல்லித் தரும் பாடம் செக்ஸ் பற்றியதாகவே இருக்கிறது. இந்த பட்டியலில் சமீபகாலமாக திடுக்கிட வைக்கும் முன்னேற்றம் தொலைபேசி செக்ஸ் உரையாடல் !

அதென்ன போன் செக்ஸ் ? கொஞ்சம் கண்ணியமாய்ச் சொல்ல வேண்டுமெனில் தொலைபேசியில் பேசிக்கொள்ளும் இருவர் பாலியல் ரீதியான உரையாடல்களில் லயித்து, உணர்ச்சிகளை கிளர்ந்தெழச் செய்வது எனலாம். மின்னஞ்சலில் பேசிக்கொள்வது, இண்டர்நெட் சேட் விண்டோக்களில் பேசிக்கொள்வது போல ஒரு முகம் தெரியா செக்ஸ் தூண்டுதல் தான் இது.

நள்ளிரவு தாண்டியபின்னும் தனியாக அமர்ந்து, வெட்கத்தின் நகத்தைக் கடித்துத் தின்றபடி, போனில் பேசிக்கொண்டிருக்கும் பெண்களும், ஆண்களும் பெரும்பாலும் இந்த ஏரியாவில் சிக்கிக் கொண்டிருப்பவர்கள் தான். திருமணமாகி தனியே வாழும் தம்பதியரும் இத்தகைய தொலைபேசி உரையாடல்களில் லயிப்பதுண்டு. இவை எப்போது எல்லை மீறுகிறது தெரியுமா ? அறிமுகமற்ற நபர்களை தொலைபேசி செக்ஸ் பேச்சுகளுக்காக நாடும்போது தான்.

இந்தியாவில் இது கொஞ்சம் அதிர்ச்சிகரமான அறிமுகமாக இருந்தாலும் வெளிநாடுகளைப் பொறுத்தவரை இது பல்லாயிரம் கோடி ரூபாய்க்கான பிஸினஸ். பல ஆண்டுகளாக நடந்து வருகின்ற சட்டபூர்வமான தொழில். ஒருவகையில் இது ஒரு விபச்சாரத் தொழில் போலத் தான். ஆனால் என்ன இங்கே இரு நபர்களும் ஒருவரை ஒருவர் பார்த்துக் கொள்ளவோ, உண்மையான தொடுதல் உணர்வுகளைப் பெறவோ முடியாது அவ்வளவு தான். இருவரும் கற்பனையான உலகுக்குள் சுற்றித் திரிவார்கள்.

நல்ல வசீகரிக்கும் குரல் மட்டும் தான் இந்தத் தொழிலில் ஈர்க்கப்படும் அம்சம். அப்படிப்பட்டவர்களைத் தான் தேர்வு செய்து பணியில் அமர்த்துகின்றனர். அழைக்கப்பட்டவர்களை பேச்சில் குஷிப்படுத்துவது மட்டுமே இவர்களுக்கான பணி. “உங்களுக்காக இதோ நாங்கள் காத்திருக்கிறோம் தனிமையை இனிமையாக்க கால் பண்ணுங்கள்” என விளம்பரம் வரும். அதில் வரும் எண்ணுக்குப் போன் செய்தால் பெண்கள் பேசுவார்கள். இவர்களெல்லாம் பயிற்சி அளிக்கப்பட்ட பெண்கள். காதலில் கசிந்துருகுவது போலவும், காமத்தின் கால்வாயில் நீந்துவது போலவும் பேசுவதில் எக்ஸ்பர்ட்.

மேலை நாடுகளில் இவற்றுக்கென தனி எண்கள் வைத்து நிமிடக் கணக்கில் டாலர்களைக் கறக்கிறார்கள். பெரும்பாலும் டெலிபோன் பில்லுடன் அந்தக் கட்டணமும் வரும். தொலை பேசி நிறுவனங்கள் அந்தத் தொகையில் கணிசமான ஒரு தொகையை இந்த பாலியல் பேச்சு நிறுவனங்களுக்குக் கொடுத்து விடும். அமெரிக்காவில் ஒரு பெண் ஒரு வாரத்துக்கு சுமார் 75 ஆயிரம் ரூபாய்கள் வரை சம்பாதித்து விட முடியும் என்கிறது புள்ளி விவரம். 

“உங்களுடைய இரவை இனிமையாக்க வேண்டுமா. இந்த எண்ணுக்கு போன் செய்யுங்கள் லிஸா காத்திருக்கிறார்” என மேற்கத்திய உலகம் விற்றுக்கொண்டிருந்ததை தமிழ்ப்படுத்தியிருப்பது தான் கொடுமை. “உங்களில் யாருக்காவது ஸ்பைஸி சேட் வேணுமா மாலதியும், கல்பனாவும் உங்களுக்காக காத்திருக்காங்க. கால் பண்ணுங்க” என்பது போன்ற ஏதேனும் ஒரு எஸ்.எம்.எஸ் வந்தால் அப்படியே டிலீட் பண்ணிவிட்டு வேறு வேலை பார்க்கப் போய்விடுங்கள். அத்தகைய அழைப்புகளெல்லாம், விவகார அழைப்புகள் தான்.

கொஞ்சம் அசந்தால் ஆண்டுக்கு ஐயாயிரம் என பேரம் பேசி, அது பிறகு அப்படியே உங்களுடைய சம்பாத்தியத்தின் கடைசிப் பணத்தையும் உறிஞ்சாமல் விடப் போவதில்லை என்பதே நிஜம். பெரும்பாலும் இத்தகைய போன் பேச்சு பார்ட்டிகள் நேரடியாக சந்தித்துக் கொள்வதில்லை. ஆனால் சில சம்பவங்களில் நல்ல வெயிட் பார்ட்டிகளை நேரில் சந்தித்து பணம் பறிக்கும் சம்பவங்களும் நிகழ்ந்திருக்கின்றன ! உண்மையான தகவல்களைக் கொடுத்து விட்டால் பிளாக்மெயில், குடும்ப சிக்கல்கள் என்று இதன் தாக்கம் பின்னியெடுக்கும்.

வெளிநாட்டிலுள்ள ஆபாசப் பேச்சு நிறுவனங்களின் கிளைகள் இந்தியாவின் பல இடங்களிலும் கமுக்கமாய் நடந்து வருகிறது. ஆபாசப் பேச்சை விரும்புபவர்கள் “ஆசியப் பெண்களிடம், அல்லது இந்தியப் பெண்களிடம்” பேச வேண்டுமென ஸ்பெஷலாய் விரும்பினால் அந்த அழைப்புகளை இங்குள்ள கிளைகளுக்கு அனுப்பி விடுகிறார்களாம். சில நிறுவனங்கள் இந்தியாவிலுள்ள அழைப்புகளை வெளிநாடுகளுக்கும் அனுப்பி வைக்கின்றன.

எண்பதுகளில் அமெரிக்காவில் கொடிகட்டிப் பறந்த இந்தத் தொழில் பல்வேறு மாற்றங்களை அடைந்திருக்கிறது. இந்த சந்தை இன்னும் அதிகமாக விரிவடைந்திருக்கிறது. இந்தியாவை இணைத்தும் ஒரு சர்வதேச வலையமைப்பில் இப்போது இந்த ஆபாசப் பேச்சு தொழில் விரிவடைந்திருப்பது உண்மையிலேயே கவலைக்குரிய விஷயமாகும்.

ஆபாசப் பேச்சுகள் குடும்ப உறவுகளின் மீதான பிடிப்பைப் போக்கி ஒரு விதமான மயக்க கற்பனை உலகிற்குள் மக்களை சிறைப்படுத்தி விடுகிறது. மேலை நாடுகளில் இத்தகைய ஆபாச அழைப்புகளுக்கான வாடிக்கையாளர்களில் 30 சதவீதம் பேர் பார்வையிழந்தவர்கள் மற்றும் நிரந்தர ஊனமானவர்கள் என்கிறது புள்ளி விவரம் ஒன்று. அப்படிப் பார்த்தாலும் 70 சதவீதம் பேர் சாதாரண வாழ்க்கை வாழ்பவர்கள். இவர்களுடைய குடும்ப வாழ்க்கை பலவீனமடைய இது மிக முக்கியக் காரணமாகி விடுகிறது.

ஒருவகையான அடிக்ஷனாகவும் இது மாறிவிடும் என்கின்றனர் உளவியலார்கள். இந்தப் புதை குழிக்குள் விழுபவர்கள் பின்னர் சாதாரண தாம்பத்யத்தில் விருப்பம் இழந்து, போனில் பேசினால் தான் தாம்பத்ய உறவு எனும் நிலைக்கு தள்ளப்படும் அபாயம் உண்டு என்கிறது அமெரிக்காவில் நடத்தப்பட்ட ஆய்வு ஒன்று.

இந்தியாவைப் பொறுத்தவரை இது சட்ட விரோதமானது. ஒரு வகையில் விபச்சாரத்துக்கான கடுமையுடன் இதையும் பார்க்க வேண்டியது அவசியமாகிறது. பதின் வயதுப் பசங்களும், பெண்களும் இத்தகைய வலைகளில் சிக்கிக் கொண்டால் அவர்களுடைய எதிர்காலமே ஒட்டு மொத்தமாய் அழிந்து போகும் அபாயமும் உண்டு.

“இதெல்லாம் சும்மா பேச்சுக்குத் தானே ?” என யாராவது நியாயப்படுத்தினால் அவர்கள் நிலமையின் வீரியத்தை உணராதவர்கள் என கருதிக் கொள்ளுங்கள். மன ரீதியான பாதிப்புகளே உடல் ரீதியான பாதிப்புகளை விட நீண்டகாலம் துயரம் தரக் கூடியது என்பதை உணர வேண்டும். மனதின் ஊனத்துக்கு உத்தரவாதம் தரும் இத்தகைய பேச்சுகளை வரவேற்பது என்பது மனுக்குலத்துக்குச் செய்யும் அவமானம் என்பதைத் தவிர வேறில்லை.

பெண்கள் தான் இந்த விஷயத்தில் ரொம்பவே கவனமாய் இருக்க வேண்டும். ஏதேனும் பத்திரிகையின் மூலையில் “வீட்டிலிருந்தே பேசலாம், அலுவலகத்திலிருந்தும் பேசலாம் மாசம் பத்தாயிரம், பதினையாயிரம்” என ஆசை காட்டினால் விழுந்து விடாதீர்கள். அல்லது தவறான வேலை என புரிகின்ற கணத்தில் அந்தத் தொடர்பைத் தாமதமின்றித் துண்டித்து விடுங்கள். வெறுமனே ஒரு வேலையாக இதைச் செய்ய முடியாது என்பதும், இது மனரீதியான கடுமையான பாதிப்புகளை உருவாக்கும் என்பதையும் உணரவேண்டும்.

பாசிடிவ் விஷயங்களையே பேசிக்கொண்டிருக்கும் ஒருவருடைய மனதில் பாசிடிவ் விஷயங்கள் அலைமோதும். நெகடிவ் விஷயங்களையே பேசிக்கொண்டிருக்கும் ஒருவருடைய மனதில் நெகடிவ் விஷயங்கள் குடிகொள்ளும். அதே போல செக்ஸ் தொடர்பாகப் பேசிக்கொண்டே இருப்பவருடைய மனதிலும் அத்தகைய எண்ணங்கள் காலப்போக்கில் கால்நீட்டி அமர்ந்து விடும் என்பது தான் நிஜம்.

வெளிப்பார்வைக்கு சாதாரண கால்செண்டர் போல தோற்றமளிக்கும் இடங்களில் கூட திரைமறைவில் இத்தகைய வேலைகள் நடக்கக் கூடும். எனவே எச்சரிக்கை உணர்வு எப்போதும் இருக்க வேண்டியது அவசியம். இப்போதெல்லாம் இத்தகைய வேலை வாய்ப்பு அழைப்புகள் பிரபல பத்திரிகைகளிலேயே தைரியமாய் அழைப்பு விடுக்கின்றன என்பதில் கவனம் தேவை.

சமீபத்தில் கோவையை மையமாகக் கொண்டு இயங்கி வந்த ஒரு கும்பலைப் பிடித்த காவல்துறையினர் இந்த தொழிலில் வேர்களை விசாரித்துக் கொண்டிருக்கிறார்கள். இப்படி ஒரு திரைமறைவு தொழில் இருப்பதே அப்போது தான் பலருக்கும் தெரிய வந்திருக்கிறது.

குடும்பவாழ்க்கையைச் சிதைக்கும் பாதையில் மும்முரமாய் இணையமும், தொழில் நுட்ப வளர்ச்சிகளும் பயணிப்பது அபாயகரமானது. இவற்றின் தேவைகள் சரியான வகையில் பயன்படுத்தப்படுவதே இன்றியமையாதது. இத்தகைய கலாச்சாரச் சீரழிவுத் தொழில்களை விட்டு விலகுவது மட்டுமன்றி, எதிர்த்துக் குரல் கொடுப்பதிலும் நமது கரங்களை இணைக்க வேண்டியது அவசியம்.

சட்டமும் விதிமுறைகளும் ஒழுங்குகளைக் கட்டாயப்படுத்தித் திணிக்கும். ஆனால் தனி மனித கோட்பாடுகளும், சிந்தனைகளும் நேர்வழியில் இருக்கும் போது தான் இத்தகைய ஆபத்துகள் பரவாமல் இருக்கும்.

சேவியர்

நன்றி : பெண்ணே நீ

 பிடித்திருந்தால் வாக்களியுங்கள்

அப்பார்ட்மெண்ட் அபாயங்கள் : பாதுகாப்பு வழிகள்…

 

ப்பார்ட்மெண்ட் அபாயங்கள், கவனம் அவசியம்


ப்பார்ட்மெண்ட் குறித்த அதிர்ச்சிச் செய்தி இல்லாமல் இப்போதெல்லாம் நாளிதழ்களே வருவதில்லை. அப்பார்ட்மெண்டில் தனியே இருந்த பெண்ணைக் கட்டிப் போட்டுக் கொள்ளையடித்தனர். தனியே இருந்த பெண் படுகொலை செய்யப்பட்டார். அப்பார்ட்மெண்டில் தனியே இருந்த முதியவர் தாக்கப்பட்டார். இப்படி ஏதோ ஒரு செய்தி நாள் தோறும் அப்பார்ட்மெண்ட் விபரீதங்களைச் சொல்லி பயமுறுத்திக் கொண்டே இருக்கிறது. 

பெண்கள் தனியே இருக்கும் வீடுகளைக் குறிவைத்தே பெரும்பாலான குற்றங்கள் நடக்கின்றன. நகர்ப்புற வாழ்க்கையில் அதுவும் அப்பாட்மெண்ட் போன்ற இடங்களில் பாதுகாப்பின்மைக்கு என்னக் காரணம் ?

முதல் காரணம் நகர்ப்புறத்தின் அவசர வாழ்க்கை. காலில் சக்கரம் கட்டிக் கொண்டு என்பார்களே அதைவிட ஒரு படி மேலான அவசரம். நீங்கள் அப்பார்ட்மெண்ட் வாசியா ? சரி உங்கள் அப்பார்ட்மெண்டில் இருக்கும் எத்தனை நபர்களை உங்களுக்குத் தெரியும் ? அவர்களைப் பற்றி என்னென்ன விவரங்கள்  ? அவர் என்ன வேலை செய்கிறார் ? வீட்டில் எத்தனை பேர் உண்டு ? அவர் வீட்டுக்குப் போயிருக்கிறீர்களா ? இப்படி உங்களையே சில கேள்விகள் கேட்டுப் பாருங்கள். விஷயம் பளிச் எனப் புரிந்து போய் விடும்.

எதேர்ச்சையாகப் படியில் சந்தித்துக் கொள்ளும் போது ஒரு சின்ன சிரிப்புடன் கடந்து போய் விடுகிறோம். அவ்வளவு தான் பழக்கமெல்லாம். அடுத்த வீட்டு நபர்களின் பெயர்களைத் தெரிந்து கொள்ளாமலேயே முடிந்து போகிறது வாழ்க்கை. இது தான் நிஜம். இதற்கு நேர் எதிரான வாழ்க்கையைப் பார்க்க வேண்டுமானால் கிராமத்துப் பக்கம் தான் போகவேண்டும். 

கிராமத்திலுள்ள அத்தனை நபர்களுக்கும், ஒவ்வொருத்தரைப் பற்றியும் தெரியும். அறிதல் என்பது உறவுகளின் இறுக்கத்துக்கு ரொம்பவே அவசியமானது. புதிய நபர் யாராவது கிராமத்து பஸ் ஸ்டாண்டில் வந்து இறங்கினாலே ஒட்டு மொத்த கண்களும் அவரை மொய்க்கும். அவரிடம் நேரடியாகவே போய் விசாரணையையும் தொடங்கி விடுவார்கள். ஏதேனும் அச்சுறுத்தல் வந்தால் ஒன்று படுவதும், யாருக்கேனும் உதவி தேவையெனில் சட்டென களம் இறங்குவதும் கிராமத்தின் குணாதிசயங்கள்.  

ஒரு கிராமத்தான் வெளியூர் போகிறார் என்று வைத்துக் கொள்ளுங்கள். உடனே பக்கத்து வீட்டுக் காரர்களிடமெல்லாம் போய், “நான் வெளியூர் போறேன் வீட்டைக் கொஞ்சம் பார்த்துக்கோங்க” என்பார். அதே சம்பவம் நகர்ப்புறத்தில் என்றால் எப்படி இருக்கும். நாம வீட்ல இல்லேங்கறது யாருக்கும் தெரியக் கூடாது. ஏதோ பக்கத்து தெருவுக்கு போறாமாதிரி பாவ்லா காட்டணும். பக்கத்து வீட்டுக் காரன் கிட்டேயே மூச்சு விடக் கூடாது. விட்டால் பக்கத்து வூட்டுக்காரனே லவட்டிட்டுப் போக வாய்ப்பு அதிகம். இப்படித் தான் பதட்டப்படும்! 

நகர்ப்புற வாழ்க்கை பயத்தின் மேல் கட்டி எழுப்பப்பட்டிருக்கிறது. முதல் பயம் நம்பிக்கையின்மை. அதற்கு நியாயமான காரணம் உண்டு. பெரும்பாலான நகர்ப்புற விபரீதங்கள் ரொம்பத் தெரிந்த நபர்களின் துணையோடு தான் நடக்கிறது. இரண்டாவது நம்ம வேலையைப் பார்த்துக் கொண்டு பேசாமல் போய்விடுவோம், எதுக்கு வீண் வம்பு எனும் மனோபாவம். 

நகர்ப்புற வாழ்க்கையும், அப்பார்ட்மெண்ட் வாழ்க்கையும் இப்படி ஏகப்பட்ட சிக்கல்களோடு தான் நம் முன்னால் நிற்கிறது. இந்த சூழலில் பாதுகாப்பாய் இருப்பது நமது கையில் தான் இருக்கிறது. கீழே உள்ள சின்னச் சின்ன விஷயங்களில் கவனம் செலுத்துங்கள். பெரும்பாலான சிக்கல்கள் விலகி ஓடிவிடும்.

  1. அப்பார்ட்மென்ட்களை புக் செய்யும் போதே அதன் பாதுகாப்புக் குறித்து விசாரித்து அறிந்து கொள்வது மிகவும் முக்கியம். அப்பாட்மெண்டைச் சுற்றி உள்ள இடங்கள், அதன் பாதுகாப்பு, போக்குவரத்து வசதிகள், போன்ற சிறு சிறு விஷயங்களிலும் கவனம் செலுத்துங்கள்.
  2. அப்பாட்மெண்ட் கதவு பலமானதாய் இருக்கிறதா என்பதைக் கவனியுங்கள். முன் கதவு நல்ல உறுதியாய் இருக்க வேண்டியது அவசியம். ரொம்ப அலங்காரம் எனும் பெயரில் டிசைன் செய்து மரத்தின் கனத்தைக் குறைத்து விடாதீர்கள்.
  3. கதவில் வெறுமனே பெயருக்கு ஒரு பூட்டு போடுவது உதவாது. பூட்டு நல்ல தரமான பூட்டாக இருக்க வேண்டும். கொஞ்சம் தூரத்திலுள்ள ஏதேனும் ஒரு கடையில் நீங்களாகவே போய் வாங்கிக் கொள்ளுங்கள். 
  4. இப்போதெல்லாம் எல்லாக் கதவுகளுக்கும் முன்னால் ஒரு கிரில் போட்டு விடுகிறார்கள். அது ரொம்ப நல்லது.
  5. கதவுடன் இணைக்கப்பட்டிருக்கும் “டெட் போல்ட் லாக்” வாங்கி மாட்டுங்கள். கதவை படீரென திறந்து கொண்டு யாரும் வர முடியாது. வெளியே யாராவது வந்து கதவைத் தட்டினால் கூட முழுமையாய்க் கதவைத் திறக்காமலேயே பேச முடியும்.
  6. வீட்டுக் கதவில் எத்தனை பூட்டுகள், தாழ்ப்பாள் சங்கதிகள் உண்டோ எல்லாவற்றையும் இரவில் பூட்டி வையுங்கள். சும்மா ஒரு தாழ்ப்பாள் மட்டும் பெயருக்குப் போட்டுக் கொண்டு தூங்காதீர்கள். நிறைய பூட்டுகள் இருந்தால் திருட நினைப்பவர்களுக்கு அதிக வேலையைக் கொடுக்கும். அது யாரையாவது எழுப்பி விடும்.
  7. வீட்டைப் பூட்டாமல் வெளியே போகவே போகாதீர்கள். “ரோட்டுக்கு எதிரே தான் கடை ஒரு எட்டு போயிட்டு ஓடி வந்துடறேன்” ன்னு நினைக்க வேண்டாம். அந்த சில வினாடிகளில் யாராவது உங்கள் வீட்டுக்குள் புகுந்து கொள்ளலாம். நீங்கள் திரும்பி வந்தபின் தாக்கலாம் !  
  8. சந்தேகப் படும்படியான நபர் “வாட்டர் பில்டர்” சரி செய்ய வந்திருக்கிறேன், ஏசி சரிசெய்ய வந்திருக்கிறேன் என்றால் உஷாராகி விடுங்கள். உடனடியாக நிறுவனத்துக்குப் போன் செய்து அப்படி யாரையாவது அனுப்பியிருக்கிறார்களா எனக் கேளுங்கள். எக்காரணம் கொண்டும் “அலுவலக நம்பர் என்னப்பா” என வந்தவனிடமே கேட்காதீர்கள். ஏமாந்து விடுவீர்கள்.
  9. இப்போதைய டிவிக்கள், ரேடியோக்கள் எல்லாவற்றிலுமே டைமர் சிஸ்டம் உண்டு. எனவே நீங்கள் வீட்டில் இல்லாவிட்டால் கூட சும்மா அவ்வப்போது டிவி ஓடுமாறு செட் செய்யலாம், ரேடியோ பாடுமாறு செய்யலாம். வீட்டில் யாரோ இருப்பது போன்ற தோற்றம் உருவாகும்.\
  10.   வீட்டுக்கு அருகில் நல்ல நண்பர் ஒருவரையாவது கொண்டிருங்கள். நீங்கள் வெளியே போகும் விஷயத்தைச் சொல்லுங்கள். மாறி மாறி தேவைப்படும் போதெல்லாம் உங்கள் வீடுகளைக் கண்காணித்துக் கொள்ளலாம்.
  11. சந்தேகத்துக்கு இடமான நபர் தென்பட்டால் உடனடியாக போலீஸுக்குத் தெரியப்படுத்துங்கள். கூடவே அப்பார்ட்மெண்ட் நிர்வாகம், வாட்ச்மேன் அனைவரையும் உஷார் படுத்திவிடுங்கள்.
  12. அப்பார்ட்மெண்ட்களில் சில ஆபத்தான பகுதிகள் உண்டு. படிக்கட்டுகள், கார் பார்க்கிங் போன்றவை சில உதாரணங்கள். அங்கெல்லாம் கொஞ்சம் விழிப்பாய் இருக்க வேண்டியது அவசியம்.
  13. வெளிச்சமான இடங்கள் திருட்டு வேலைக்காரர்களுக்கு அலர்ஜி. அப்பார்ட்மெண்டைச் சுற்றி இரவு முழுவதும் பகல் போல வெளிச்சம் இருந்தால் ரொம்பப் பாதுகாப்பானது. சில வெளிநாடுகளில் இது கட்டாயம்.
  14. அட்டவணைப்படி எல்லாவற்றையும் செய்யாதீர்கள். “எல்லா சனிக்கிழமையும் மாலையில் ஷாப்பிங் போவாங்க, சண்டே ஈவ்னிங் வெளியே டின்னர் போவாங்க, இப்படி ஒரு தெளிவான அட்டவணை இருப்பது ஆபத்து !” இது திருடர்கள் சாவாகாசமாக அமர்ந்து திட்டமிட உதவும். “எப்போ போவாங்க எப்போ வருவாங்கன்னே தெரியாது” எனும் நிலை தான் அப்பார்ட்மெண்ட் விஷயத்தில் பாதுகாப்பானது. வெளியே போகும்போது கூட வேறு வேறு பாதைகளில் உங்கள் பயணங்களை அமைத்துக் கொள்ளலாம்.
  15. அப்பார்ட்மெண்ட் வாசிகளுடன் ஒரு நம்பிக்கை  வளர்த்துக் கொள்ளுங்கள். அதற்காக அளவுக்கு அதிகமாகப் பேசி வம்பை விலை கொடுத்து வாங்கவும் வேண்டாம். “அதை ஏங்கா கேக்கறீங்க என் வூட்டுக் காரர் அடுத்த வாரம் புல்லா வெளியூராம்” என ஸ்பீக்கர் வைத்துப் பேசாதீர்கள்.
  16. எப்போதும் செல்போன் கையிலேயே இருக்கட்டும். அதில் லோக்கல் போலீஸ் நம்பர், ஆம்புலன்ஸ் நம்பர், அப்பார்ட்மெண்ட் ஆபீஸ் நம்பர், நம்பிக்கையான சிலருடைய நம்பர்கள் எல்லாம் தவறாமல் இருக்கட்டும். மறக்காம சார்ஜ் பண்ணி வைத்துக் கொள்ளுங்கள்.
  17. அப்பார்ட்மெண்ட்களில் வாடகைக்குப் போகிறீர்களென்றால் கெடுபிடி அதிகமுள்ள இடங்களுக்கே போங்கள். “ஆயிரத்தெட்டு டீட்டெயில்ஸ் கேட்டு சாவடிப்பாங்க” என வெறுக்காதீர்கள். அதே போல எல்லோரிடமும் கேட்பதால் அப்பார்ட்மெண்ட்களில் வருபவர்கள் பாதுகாப்பானவர்களாய் இருக்க சாத்தியம் அதிகம்.
  18. முன்பு வாடகைக்கு இருந்தவர் பயன்படுத்திய பூட்டு மாற்றப்பட்டுள்ளதா என்பதை 100 சதம் உறுதிப் படுத்திக் கொள்ளுங்கள். இல்லையேல் முதல் வேலையாக அதை மாற்றுங்கள்.
  19. வசதியிருப்பவர்கள் செக்யூரிடி கேமராக்களையும் வீடுகளில் பொருத்தலாம். வீட்டில் குழந்தைகளை ஆயா நன்றாகக் கவனிக்கிறாரா என்பது முதல், யாராவது அத்துமீறி நுழைகிறார்களா என்பது வரை சகலத்தையும் அதில் பிடித்துவிடலாம்.
  20. அப்பார்ட்மெண்டின் தன்மைக்கு ஏற்ப பாதுகாப்புகள் அமைத்துக் கொள்ளுங்கள். ஒரு ரூமில் நடப்பது மற்ற ரூமுக்கே கேட்காது என வைத்துக் கொள்ளுங்கள். வீட்டில் ஒரு டோர் அலார்ம் சிஸ்டம் வாங்குவது நல்லது. கதவு திறக்கப்பட்டால் அது அதிக சத்தம் போட்டு உங்களை உஷார் ப்படுத்திவிடும்.1.  கதவில் ஒரு சிறிய லென்ஸ் பொருத்தி வெளியே இருப்பவர் யார் என்பதைப் பார்ப்பது ரொம்ப நல்லது. சிம்பிள் செக்யூரிடி சிஸ்டம். ஆனால் ரொம்பப் பயனளிக்கும். இந்த அட்ரஸ் எங்கே இருக்கு தெரியுமா ? ஒரு போன் பண்ணிக்கலாமா ? இப்படி ஏதாவது ஒரு சிம்பிள் உதவியுடன் பெரிய பெரிய ஆபத்துகள் வரலாம் கவனம் தேவை. 
  21. நீங்கள் ஒரு திருடராய் இருந்தால் உங்கள் வீட்டில் எப்படியெல்லாம் நுழைவீர்கள் என யோசியுங்கள். அந்த இடங்களிலெல்லாம் பாதுகாப்பைப் பலப்படுத்துங்கள். 
  22. ஒருவேளை உங்கள் வீட்டில் திருடன் நுழைந்து விட்டானென்றால், உதவி உதவியென கத்தினால் ஒருவேளை உதவி கிடைக்காமல் போகலாம். எனவே தீ.. தீ என கத்துங்கள் !! இது அனுபவஸ்தர்களின் அட்வைஸ்.
  23. கழற்றிப் போட்டிருக்கும் ஷூவிற்குள், மிதியடிக்குக் கீழே, செடித்தொட்டிக்கு அடியில், கதவுக்கு மேல் இப்படிப்பட்ட இடத்திலெல்லாம் சாவியை வைத்துச் செல்லாதீர்கள். இதெல்லாம் ஹைதர் கால டெக்னிக்.
  24. கார் கீயில் வீட்டுச் சாவியையும் போட்டு வைக்காதீர்கள். எங்கேயாவது வேலட் பார்க்கிங் சமயத்தில் கூட உங்கள் கீ டூப்ளிகேட் செய்யப்படலாம். உங்கள் கார் எண்ணை வைத்து உங்கள் விலாசம் கண்டுபிடிக்கப் படலாம் !
  25. யாராவது போன் பண்ணினால் உடனே உங்கள் ஜாதகத்தை அவரிடம் சொல்லாதீர்கள். அவர்கள் யார், என்ன சமாச்சாரம் என்பதையெல்லாம் முதலில் கேட்டு விட்டு தேவையான பதிலை மட்டும் சொல்லுங்கள். அடிக்கடி ராங் கால் வருகிறதா ? தொலைபேசி நிறுவனத்திற்கு கம்ப்ளெயிண்ட் செய்யுங்கள். வீடு காலியாய் இருக்கிறதா ? ஆட்கள் இருக்கிறார்களா என்பதைத் தெரிந்து கொள்ளக் கூட ராங் கால்கள் வரும் உஷார்.
  26. முதலில் ஒரு காலர் ஐடி வாங்கிக் கொள்ளுங்கள். யாரெல்லாம் உங்களைத் தொடர்பு கொண்டிருக்கிறார்கள் எனும் விஷயம் தெரியவரும். உங்கள் வீட்டு குப்பைகளில் கூட கவனம் செலுத்துங்கள். குடும்பத்தினரைப் பற்றிய, வங்கிக் கணக்கு பற்றிய விஷயங்களெல்லாம் அதில் இல்லாதபடி பார்த்துக் கொள்ளுங்கள்.
  27. யாராவது வந்து உங்கள் பக்கத்து வீட்டுக் காரர்களைப் பற்றி தேவையற்ற கேள்விகள் கேட்டால் உஷாராகிவிடுங்கள். அவர்களிடம் கவனமாய் இருங்கள். நம்பிக்கையற்றவராய் தெரிந்தால் அப்பார்ட்மெண்ட் ஆபீஸ் போய் செய்திகளை வாங்கச் சொல்லுங்கள். முடிந்தால் செல்போனில் நைசாக அவனை ஒரு படம் பிடித்துக் கொள்ளுங்கள். மறக்காமல் உங்கள் பக்கத்து வீட்டுக்காரரிடம் விஷயத்தைச் சொல்லுங்கள்.
  28. நகைகளையெல்லாம் வங்கி லாக்கரில் வைத்து விடுதல் உசிதம். கொஞ்சம் தேவைக்கேற்ற பணம் மட்டும் வீட்டில் இருப்பதே பாதுகாப்பானது.
  29. உங்கள் பக்கத்து வீட்டுக்காரர்கள் என்னென்ன கார் வைத்திருக்கிறார்கள் என்பதை கவனியுங்கள். ஏதேனும் வித்தியாசமான கார் வந்தால் அலர்ட் ஆகி விடுங்கள். அதன் எண்ணை எழுதி வையுங்கள். தேவைப்படலாம் !

 நன்றி : பெண்ணே நீ…

 

பயனுள்ளதாய் இருந்தால்… வாக்களியுங்கள் ….


சேவியர்

டாப் 10 ஷாப்பிங் டிப்ஸ்

 

கிடைக்கும் போனஸ் பணத்தில் ஏசி வாங்க வேண்டும், டி.வி வாங்க வேண்டும், பிரிட்ஜ் வாங்க வேண்டும் என திட்டமிடுவது சகஜம். அப்படி காத்திருந்து காத்திருந்து வாங்கும் பொருள் நமக்கு தலைவலியாய் மாறி விடக் கூடாது. அதற்கு கொஞ்சம் விஷயங்களை நீங்கள் மனதில் வைத்திருக்க வேண்டியது அவசியம்.

1. எந்தப் பொருள் வாங்க வேண்டும் என விரும்புகிறீர்களோ அந்தப் பொருளைப் பற்றி நன்றாக அறிந்து கொள்ளுங்கள். அதே பொருள் அதே வசதிகளுடன் வேறு பிராண்டில் என்ன விலை என்பதைப் பாருங்கள். எந்தக் கம்பெனி நம்பிக்கையானது, எது அதிக கேரண்டி தருகிறது என்பதையெல்லாம் அறிந்தபின் முடிவெடுங்கள்.

2. இந்த விலையில் தான் பொருள் என முதலிலேயே முடிவு செய்ய வேண்டியது முக்கியம். அப்போது தான் அந்த விலையில் கிடைக்கக் கூடிய நல்ல பொருள் எது என உங்கள் தேடுதல் கூர்மையாகும். தேவையில்லாமல் ஆசைப்பட்டு விழா நாளில் மனவருத்தம் கொள்ள வேண்டியிருக்காது.

3. பொருளை வாங்கும் முன் அந்த பொருள் குறித்த விமர்சனங்கள், அலசல்கள் போன்றவற்றை கவனமாய் படியுங்கள். விளம்பரங்களைப் பார்த்து உடனே வாங்க வேண்டும் என பிடிவாதம் பிடிக்காதீர்கள். இணையத்தில் துழாவினால் அக்கு வேறு ஆணி வேறாக தகவல்களை அள்ளித் தருவார்கள்.

4. வாஷிங் மெஷின், பிரிட்ஜ், டிவி, ஏசி போன்றவற்றை “பார்ப்பதற்கு அழகாய் இருக்கிறதே” என வாங்காதீர்கள். எப்படி அதைப் பயன்படுத்தப் போகிறீர்கள். எத்தனை பேர் பயன்படுத்தப் போகிறீர்கள். எத்தனை முறை பயன்படுத்தப் போகிறீர்கள். எந்த அறையில் அதை வைக்கப் போகிறீர்கள் என்பதையெல்லாம் கவனத்தில் கொண்டு வாங்குங்கள்.

5. “மின்சாரத்தைச் சேமிக்கும்” என நட்சத்திர அடையாளம் போட்டிருக்கும் பொருட்களை வாங்குவது நல்லது. அவை உங்களுடைய செலவையும் குறைக்கும். நாட்டுக்கும் நன்மை பயக்கும். ஒவ்வொரு யூனிட் மின்சாரத்தை நீங்கள் சேமிக்கும் போதும் நாட்டுக்காய் ஒரு யூனிட் மின்சாரத்தைத் தயாராக்குகிறீர்கள் என்பது தான் பொருள்.

6. பொருள் வாங்கும் போது கேரண்டி அட்டை, வாரண்டி அட்டை, மேனுவல், ரசீதுகள் போன்ற அனைத்தையும் கவனமாய் கேட்டு வாங்குங்கள்.

7. பில்லைச் சரிபார்ப்பதும், கேரண்டி அட்டையில் சீல், கையொப்பம் எல்லாம் இடப்பட்டிருக்கிறதா என்பதைச் சரிபார்ப்பதும் அவசியம். வாங்கும் போது கடைக்காரர்கள் உங்களிடம் அன்பாய் சிரித்துப் பேசுவார்கள். பழுது என்று போனால் வேறு விதமாக உங்களிடம் நடந்து கொள்வார்கள் என்பதை நான் சொல்லத் தேவையில்லை.

8. பொருளை வாங்கி வீட்டிக் கொண்டு வைத்து விட்டு எப்படி இயக்குவது என கற்றுக் கொள்ள வேண்டாம். கடையிலேயே இயக்குவது குறித்த அனைத்து தகவல்களையும் ஒன்று விடாமல் கேட்டுத் தெரிந்து கொள்ளுங்கள். குறிப்பாக ரிமோட் சமாச்சாரங்களை முழுமையாக அறிந்து கொள்ளுங்கள்.

9. வாங்கும் போது மேனுவலைப் பார்த்து பொருளுடன் எல்லா இணை பொருட்களும் தரப்பட்டிருக்கிறதா என்பதைச் சரி பார்த்துக் கொள்ளுங்கள். சில நிறுவனங்கள் எக்ஸ்டா இணைப்புகளை இலவசமாகக் கொடுப்பார்கள். மேனுவலைப் பார்த்தால் தான் அது தெரியும்.

10. சர்வீஸ் செண்டர் எங்கே இருக்கிறது ? ஒரு வருடத்துக்கான சர்வீஸ் ஒப்பந்தம் இட்டால் எவ்வளவு பணம் ஆகும் ? இந்த நிறுவனத்தின் சர்வீஸ் தரம் எப்படி இருக்கிறது ? சர்வீஸ் விலை எப்படி ? என்பதை முழுமையாய் அறிந்து கொள்ளுங்கள். பொருள் வாங்கியபின் நமக்குத் தேவை தரமான சர்வீஸ் தான். “சர்வீஸ் நல்லாயில்லை” என்றால் பொருளை வாங்காமல் இருப்பது விவேகம்.